Jem ózeniniń tasqyn sýynan zardap shekken Qulsary qalasynda «Mektepke jol» aksııasy aıasynda oqýshylardy sabaqqa qajetti oqý quraldarymen qamtý qolǵa alyndy. Búginge deıin monoshahardaǵy 770 jetkinshek oqý quraldarymen qamtyldy.
Jylyoı aýdany ákimdiginiń málimetine súıensek, munaı-gaz ónerkásibi salasyndaǵy iri kompanııalar mektep oqýshylaryna sabaqqa qajetti quraldardy alyp bere bastady. Jaqynda «Teńiz» ken ornynan Qara teńiz jaǵalaýyndaǵy aılaqqa deıin qubyrmen munaı tasymaldaıtyn Kaspıı qubyr konsorsıýmy 370 oqýshyny oqý quraldarymen qamtamasyz etken. Bul balalar bıyl mektep tabaldyryǵyn alǵash attaǵaly otyr.
Qaıyrymdylyq aksııasyna «Teńiz» ken ornyn ıgerip jatqan sheteldik ınvestorlarmen birlesken «Teńizshevroıl» JShS eriktileri de qosyldy. Olar «Júrekten-júrekke» qaıyrymdylyq qorymen birge 400 oqýshyǵa mektep quraldary salynǵan sómkeni syıǵa tartty.
«Mektep oqýshylaryn kúndelikti sabaqta paıdalanatyn qural-jabdyqtarmen qamtamasyz etý jalǵasyn tabady. Bul ıgi iske jeke kásipkerler de atsalysqaly otyr. Qaıyrymdylyq aksııasy qyrkúıek aıynyń sońyna deıin jalǵasady», dep málimdedi aýdandyq ákimdiktiń baspasóz qyzmeti.
Atyraý oblysy