Atom elektr stansasyn salý máselesi shet memleketterde de keńinen talqylanyp jatyr. Ortalyq Azııadaǵy jalpyǵa ortaq klımattyq málimetterdi qoljetimdi etýge baǵyttalǵan CAREC portaly elimizdegi referendým aldynda talqyǵa salynyp jatqan AES salý máselesine arnaıy maqala arnap, bastamany qoldaýshylar men qarsylardyń pikirlerin bergen.
«Qazaqstan Prezıdenti Q.Toqaev 2023 jyldyń qyrkúıeginde ol «atom energetıkasyn damytý asa mańyzdy ekonomıkalyq ári saıası máselege aınalǵanyn» aıta kele, el úkimetine AES qurylysy máselesin jan-jaqty talqylap qana qoımaı, ony jalpyhalyqtyq referendýmǵa shyǵarýdy tapsyrdy. Bıyl maýsym aıynyń sońynda BAQ qyzmetkerlerin marapattaý kezinde Q.Toqaev atom energetıkasyn damytý máselesine qaıta oralyp, qazirgi tańda AES qurylysyn Qazaqstandaǵy BAQ-tyń basty taqyrybyna aınaldyrdy», dep jazady portal.
Al AES qurylysyn qoldaıtyndar munyń eldegi energııa tapshylyǵyn joıatynyn alǵa tartady. «Energetıka salasynda 20 jyldan asa eńbek etken kásipker Shyńǵys Serikov kerisinshe, Qazaqstannyń bolashaq energetıkalyq táýelsizdigi tek atom energetıkasymen baılanysty ekenine senimdi. Ol óz sózine birneshe faktordy dálel retinde keltiredi: Qazaqstan barlanǵan ýran qory jóninen álemde ekinshi el, al ony óndirýden – birinshi. Jylý shyǵaratyn elementter óndirip, ony túrli elderge eksporttaıdy. «Endi tek AES salyp, elektr energııasy tapshylyǵyn sheshý ǵana qalyp otyr. Biz elde tutynylatyn energııanyń 20 paıyzyn únemi Reseıden satyp alýǵa májbúrmiz» deıdi ol. Onyń aıtýynsha, ótken ǵasyrdyń 30-50 jyldary salynǵan jylý jáne gıdroelektr stansalaryn jańǵyrtý tıimsiz, oǵan kóp qarjy ketedi. Al kún panelderi úsh jyldan keıin kómeskilenip, stansanyń qýatyn azaıtady. Sondyqtan Qytaı nemese Reseı salatyn AES qana eldegi tańǵy jáne keshki elektr energııasyn tutyný mólsherin jaba alady. О́ıtkeni olardyń usynyp otyrǵan reaktorlary «4+» býynyna jatady. Bul basqa elderdiń reaktorlaryna qaraǵanda ozyq», dep jazady CAREC portaly.