Almaty oblysynyń Ile aýdanyndaǵy 9 jekemenshik balabaqshanyń quryltaıshylary qamaýǵa alyndy. Bir aıdyń ishinde 29 jekemenshik balabaqsha jabylyp, memleketke 729,0 mln shyǵyn keltirgeni úshin taǵy birneshe quryltaıshynyń ústinen qylmystyq is qozǵalyp jatyr. Bul jóninde Qonaev qalasynda ótken tamyz keńesinde Almaty oblysynyń ákimi Marat Sultanǵazıev málimdedi.
«Jekemenshik balabaqshalar kásipkerlik sýbektilerge tekseris júrgizýge salynǵan moratorııdi paıdalanyp, memlekettik tapsyryspen bólingen qarjyny jymqyrǵan. Osy tusta búgingi tamyz keńesinde kóterilip otyrǵan – bilim júıesine sıfrlyq tehnologııalardy engizý óte oryndy jáne qajetti is. Sıfrlyq tehnologııa kóp jaǵdaıda bilim salasyndaǵy jemqorlyq táýekelderin joıýǵa septigin tıgizeri sózsiz. Búginde sıfrlyq tehnologııalar basqarmasy arqyly atalǵan jaǵdaılardyń aldyn alý, jemqorlyqqa tosqaýyl qoıý maqsatynda barlyq balabaqshaǵa menshik túrine qaramastan «bıometrııa» avtomattandyrylǵan júıesi engizilip jatyr. Munda ár balanyń balabaqshaǵa kelýi jekeleı QR kod arqyly tabelge engizilip, esebi júrgizilip otyrady», dedi óńir basshysy.
Jekemenshik balabaqshalardaǵy taǵy bir másele – tárbıeshi pedagogterdiń bilimi men biliktiliginiń tómendigi. Qazirgi kezde jalpy respýblıka boıynsha jekemenshik balabaqshalarda tárbıeshiler men kishi qyzmetkerlerdiń óz isine jaýapkershiliginiń tómendigi, psıhologııalyq turaqsyzdyǵy saldarynan balalarǵa qatysty túrli jaǵdaı tirkelip jatyr. Sondaı-aq óńir basshysy jekemenshik balabaqshalarǵa pedagogterdiń bilimi men jaýapkershilikterin kóterý baǵytyndaǵy jumystardy júrgizýdi tapsyrǵanyn atap aıtty.
Almaty oblysy