Astanada «Joltap» áleýmettik baǵdarlamasy aıasynda tigin isi boıynsha sheberlik sabaǵy ótti. Elorda ákimdiginiń bastamasymen qolǵa alynǵan joba turaqty tabys tabýǵa nıettengen azamattarǵa arnalǵan. Búginde ıgi bastama kómegimen 5 myńnan astam turǵyn oqýdan ótip, olardyń 3 myńǵa jýyǵy jumysqa ornalasty.
Áleýmettik baǵdarlamaǵa qatysyp, jaqsy tabys tabý úshin áleýetin arttyrýǵa kelgenderdiń biri – Aıman Saǵyndyqova. Joba aıasynda astanalyq turǵyn arnaıy mamannan ulttyq kıimderdi tigýdiń ádis-tásilderin meńgerdi.
– Qazaqtyń ulttyq kıimi degende kóz aldymyzǵa oıýly shapan, zerli qamzol, saptama etik kıgen, sáni men symbaty jarasqan kisiniń túr-sıpaty oıǵa keledi. Bul úıirme jumysynda biz qolóner túrlerimen aınalysý maqsatynda shapan jáne kóılek tigýdiń tehnologııasyn úırendik. Árıne, ulttyq kıimdi daıyndaý barysy birneshe kezeńnen ótedi. Munda jeke talǵamǵa kóbirek zeıin qoıylady. Sheberlik saǵat barysynda oıý-órnekti qolmen kesteleý jáne kompıýtermen túsirýdi kórsetti, deıdi ol.
Indıra Jadaeva da «Joltap» jobasynyń túlegi. Ismer oqytýshynyń muqııat baqylaýymen úlgini qurastyrý, mataǵa aýystyrý, pishý jáne tigý sııaqty biregeı buıymdy jasaýdyń qyr-syryn úırendi.
– Oqyǵanyma óte rızamyn. Men kóptegen jańa daǵdylarǵa ıe boldym jáne ınnovasııalar týraly bildim, dedi qatysýshy.
Jalpy, jobany iske asyrýda keshendi jospar byltyr bekitilgen. Bastamanyń maqsatty aýdıtorııasy – jumyssyzdar jáne eńbek naryǵynda baǵdarlanbaǵan NEET sanatyndaǵy jastar, tájirıbesi men biliktiligi joq azamattar. Sondaı-aq kirisin arttyrýǵa múddeli otandastarymyzǵa arnalǵan.
Baǵdarlama aıasynda tegin qysqamerzimdi kýrstarǵa «Barshaǵa múmkindik» modýldik pýnktterinde jazylýǵa bolady. Oqytý 8 jumys daǵdysy: tiginshi, sánger-konstrýktor, býhgalterlik esep negizderi, korpýstyq jıhaz jasaý negizderi, satýshy-kassır, elektr gazben dánekerleýshi, barısta, aıaq kıimdi jóndeý jáne 7 sıfrlyq daǵdylar: SMM, saıttardy ázirleý, beınemontaj, grafıkalyq dızaın, mobılografııa, marketpleısterdegi saýda, target boıynsha ótedi.