Atyraý oblysynda keıingi jyldary densaýlyq saqtaý salasynyń ınfraqurylymyn damytý maqsatynda birneshe joba qolǵa alynǵan. Osyǵan oraı óńir ortalyǵy men aýdandarda atalǵan salanyń qyzmet sapasyn arttyrý josparlanyp otyr.
Máselen, «Aýyldyq medısınany jańǵyrtý» ulttyq jobasymen 15 aýyldyq eldi mekende medısınalyq mekemelerdiń jańa ǵımaraty paıdalanýǵa beriledi. Onyń ishinde 9 medısınalyq, 5 feldsherlik-akýsherlik pýnkt, 1 dárigerlik ambýlatorııa bar. Mundaı nysandar Qurmanǵazy, Qyzylqoǵa, Inder jáne Isataı aýdandarynda salynyp jatyr. 2027 jylǵa deıin 24 medısınalyq nysan salý kózdelip otyr.
«Qazir Atyraý oblysynda 11 nysannyń qurylysy júrip jatyr. Bul qazirgi talapqa sáıkes keledi. Máselen, Atyraý qalasynda úsh qosalqy stansasymen qosa jedel járdem stansasy, onkologııalyq dıspanseri úshin jańa ǵımaratpen radıologııalyq korpýs, Juldyz shaǵyn aýdany men Amangeldi aýylynda dárigerlik ambýlatorııa, Nursaıa jáne О́rken shaǵyn aýdanynda emhana salynyp jatyr. Munaıly shahar mańyndaǵy Qaıyrshaqty aýyldyq okrýgine qaraıtyn Talqaırań eldi mekeninde de emhana ǵımaratyn salý kózdeldi. Buǵan turǵyndar sanynyń ósýi sebep bolyp otyr. Al Jylyoı aýdanynyń Qaraǵaı, Mahambet aýdanyndaǵy Aqqaıyń aýylynda medısınalyq pýnkt, Isataı aýdanynda feldsherlik-akýsherlik pýnkt, Qurmanǵazy aýdanynyń Súıindik, Balqudyq aýyldarynan dárigerlik ambýlatorııa qurylysy qolǵa alyndy», deıdi oblystyq densaýlyq saqtaý basqarmasynyń basshysy Qaısar Abdalıev.
Jańadan salynǵan dárigerlik ambýlatorııanyń biri munaıly shahardaǵy Juldyz shaǵyn aýdanynda ashyldy. Ambýlatorııanyń aqjeleńdileri 13 myńnan asa turǵynǵa medısınalyq kómek kórsetedi.
«Bul dárigerlik ambýlatorııada zerthana men kúndizgi stasıonar bar. Osy kezge deıin mundaǵy turǵyndar Geolog shaǵyn aýdanyndaǵy emhanaǵa qaralatyn edi. Endi olar medısınalyq kómekti jańa ambýlatorııadan alady. Budan bylaı Geologtegi emhananyń jumysy jeńildep, naýqastardy qabyldaý kezegi qysqarady. Osylaısha, turǵyndardyń sapaly medısınalyq kómek alýyna jaǵdaı jasaldy», deıdi basqarma basshysy.
Dárigerlik ambýlatorııada 18 kabınet bar. Onyń ishinde kúndizgi emhana, stomatologııa, fızıoterapııalyq emdeý bólmeleri zerthanalyq quraldar men tis emdeýge, ózge de medısınalyq qyzmetti kórsetýge arnalǵan apparattarmen qamtylǵan. Munda 8 dáriger men ýchaskelik meıirbıkeler, akýsher-gınekolog pen tis dárigeri jumys isteıdi. Ambýlatorııanyń aqjeleńdileri 3 «Haval M6» markaly qyzmettik kóligimen naýqastardyń shaqyrtýyna jedel jetedi.
Jańadan qoldanysqa beriletin osyndaı nysandarda jumys isteıtin kadr máselesi qalaı sheshimin tabady? Oblystyq densaýlyq saqtaý basqarmasy kadr jetispeýshiligin boldyrmas úshin birneshe baǵdarlama ázirlepti. Birinshisi – birjolǵy áleýmettik ótemaqy tóleý, ekinshisi – qyzmettik páter berý. Buǵan qyzyǵýshylyq tanytqan 150-ge jýyq maman ózge óńirlerden kelýi múmkin. Osyǵan baılanysty bıyl 100-den asa medısına qyzmetkerine áleýmettik kómek kórsetý josparlanyp otyr.
«Atyraý oblysynda ótken jyldan beri ózge óńirlerden kelgen tájirıbeli jáne jas mamandarǵa birjolǵy áleýmettik ótemaqy men qyzmettik páter berý baǵdarlamasy iske asyrylyp jatyr. Byltyr óńirde 103 medısına mamany áleýmettik kómek aldy. Mamandardyń 40-qa jýyǵy aýdandyq, aýyldyq mekemelerge jumysqa ornalasty. Aýylǵa jumysqa barǵan mamandarǵa 5 mln teńge, al Atyraý qalasyndaǵy medısına mekemelerine qyzmetke ornalasqandarǵa 3 mln teńge kómek berildi», deıdi Q.Abdalıev.
Onyń aıtýyna qaraǵanda, bıyl atalǵan jobaǵa ózgeris engiziledi. Máselen, ótemaqynyń mólsheri artady. Endi Atyraý qalasynda jumys isteýdi qalaǵan mamandar áleýmettik ótemaqy retinde 5 mln teńgeni ıelendi. Al aýdandardyń ortalyǵyna jumysqa barǵan medısına qyzmetkerlerine beriletin ótemaqy 7 mln teńgeni quraıdy. Aýyldardaǵy turǵyndardyń densaýlyǵyn jaqsartýǵa úles qosqysy keletin dárigerler úshin ótemaqy 10 mln teńgege jetedi.
«Bul usynysty oblystyq máslıhat qaraýyna usyndyq. Sala qyzmetkerleriniń turǵyn úı jaǵdaıyn jaqsartý úshin «Otbasy bankpen» birlesken jobamyz bar. Jobaǵa sáıkes medısına mamandary bastapqy jarnasyn tólemeı 20 jylǵa baspana satyp alýyna bolady. Ústeme mólsheri – 5 paıyz. Osyndaı qoldaý kórsetiletin Atyraý oblysyndaǵy kadr máselesin oń sheshý úshin medısınalyq joǵary oqý oryndarymen tyǵyz baılanys ornatyp, jas dárigerlerdi shaqyryp otyrmyz», dedi Q.Abdalıev.
Atyraýǵa kelgen jas mamannyń biri – akýsher-gınekolog Gúlfara Kóktenova byltyr qazanda oblystyq perınataldyq ortalyqqa jumysqa ornalasypty. Jeltoqsan aıynda áleýmettik ótemaqyny qolyna alǵan.
«Reseıdiń Astrahan qalasynan medısına ýnıversıtetinde oqyp, akýsher-gınekolog mamandyǵyn Qazan qalasyndaǵy joǵary oqý ornynan alyp shyqtym. Jergilikti ákimdik pen densaýlyq saqtaý basqarmasy tarapynan medısına mamandaryna kóp qoldaý kórsetilip jatyr. О́zim jumysqa ornalasqannan keıin kóp keshikpeı 3 mln teńge ótemaqy aldym. Qazir bizdiń perınataldyq ortalyqta bilikti mamandar kóp. Tájirıbeli áriptesterimmen birlese jumys istep, biliktiligimdi arttyryp júrmin», dedi G.Kóktenova.
Atyraý oblysy