Atyraý oblysynda kóktemgi sý tasqynynan 25,6 shaqyrym jol men 6 kópir búlingen. Qazir jóndeý jumysy júrip jatyr.
Oblystyq jolaýshylar kóligi jáne avtomobıl joldary basqarmasynyń bas mamany Nuraly Ábıshannyń aıtýynsha, Oıyl, Jem jáne Jaıyq ózenderi erneýinen asqan sý jaıylmaǵa jaıylǵan. Sol kezde Qyzylqoǵa, Jylyoı, Inder, Mahambet aýdandary men Atyraý qalasynda jol men kópirlerge zaqym kelgen.
«Sý tasqyny kezinde búlingen joldyń uzyndyǵy 25,4 shaqyrymdy quraıdy. Jol boıyndaǵy 6 kópir jaramsyz bolyp qaldy. Jyl sońyna deıin jol men kópirlerdi qalpyna keltirý jumystary aıaqtalady», deıdi N.Ábıshan.
Onyń aıtýyna qaraǵanda, jóndeý jumystaryn júrgizý kezinde sý basqan ýchaskelerge qosymsha sý ótkizgish qubyrlaryn salý kózdelip otyr. Biraq jóndeý jumystary bastalǵanymen, Atyraý – Inder baǵytyndaǵy avtomobıl jolynda kólik qozǵalysyna shekteý qoıylǵan joq.
«Tasjoldyń júrýge jaramsyz aýmaǵyna aınalma jol salyndy. Qazir atalǵan trassadaǵy 44 shaqyrym joldyń jıegi men 3 shaqyrym jol jabyndysy qalypqa keltirilip jatyr. Bul jumysqa 17 tehnıka bólinip, 24 jumysshy tartyldy. Atalǵan jumystardy «Atyraý joldary», «Qazaqdorstroı» JShS júrgizýdi qolǵa aldy», dep málimdedi ol.
Atyraý oblystyq jolaýshylar kóligi jáne avtomobıl joldary basqarmasy baspasóz qyzmetiniń málimetinshe, bul joldyń qoldanysqa berilgenine 10 jyl bolǵan. Oblystyq mańyzy bar tasjoldyń uzyndyǵy – 174 shaqyrym. Atyraý qalasynan Mahambet aýdanynyń aýmaǵymen ótip, Inderbor kentine deıin barady.
Al Inderbor – Inder aýdanynyń ortalyǵy. Bul kentke deıin jol boıynda 10 eldi meken ornalasqan. Eldi mekenderdiń beseýi Mahambet aýdanynyń aýmaǵyna qaraıdy. Taǵy bes aýyl Inder aýdanynyń ákimshilik bólinisine kiredi.
«Bizdiń sharýa qojalyǵymyz Mahambet aýdanyndaǵy Aqjaıyq aýyldyq okrýginde tirkelgen. Sol aýyldyq okrýgtiń aýmaǵynda egin salamyz. Mal ósiremiz. Buryn jaz, kúz aılarynda ósirgen kókónis, baqsha daqyldaryn Atyraý qalasyna jetkizý úshin Jaıyq ózeniniń kelesi jaǵalaýyna qaıyqpen tasymaldap júrdik. Sodan soń ózen jaǵasynda turǵan kóligimizge tıeımiz. Al myna jolǵa kúrdeli jóndeý júrgizilip, 2014 jyly paıdalanýǵa berilgen soń álgindeı mashaqattan qutyldyq. О́ıtkeni bul jolmen Atyraý qalasyna tike jetýge bolady», deıdi «Dastan» sharýa qojalyǵynyń jetekshisi Qonys Ermanov.
Munaıly shahardan Inderbor kentine deıin qatynaıtyn jolǵa on jyl burynǵy kúrdeli jóndeýdi «Atyraýınjstroı» JShS júrgizgen. Keıin atalǵan seriktestik Jaıyq ózeniniń ústinen kópir qurylysyn júrgizýge merdiger retinde tańdaldy. Bul kópirdiń júk kóterý qýaty 180 tonnaǵa eseptelgen. Onyń uzyndyǵy – 860, eni – 13 metr. Kópirge kóteriletin joldyń jalpy uzyndyǵy 8,5 shaqyrymdy quraıdy. Bul kópirdiń Jaıyq ózeniniń oń jaǵalaýyndaǵy tarmaǵy Mahambet aýylynyń tusynda Atyraý – Oral respýblıkalyq trassasyna qosylady. Kólikter sol jaǵalaýdaǵy bóligimen Ortaqshyl aýylynyń mańynda Atyraý – Inder oblystyq mańyzdaǵy jolǵa shyǵady.
«Atyraý – Inder joly 2014 jyly qoldanysqa berilgen edi. Sodan beri kúrdeli jóndeý júrgizilgen joq», dep habarlady basqarmanyń baspasóz qyzmeti.
Jol sapasynyń nasharlaýyna shamadan artyq júk tıep júretin aýyr júk kólikteriniń de áseri tıip otyr. Atyraý oblystyq kóliktik baqylaý ınspeksııasynyń bas mamany Batyrbek Nurbaıulynyń aıtýynsha, júk kólikteriniń júrgizýshileri aýyr júk tasymaldaý talabyn saqtamaıdy.
«Aýyr júk kólikterge 25 tonnaǵa deıin júk tasymaldaýǵa ruqsat etilgen. Eger qosymsha tirkemesi bolsa, barlyq júktiń salmaǵy 40 tonnadan aspaýy qajet. Biraq júk kólikteriniń júrgizýshileri bul talapty saqtamaıdy. Jyljymaly bekettiń kómegimen bir kúnde 6 «KamAZ» kóligindegi júk salmaǵyn ólshedik. Sol kezde júk kólikterinde shekti mólsherden artyq júk tıelgeni anyqtaldy. Qos tirkemesi bar júk kóligindegi artyq júktiń salmaǵy 6 tonnany qurady. Keı kólikter 30 tonnaǵa deıin artyq júk tasyp júr», deıdi Batyrbek Nurbaıuly.
Inspeksııa mamanynyń deregine súıensek, júk kólikteriniń ıelerine «Ákimshilik quqyq buzýshylyq týraly» kodekstiń 571-babynyń 6 jáne 9-tarmaǵymen hattamalar toltyrylǵan. Artyq júk tasymaldaǵan júrgizýshiniń birine 479 myń 960 teńge aıyppul salynǵan.
Inder aýdandyq turǵyn úı, kommýnaldyq sharýashylyq, avtomobıl joldary jáne jolaýshylar kóligi bóliminiń basshysy Shapaǵat Ǵabbasovtyń aıtýyna qaraǵanda, júk kólikteriniń deni karerden ınertti materıaldar tasymaldaıdy. Sol sebepten, kásipkerlerge talap kúsheıtilgeli otyr.
«Kásipkerlerge aýyr júk kólikterine ınertti materıaldar shekti mólsherden artyq tıelmeýi qajet. Buǵan jol bermes úshin kásipkerderdiń ózinde aýyr júk kólikterine tıelgen soń salmaqty ólsheıtin qural bolýy qajet. Osy talapty saqtaý jóninde kásipkerlerge túsinik jumystary júrgizilip keledi. Biraq olar bul talapty tıisti deńgeıde oryndamaı otyr. Sondyqtan aldaǵy ýaqytta reıdtik is-sharany udaıy ótkizemiz», dedi Sh.Ǵabbasov.
Atyraý oblysy