Atyraý oblysynyń aýmaǵynda kók zeńgirmen talasqan bıik taý kezdespeıdi. Biraq Aqkegershin, Aqtolaǵaı, Qoıqara, Imanqara, Shólqara atalatyn taýǵa bergisiz jotalar bar.
Bul jotalardyń jasyrǵan syry áli tolyq zerttele qoıǵan joq. Sol sebepten, Atyraý oblystyq tarıhı-ólketaný mýzeıi 7-18 tamyz aralyǵynda paleontologııalyq ekspedısııa uıymdastyrdy. Atalǵan ekspedısııa jetekshisi, geografııa ǵylymdarynyń kandıdaty, professor Qajymurat Ahmedenovtiń aıtýynsha, Jylyoı aýdanyndaǵy taý jotalarynyń bor massıvterine zertteý júrgizilipti.
«Zertteý jumysyna dalalyq jáne kameralyq paleontologııalyq ádisterdi qoldandyq. Jotalarǵa zertteý júrgizý kezinde 511 paleofaýna men paleoflora úlgileri jınaldy. Onyń ishinde omyrtqaly tuqymdastardyń 259, omyrtqasyzdar sanatynyń 229, tasqa aınalǵan 18 aǵash úlgisi bar. Ekspedısııa músheleri mezozoı dáýiriniń joǵarǵy bor kezeńindegi biregeı qazba qaldyqtaryn tapty. Ásirese 160 mıllıon jyl buryn ómir súrgen baýyrymen jorǵalaýshylardyń omyrtqalary men paleogen akýlalarynyń tisteri men omyrtqalary, balyqtardyń quıryq qanattary, tasqa aınalǵan aǵashtardyń úlgilerin, 50 mıllıon jyl burynǵy iri otodus akýlalarynyń tisterin qundy jádiger retinde baǵalaýǵa bolady. Sondaı-aq belemnıtterdiń, qosjarnaqty malıýskalar men teńiz kirpileriniń bólikteri tabyldy», deıdi Q.Ahmedenov.
Ǵalymnyń deregine qaraǵanda, paleofaýnanyń biregeı orny – Jylyoı aýdanyndaǵy Shólqara taý jotasy. Bul aýmaq aýdan ortalyǵy – Qulsary qalasynan ońtústik-shyǵysqa qaraı 130 shaqyrym qashyqtyqta ornalasqan.
«Bul jotalar ár kezeńde ǵalymdardyń nazaryn aýdaryp keledi. Máselen, 1931 jyly paleontolog A.Rıabınınniń Qoıqara qyratynan erte bor dáýirindegi dınozavrdyń omyrtqalaryn tapqany qyzyǵýshylyq týdyrdy. Ony Embazavr dep sıpattaǵan ǵoı. Bul «Emba kesirtkesi» degendi bildiredi. Biz Embazavrdy Atyraý oblysynyń paleontologııalyq brendi, álemdik ǵylym úshin biregeı olja dep sanaımyz. Endi ekspedısııa materıaldary óńdelip, onyń nátıjeleri boıynsha ǵylymı tujyrym jasalady. Aldaǵy ýaqytta Atyraý oblysynyń aýmaǵynda mıllıondaǵan jyl buryn ómir súrgen janýarlardyń túrlerin anyqtaý, odan ári zertteý jumystaryn júrgizý jalǵasady», deıdi Qajymurat Ahmedenov.
Atyraý oblysy