Qaı salada bolsyn bilimdi, básekege qabiletti mamanǵa táýir jalaqysy bar jumys tabylady. Ol úshin tájirıbeli maman boldym, toldym demeı, udaıy daǵdysyn jetildirip otyrýy tıis. Bul – memlekettiń emes, eńbek naryǵynynyń talaby. Muǵalimderge bala oqytýdyń jańasha, ozyq ádis-tásilderin úıretip júrgen Aınur Ahmetcheeva da bizdiń pikirimizdi quptaıtynyn ańǵartty.
«Maǵan jaqsy muǵalim bárinen qymbat, óıtkeni muǵalim mekteptiń júregi» degen Y.Altynsarın. Mekteptiń jańa, jaıly bolǵany árıne jaqsy. Biraq, odan da mańyzdysy muǵalimniń talantty, myqty bolǵany. Aınur Ahmetcheeva mektep jasynda úzdik ustazdardan tálim alǵan soń, solar júrgen soqpaqqa túsýdi oılapty. Mektep tabaldyryǵyn ımene attaǵan oqýshylardyń qanatyn qataıtyp, jol silteýdi armandapty. Oqýda ozat Aınur sol baǵytynan jańylmaı, izdegenin tapqan.
–О́zim Almaty oblysy Balqash aýdanyndaǵy Baqbaqty aýylynyń týmasymen. Sondaǵy orta mektepte bilim aldyq. Nege ekenin bilmedim, biraq, sol kezden lıderlikke umtylyppyn. Árkez birinshi bolýǵa talpynatynmyn. Bálkim ol da kerek qasıet shyǵar. Mektep jastan aǵylshynǵa qyzyǵyp, olımpıadalardan qalmaıtynbyz. Áli esimde, 1998 jyly aǵylshyn tilinen daryndy balalarǵa arnalǵan Shamshyraq degen baıqaýǵa qatysqanym bar. Sol baıqaýda tóbe kórsetken soń, shet tiline qyzyǵýshylyǵym artqandaı boldy. Sóıtip júrip mektepti úzdik attestatpen aıaqtadym. 2002 jyly Abylaı han atyndaǵy Qazaq halyqaralyq qatynastar jáne álem tilderi ýnıversıtetine memlekettik grantpen oqýǵa tústim. Ýnıversıtette belsendi bolyp, qoǵamdyq jumystarǵa aralastyq. Prezıdenttik stependııa ıegeri atandym. Qýany qaraı ýnıversıtetti, izinshe, sol ýnıversıtettiń magıstratýrasyn qyzyl dıplommen tamamdadym, – deıdi Aınur.
Aınur Serikqyzy shet tili mamandyǵynda oqyp júrip «Shynaıy mysaldar arqyly aǵylshyn tilin oqytý» taqyrybyna qyzyǵyp, zerttepti. Keıipkerimiz qanigi sabaqty mýltfılm, jahanǵa tanymal fılmder arqyly oqytýdy usynǵan. О́ıtkeni, bilikti mamannyń aıtýynsha, sabaqty mýltfılm arqyly meńgergen bala, sol eldiń tilin úırenip qana qoımaıdy, mádenıetinen de habardar bolady dep sanaıdy. Aınur keıin magıstratýraǵa da grantqa túsip, oqýyn jalǵastyrady. Munda ol áýelden ózi zerdelep júrgen «Stýdentterdiń fonetıkalyq daǵdylaryn qalyptastyrý» taqyrybyn odan ári tereńirek zertteýge kirisedi. Túrli eńbekterdi aqtaryp, qazaq tiliniń aǵylshynǵa uqsas tustaryn izdenedi, stýdentterdiń fonetıkalyq daǵdylaryn qalyptastyrý ádis-tásiline mán beredi. Aınur Serikqyzy magıstratýradan soń, ózi oqyǵan mamandyq boıynsha stýdentterge dáris oqı bastaǵan.
Talapty ustazdyń eńbegi baǵalanyp, 2011 jyly Nazarbaev ýnıversıetine grant utyp alǵan. Ǵylymǵa den qoıǵan maman onda da qarap júrmeı, túrli zertteýmen aınalysqan. Ulybrıtanııa, AQSh-tan kelgen muǵalimderimen tize qosyp eńbek etken. Osy kezeńnen bastap Aınur Serikqyzy orta mektep, joǵary oqý oryndarynda sabaq beretin muǵalimderge aǵylshyn tilin úıretýdiń tyń ádis-tásilderine ıek artqan. Qazir de mektepten-mektepke baryp, semınar ótkizip júrgen jaıy bar. Jaqyn beriden Aınur Nazarbaev Zııatkerlik mektebinde jumys isteıdi. Jýyrda ol ekinshi deńgeıli kýrs júrgizip, Nazarbaev Zııatkerlik mektebiniń muǵalimderine sabaq beripti. Kembrıdj ýnıversıtetinen 2-shi deńgeıli trener sertıfıkatyn alyp úlgergen. Bolashaqqa naqty jospar quryp, sol jospardan aınymaı bilim alýǵa umtylǵan keıipkerimizdiń eńbek joly siz ben bizge qyzyq, ustazdyqqa bet burǵan túlekterge úlgi dep oılaımyz.