Sheshem terezege telmirip tur. Meniń bala kúnimde de solaı edi. Búgin de ózgermepti. Sondaǵysy mektepte muǵalim bolyp isteıtin ákeıdi kútedi. Keıde qaınap jatqan qazannyń kóbigin alyp jatyp:
– Ákeń kórinbeı me? – deıdi.
Mundaıda etpettep jatyp kitaptan kóz almaǵan kúıi meniń jaýabym bireý-aq.
– Joq!
Oǵan qanaǵattanbaı, ózi qaraıdy. Terezeden bes júz metr jerdegi mektep anyq kóringendikten, ákemniń sulbasy alystan-aq baıqalady.
– Balalar shyqty. Ákeń de kórindi. Tamaqty túsireıin. Ishegiń qabysyp jatqanda mundaı sózder rasymen súıkimdi estiletin.
Bala kúngi osy otbasy qaǵıdasy, ákeń kelmeı dastarqanǵa otyrmaý, úlken asty bastamaý áli kúnge deıin bir úzilmepti ǵoı. Ashtan buratylyp, kóziń qaraýytsa da, ol dastarqanǵa kelmeı qarnyńa as barmaıdy.
Keshegi demalysta barǵanymda, sheshem sol daǵdysynan jańylmapty. Bes-alty jyldan asa dúrbeleńi kóp qalada kez kelgen ýaqytta tamaqtanyp, qý jaqqa bir tynym bermeıtin myna men, shal-kempirdiń balasy bolǵan erkindigimdi alǵa tartyp:
– Aý, keshki tamaq jemeıtin be edik? Inim myrs etti.
– Asqazanyń habarlama jazyp jatyr ma?
– Saǵat 9 boldy ǵoı.
– Papany kútemiz. Osy kezde sheshem sózge aralasty.
– Ákeń mektepke jınalysqa ketken. Tym shydamaı jatsań, tońazytqyshtan birdeńe talǵajaý ete tur.
– Qaıdan bilesińder, jınalys túngi on ekide bitetin shyǵar, – dedim men qısyq sóıleıtin ádetimmen. Kóp kúttirmeı-aq, «kempirim, as-sýyń daıyn ba edi?» dep sheshemniń muǵalim shalynyń da tóbesi kórindi ǵoı...
Bylaı qarasaq, baıqalmaıdy da ǵoı. Qazaq áıeli ejelden úı ıesin aldynda ustap, kótermelep otyrǵan. Qarap otyrsam, ekeýiniń renjisýi de, tatýlasýy da tez. Odan bólek, joǵary synyptarda meniń esimde qalǵany «ákeńniń kóılekterin ótektep qoı», «aıaqkıimin shótkele», «syrt kıimi men qulaqshynyn tazala, joǵaryǵa qoı» sııaqty sózder edi.
Búginde bul tirlikti úıdiń kenjesi, kishi ul minsiz atqaryp júr eken.
Sheshemniń erdi syılaý, áke qurmetteýdi aıtyp emes, kórsetip úıretkeniniń ózi ǵajap. Onyń da erligi osynda jatyr eken-aý...
Erjan QOJAS