Dúnıejúzilik kóshpeliler oıyndaryna kókpar oıynyna qatysýǵa yqylas tanytqandardyń arasynda AQSh quramasy da qyzý ázirlik ótkerip jatyr. Áleýmettik jelige oqý-jattyǵý jıynyn jarııalaǵan kovboılar Astana tórindegi dúbirli dodanyń júldesinen dámeli. Amerıkalyq kókparshy Nık Ýıllert óziniń jeke daıyndyǵyn jarııalap, komandasyndaǵy ózge de áriptesteriniń ázirligi joǵary ekenin málim etti.
Nık Ýıllertti amerıkalyqtar besaspap balýan retinde tanıdy. Ol MMA sporty, shańǵy, serfıngpen de shuǵyldanyp, kókpar tartýdy da sheber meńgergen. Dúnıejúzilik kóshpeliler oıyndarynda amerıkalyq balýan aýdaryspaqtan da qarymyn synaýǵa bilek túrip otyr.
«2018 jyly AQSh quramasynyń sapynda kókbóri sportynan jáne aýdaryspaqtan Dúnıejúzilik kóshpeliler oıyndaryna qatystym. Bıyl da kókpardan hám aýdaryspaqtan básekege túsetinimdi zor maqtanysh sanaımyn. Qazaqstanǵa barsam degen armanym aqıqatqa aınalmaq. Kópten beri kórikti mekenge saparlap, saıahattaýdy josparlap júr edim. Kókpar sportyn ulttyq oıyny sanaıtyn, keńinen nasıhattap damytqan elder AQSh balýandaryn osal sanaýy múmkin. Biraq biz de barymyzdy salyp, kókpar tartýdy qanshalyqty sheber meńgergenimizdi kórsetemiz», dedi Nık Ýıllert.
Amerıkalyq balýandy jankúıerler jete tanıdy. Sebebi ol 2018 jyldan beri Dúnıejúzilik kóshpeliler oıyndaryna kókpar men aýdaryspaqtan turaqty qatysyp júr.