Jetisýda medısına salasyna baǵyttalǵan blokti-modýldi nysandar kóptep salynyp jatyr. Máselen, bıyl ondaǵan aýylda zamanaýı emhanalar boı kótergen. Odan bólek, keıingi eki jylda 47 veterınarlyq pýnkt salynǵan. Jaqynda oblys ortalyǵynda turǵyzylatyn onkologııalyq ortalyqtyń da jobasy syzyldy. Qazir aýyldaǵy halyqtyń áleýmettik deńgeıin jaqsartý maqsatynda osyndaı qadamdar jasalyp jatyr.
Prezıdent Joldaýynda berilgen tapsyrmany iske asyrý aıasynda mamandardyń jalaqysyn kezeń-kezeńmen 60 paıyzǵa kóterý úshin qosymsha 1,2 mlrd teńge qarajat jumsaldy. Búginde mamandardyń ortasha jalaqysy 120 myń teńgeden 250–300 myń teńgege deıin kóterildi.
Medısına salasynda jyldam salynatyn qurylys oryndary bıýdjetke de únem ári uzaq ýaqytty talap etpeıdi. Osy rette halyqty kóp tolǵandyrǵan Taldyqorǵan qalasynda salynatyn onkologııalyq dıspanserdiń jobasy daıyn boldy. Quny 10 mlrd teńge shamasyndaǵy úlken áleýmettik jobany «Kazakhmys Holding» kompanııasy iske asyrady.
Atap ótsek, Memleket basshysy Qasym-Jomart Toqaev Jetisý oblysyna jumys sapary kezinde Taldyqorǵan qalasyndaǵy onkologııalyq dıspanserdiń materıaldyq-tehnıkalyq bazasyn nyǵaıtý týraly tapsyrma bergen edi. Soǵan sáıkes osy jyldyń maýsym aıynda oblys ákimdigi, Densaýlyq saqtaý mınıstrligi, «Kazakhmys Holding» ınvestor-kompanııasy Taldyqorǵanda onkologııalyq ortalyq salý týraly úshjaqty memorandýmǵa qol qoıǵan. Atalǵan ýaǵdalastyq negizinde ınvestor óz qarjysyna ortalyq ǵımaratyn turǵyzady, Densaýlyq saqtaý mınıstrligi zamanaýı materıaldyq-tehnıkalyq bazamen qamtamasyz etedi, al ákimdik óz tarapynan ınjenerlik kommýnıkasııalyq jelilerin júrgizedi jáne ishinara qural-jabdyqtar alýǵa qoldaý kórsetedi dep josparlanyp otyr.
«Onkologııany dıagnostıkalaý men emdeý – búkil álemdegi ózekti máselelerdiń biri. Sondyqtan da oǵan memleket tarapynan basymdyq berilgen. Buǵan deıin oblys ákiminiń bastamasymen jańa zamanaýı onkologııalyq ortalyq salý týraly úshjaqty memorandýmǵa qol qoıyldy. Bul jańa ortalyqta pasıentterdi emdeý jáne dıagnostıkalaýdyń jańa tásilderi qoldanylady. Emdeý barysynda syzyqtyq údetkish, hımıoterapııany emdeý ádisterin paıdalanatyn ıntervensııalyq hırýrgııa qoldanylady. Budan basqa, skrınıng ortalyǵy ashylady, bul halyqqa sapaly medısınalyq qyzmet kórsetýge óziniń oń áserin tıgizedi», deıdi oblystyq densaýlyq saqtaý basqarmasynyń basshysy Arman Janseńgirov.
Sondaı-aq jańa onkologııalyq ortalyqta gematologııa, ońaltý, farmakologııa bólimsheleri ashylyp, radıologııa, hımıoterapııa, mammogınekologııa bólimsheleri jumys isteıdi.
Aýyldaǵy halyq degennen shyǵady, áýelgi sálemin «mal-jan aman ba?» dep bastaıtyn aǵaıynnyń bir máselesi veterınarlyq pýnktter ekeni buǵan deıin aıtylǵan. Osy maqsatta keıingi jyldary mal emdeýge arnalǵan zamanaýı mekemeler irge jaıa bastady. О́ńirde byltyrdan beri jergilikti bıýdjet qarajatyna 50-ge tarta blokty-modýldi veterınarlyq pýnkt salynǵan. Materıaldyq bazany nyǵaıtý jaǵynan bul – respýblıka kólemindegi úzdik kórsetkishterdiń biri.
О́ńir ákimi baspasóz qyzmetiniń málimetinshe, ótken jyly blokti-modýldi konstrýksııadan 24 vetpýnkt turǵyzylsa, bıyl 23 vetpýnkt salynyp, paıdalanýǵa beriledi. Mundaı qurylys qysqa merzim ishinde – shamamen 3-4 aıda turǵyzylady. Jobalyq-smetalyq qujatty qajet etpeıdi. Qurylystyń quny edáýir arzan. Buǵan qosa veterınarııa mekemeleriniń materıaldyq-tehnıkalyq bazasyn jaqsartý maqsatynda 26 avtokólik, 517 arnaıy veterınarııalyq quraldar, 113 kompıýter jıyntyǵy jáne 117 dana ISJ bazasyna arnalǵan planshet satyp alynyp, arnaıy mamandarǵa berilgen.
Budan bólek, keıingi eki jylda veterınarlyq sharalardy uıymdastyrý úshin oblystyq bıýdjetten 8,1 mlrd teńge bólingen. Osyndaı turaqty qoldaýlar jumys sapasyna óziniń oń áserin tıgizip otyr. Máselen, Jetisý oblystyq Veterınarııa basqarmasynyń basshysy Nurlan Jamaýbaevtyń aıtýynsha, ótken 6 aıda 426,5 myń iri qara, 1 mln 286 myń bas usaq mal brýsellezge qarsy tekserýden ótkizilgen.
«Mal sharýashylyǵy – oblys ekonomıkasynyń negizgi basym baǵyttarynyń biri. Oǵan qosa et pen sút sapasy halyqtyń densaýlyǵyna tikeleı áser etetin faktor. Sondyqtan mal men qustyń jaǵdaıyn turaqty baqylap otyramyz. Bul rette asa qaýipti aýrýlardyń aldyn alý baǵytyndaǵy vaksınalaýdyń 6 aılyq jospary laıyqty deńgeıde oryndaldy», deıdi N.Jamaýbaev.
Jalpy, oblys boıynsha aýdan, qalalarda 10 veterınarlyq stansa men 118 vetpýnkt bar. Onda 1 100 maman eńbek etedi. Veterınarlar aýyl sharýashylyǵy janýarlary men qustardyń asa qaýipti aýrýlarynyń 16 túri boıynsha veterınarlyq-profılaktıkalyq is-sharalar atqarady. Aldaǵy ýaqytta qosymsha osy salaǵa arnalǵan blokty-modýldi nysandar salynady.
Jetisý oblysy