Búgin Qazaqstanda AES salý máselesi boıynsha Astanada ótken jarııa talqylaýǵa qatysqan Májilis depýtaty Nıkıta Shatalov kómir elektr stansııalaryna, atap aıtqanda, Qaraǵandy oblysyna jasaǵan sapary týraly aıtty, dep habarlaıdy Egemen.kz.
Depýtattyń aıtýynsha, qala Topar GRES-inen shyǵarylǵan kúlge toly. Kómirdiń kúli 60 jyldan beri jınalǵan, nátıjesinde «kúl dalalary» qalyptasqan. Bul rette Májilis depýtaty AQSh-taǵy atom energetıkasy osyndaı kezeńde sýpermarket kólemindeı ǵana atom qaldyqtaryn shyǵarǵanyn mysal retinde keltirdi.
«Menińshe, radıoaktıvti qaldyqtar týraly aıtqan kezde neni tańdaıtynymyz belgili. Bul kúldiń de «fony» bar, jel soqqan kezde ol Topar qalasyna da áserin tıgizedi. Páterlerge kirip, ókpege túsedi. Bul onkologııalyq aýrýlar týdyrady, elimiz mundaı jaǵdaıǵa buryn da tap bolǵan», dedi depýtat.
Sondaı-aq Nıkıta Shatalov elimizdiń ekonomıkany dekarbonızasııalaý baǵytyna sáıkes bolashaqta kómir men basqa da lastaýshy generasııany paıdalana otyryp óndirilgen árbir ónim úshin tikeleı aqshalaı sanksııalar engiziletinin eske saldy.
«Kómir shyǵaratyn óńir, Qaraǵandy oblysynyń týmasy retinde aıtarym, men kómirmen dem alǵanymyzdy qalamaımyn. Amerıkalyq atom ónerkásibi 60 jyl ishinde shyǵarǵan sýpermarket kólemindeı ǵana qaldyqty bizdiń turǵyn úılerimizdegi pesh 5-7 jyl ishinde shyǵarady», dep atap ótti Nıkıta Shatalov.