Shekarashy kúni merekesinde UQK Shekara qyzmeti Almaty oblysy boıynsha departamentiniń ýchaskesinde sý jańa shekara beketi ashyldy.
Kegen aýdanynyń Myńjylqy eldi mekenindegi teńiz deńgeıinen eki myńnan astam metr bıiktiktegi Sharqudyq shatqalynda ótken rásimge departament basshysy, polkovnık Álibek Kaıýpov, aýdan ákiminiń orynbasary Keńes Qabylbekov qatysyp, zamanaýı modýldiń lentasyn qıdy.
«Shekarany nyǵaıtýǵa arnalǵan jol kartasy – 2024» baǵdarlamasy aıasynda shekarashylarǵa paıdalanýǵa berilgen modýlde barlyǵy qarastyrylǵan. Jeke quramnyń jatyn jaıy, jýynýǵa arnalǵan oryn, as daıyndap, tamaqtanatyn bólmege deıin bar. Sondaı-aq aptap ystyqtan qorǵaný úshin bólmeler salqyndatqyshpen qamtamasyz etilgen. Osyǵan deıin barlaý-iz kesý toptary ózderiniń el shebindegi aptaǵa sozylatyn qyzmetterin dalalyq shatyrlarda ótkizetin. Al taýly óńirdiń aýa raıy qubylmaly, jaýyn-shashyn kóp bolatyny belgili. Sondyqtan shekarashylarǵa qoldarynan kelgen kómekterin aıamaıtyn jergilikti ákimdik mundaı zamanaýı modýlderdiń sanyn aldaǵy ýaqytta da kóbeıtýdi josparlap otyr.
Budan bólek, el shebinde turǵan shekara bólimsheleriniń ǵımarattaryn jańartý, ofıserlerge arnap, qyzmettik páterler salý da jol kartasy aıasyndaǵy aýqymdy josparlardyń qataryna kiredi.
Elimizdiń Ánuranymen ashylǵan is-sharanyń alǵashqy sóz tizgini departament basshysy, polkovnık Á.Kaıýpovqa berildi.
«Modýldik keshen shekarashylardyń kóktem aıynan bastalyp, kúz aıaqtalǵanǵa deıin sozylatyn qyzmetterine arnalǵan. Bul bastama, aldaǵy ýaqytta departamenttiń barlyq aýmaǵynda osyndaı shekaralyq beketter iske qosylady», degen Álibek Amangeldiuly osyndaı múmkindikti birinshi bolyp ıelengen «Amanjol» shekara bólimshesiniń barlaý-iz kesý tobyn Shekarashy kúni merekesimen quttyqtap, qyzmetterine qyraǵylyq pen tabys tiledi.
Osydan keıin departament basshysy bastaǵan qonaqtar zamanaýı úlgidegi jańa shekara beketiniń ishin aralap kórdi.
Aıta keterligi, jyl basynan beri UQK Shekara qyzmeti Almaty oblysy boıynsha departamentiniń ýchaskesinde shekara shebinde quqyq buzǵan 300-ge tarta adam ustalǵan. Olardyń ishinde memlekettik shekarany nemese shekara rejimin buzýshylar, baqylaý-ótkizý beketteriniń rejimin buzýshylar kóp kezdesedi.
Qazirgi tańda qazaq-qyrǵyz shekarasy boıynsha memlekettik shekarany buzǵan 8 pákistandyq azamatqa qatysty tergep-tekserý is-sharalary ótip jatyr. Shekara aımaǵyna kelý tártibin buzǵan 250-den astam azamat ákimshilik jazaǵa tartylyp, aıyppul arqalady.
Almaty oblysy