Qazaqstan Respýblıkasy Prezıdentiniń Jarlyǵy № 993

Qazaqstan Respýblıkasynyń ál-Farabı atyndaǵy ǵylym men tehnıka salasyndaǵy jáne ádebıet pen óner salasyndaǵy Memlekettik syılyqtary týraly Ǵylym men tehnıka, ádebıet pen óner salasyndaǵy jetistikteri úshin Memlekettik syılyq berý júıesin jetildirý maqsatynda qaýly etemin: 1. Qazaqstan Respýblıkasynyń ál-Farabı atyndaǵy ǵylym men tehnıka salasyndaǵy Memlekettik syılyǵy jáne Qazaqstan Respýb­lıka­sy­­nyń ádebıet pen óner salasyndaǵy Memlekettik syılyǵy taǵaıyn­dalsyn. 2. Mynalar: 1) Qazaqstan Respýblıkasynyń ál-Farabı atyndaǵy ǵylym men tehnıka salasyndaǵy jáne ádebıet pen óner salasyndaǵy Memlekettik syılyqtary týraly ereje; 2) Qazaqstan Respýblıkasynyń ál-Farabı atyndaǵy ǵylym men tehnıka salasyndaǵy Memlekettik syılyǵyn berý jónindegi komıssııa týraly ereje; 3) Qazaqstan Respýblıkasynyń ádebıet pen óner salasyndaǵy Memlekettik syılyǵyn berý jónindegi komıssııa týraly ereje; 4) Qazaqstan Respýblıkasynyń ál-Farabı atyndaǵy ǵylym men tehnıka salasyndaǵy Memlekettik syılyǵyn berý jónindegi komıssııanyń quramy; 5) Qazaqstan Respýblıkasynyń ádebıet pen óner salasyndaǵy Memlekettik syılyǵyn berý jónindegi komıssııanyń quramy; 6) Qazaqstan Respýblıkasynyń Memlekettik syılyǵy laýreatynyń dıplomy men tósbelgisiniń sıpattamasy bekitilsin. 3. Qazaqstan Respýblıkasynyń Úkimeti bir aı merzimde osy Jarlyqty iske asyrý jóninde qajetti sharalar qabyldasyn. 4. Osy Jarlyqqa qosymshaǵa sáıkes Qazaqstan Respýblıkasy Prezıdentiniń keıbir jarlyqtarynyń kúshi joıyldy dep tanylsyn. 5. Osy Jarlyqtyń oryndalýyn baqylaý Qazaqstan Respýblıkasy Prezıdentiniń Ákimshiligine júktelsin. 6. Osy Jarlyq 2015 jylǵy 1 qańtardan bastap qoldanysqa engiziledi jáne resmı jarııalanýǵa tıis. Qazaqstan Respýblıkasynyń Prezıdenti N.NAZARBAEV. Astana, Aqorda 2015 jylǵy 21 qańtar. № 993

«Qazaqstan Respýblıkasynyń ál-Farabı atyndaǵy ǵylym men tehnıka salasyndaǵy jáne ádebıet pen óner salasyndaǵy Memlekettik syılyqtary týraly» Qazaqstan Respýblıkasy Prezıdentiniń 2015 jylǵy 21 qańtardaǵy № 993 Jarlyǵyna TÚSINIKTEME

Jarlyq Qazaqstan Respýblıkasy Prezıdentiniń janyndaǵy Sheteldik ınves­torlar keńesiniń 2013 jylǵy 22 mamyrda ótken plenarlyq otyrysynda aıtylǵan ál-Farabı atyndaǵy jańa Memlekettik syılyqty taǵaıyndaý týraly Memleket basshysynyń tapsyrmasyna sáıkes ázirlendi. Ál-Farabı atyndaǵy ǵylym men tehnıka salasyndaǵy Memlekettik syılyqty jáne Ádebıet pen óner salasyndaǵy Memlekettik syılyqty Qazaqstan Respýblıkasynyń Prezıdenti Táýelsizdik kúnine beredi. Ádebıet pen óner salasyndaǵy Memlekettik syılyq 2008 jyldan bastap beriledi. Ál-Farabı atyndaǵy ǵylym men tehnıka salasyndaǵy Memlekettik syılyq 2015 jyldan bastap beriledi. Eki jylda bir ret ál-Farabı atyndaǵy ǵylym men tehnıka salasyndaǵy jeti Memlekettik syılyq jáne ádebıet pen óner salasyndaǵy úsh Memlekettik syılyq beriledi. Ál-Farabı atyndaǵy ǵylym men tehnıka salasyndaǵy Memlekettik syılyq Qazaqstan Respýblıkasynyń azamattaryna: tehnıkanyń, materıaldardyń jáne tehnologııalardyń álemdik analogtar deńgeıindegi nemese odan joǵary deńgeıdegi jańa túrlerin ázirlegeni jáne óndirýdi uıymdastyrǵany úshin; ekonomıkanyń túrli salalarynda Memlekettik qupııalarǵa jatqyzylǵan málimetterdi qamtıtyn múldem jańa buıymdar, tehnologııalyq prosester ázirlegeni jáne jasaǵany úshin; múldem jańa ónim men tehnologııalardy jasaý jáne olardy ekonomıkanyń ártúrli salalaryna engizý boıynsha ekonomıkalyq jáne (nemese) áleýmettik áserdi qamtamasyz etetin ǵylymı-tehnologııalyq qyzmettiń tanylǵan nátıjeleri; basym áleýmettik-ekonomıkalyq mindetterdi sheshýdi jáne ishki jáne syrtqy naryqta Qazaqstan Respýblıkasynyń básekege qabilettiliginiń ósýin qamtamasyz etetin tehnologııalardy óndiriske engizý boıynsha ınnovasııalyq qyzmettiń naqtyly nátıjeleri úshin beriledi. Ádebıet pen óner salasyndaǵy Memlekettik syılyq Qazaqstan Respýblıkasynyń azamattaryna otandyq mádenıetti damytýǵa qosqan erekshe baǵaly úles dep tanylǵan, ádebıet pen óner salasyndaǵy asa úzdik shyǵarmalary úshin beriledi. Ál-Farabı atyndaǵy ǵylym men tehnıka salasyndaǵy Memlekettik syılyq, Ádebıet pen óner salasyndaǵy Memlekettik syılyqty alýǵa usynylǵan jumystardy Qazaqstan Respýblıkasynyń ál-Farabı atyndaǵy ǵylym men tehnıka salasyndaǵy Memlekettik syılyǵyn berý jónindegi komıssııa jáne Qazaqstan Respýblıkasynyń ádebıet pen óner salasyndaǵy Memlekettik syılyǵyn berý jónindegi komıssııa qaraıdy. Komıssııalardyń quramy men olar týraly erejeler Qazaqstan Respýblıkasy Prezıdentiniń Jarlyǵymen bekitiledi. Prezıdent Ákimshiliginiń Áleýmettik-ekonomıkalyq monıtorıng bólimi