Jambyl oblysynyń polıseıleri kópirden sekirmek bolǵan áıeldi qutqaryp qaldy, dep habarlaıdy Egemen.kz.
Taraz polısııa basqarmasynyń kezekshi bólimine jergilikti turǵynnyń kópirden sekirmek bolǵany týraly habarlama kelip túsken.
«Oqıǵa ornyna jedel jetken polıseıler áıeldi bul qadamnan taıdyrý úshin bar kúsh-jigerin saldy. Áıel sekirýge daıyn bolǵan syn saǵatta polıseıler oǵan tez jaqyndap, ony kıiminen ustamaq boldy. Soǵan qaramastan áıel sýǵa qulap ketti», dedi polısııa. Polısııa leıtenanty Álıaıdar Rysmuhambetov esh oılanbastan áıeldi qutqarý úshin ózenge sekirgen. Tótenshe jaǵdaılar qyzmetiniń qyzmetkeri men jergilikti turǵyn áıeldi jaǵaǵa shyǵaryp úlgergen. Áıeldiń mundaı áreketke barýyna otbasyndaǵy janjal sebep bolǵan. Oqıǵanyń mán-jaıy anyqtalyp jatyr.