«Otbasy bank» AQ Atyraý oblystyq fılıaly óńirde alǵash ret jergilikti turǵyndarǵa arnalǵan ashyq esik kúnin ótkizdi. Mundaǵy basty maqsat – «Naýryz» baǵdarlamasy boıynsha jeńildetilgen zaem alýǵa bankten maquldaý alǵan turǵyndarǵa úı tańdaý boıynsha jáne tólem qabilettigin rastaý jóninde túsindirme jumystaryn júrgizý, dep jazady Egemen.kz.
Sharaǵa 4 qurylys kompanııasy qatysyp, kelýshilerge óz turǵyn úıleriniń artyqshylyqtaryn tanystyrdy. Sondaı-aq óz nysandaryna jeńildikter usynyp, túrli utys oıyndaryn oınatty. Ashyq esik kúnine arnaıy kelgen 200-den astam adam turǵyn úılerdi rásimdeý boıynsha qundy aqparattar aldy.
Uıymdastyrýshylardyń sózinshe, «Naýryz» baǵdarlamasyna qatysyp, qyzyǵýshylyq bildirgender sany kóp. Solardyń biri − Araılym Izbasarova. 34 jastaǵy Atyraý qalasynyń turǵyny «Naýryz» baǵdarlamasynyń irikteýinen ótip, banktiń oń maquldaýyn alǵan. Búgin ol da kópshilikpen birge ózine unamdy úı tańdaýǵa kelgen eken.
«Biz osy «Naýryz» baǵdarlamasyna qujat tapsyrdyq. «Naýryz» baǵdarlamasy ashylǵannan keıin, baǵymyzdy synap kóreıik dep qujat tapsyrdyq. Qazaqstan boıynsha 38000 adam ótinish berse, onyń tek 12 myńy ǵana irikteýden ótken. Sonyń ishinde biz bes myńynshy bolyp turmyz. О́te qýanyshtymyn. «Otbasy bank» AQ ujymyna alǵysymdy bildiremin», dedi ol.
Baǵy janyp, baspanaly bolýǵa múmkindik alǵan taǵy bir turǵyn Gúlim Amanjolova, bankten depozıt ashyp, ony kóp jyldan beri úzdiksiz jınaǵanyn aıtady. Kelinshek sol salymynyń arqasynda baǵdarlamaǵa qatysyp, alǵashqy jarnaǵa aýdaratyn qarajaty jetkilikti bolyp, irikteýden ótken.
«Otbasy banktiń» 2017 jyldan beri salymshysymyn. Osyndaı baǵdarlama shyǵyp, qatystym. О́te tıimdi baǵdarlama. Qujattardy jınaqtap, kelisimin aldyq. Endi biz úı tańdaý ústindemiz. Búgingi ashyq esik kúni jaqsy ótýde. Jaqsy bastaldy. Jaqsy tanystyryldy. Halyqqa jaqsylap jetkizý maqsatynda osynda ashyq esik kúnderi kóp bolsa eken deımiz», dedi salymshy.
Bıyl «Naýryz» baǵdarlamasyna ótinimderdi qabyldaý 1 mamyrdan bastaldy. Baǵdarlamaǵa qatysý úshin Atyraý oblysynan 1200 -ge jýyq turǵyn ótinish bergen. Joba aıasynda 420 adam maquldaý alypty. Bank ókilderi 2025 jyldan bastap ótinimderdi qabyldaý naýryz aıynda bastalatynyn habarlady.
«Búgin «Otbasy bank» AQ Atyraý oblystyq fılıaly barlyq qurylys kompanııalaryn banktiń bólimshesine jınap, ashyq esik kúnin ótkizýdemiz. Negizgi maqsatymyz – «Naýryz» baǵdarlamasyna ótken salymshylarymyz óz úılerin bir jerge kelip tańdasyn degen nıetpen jınap jatyrmyz», dedi «Otbasy bank» AQ Atyraý oblystyq fılıalynyń bıznesti damytý bóliminiń basshysy Danııar Taıshekenov.
Jańa joba − jańa múmkindik
«Naýryz» baǵdarlamasy 7% (JTSM 7,3%-dan 8,9% deıin) - 9 % (JTSM 9,3%-dan 11,8% deıin) mólsherlememen iske qosylǵan jańa ıpoteka. Baǵdarlamaǵa úı kezeginde turǵan halyqtyń áleýmettik osal toptary, jumys isteıtin jastar, jas otbasylar, turǵyn úı tólemderi qarastyrylmaǵan qyzmetkerler, monoqalalardyń, aýdan ortalyqtary men aýyldyq eldi mekenderdiń turǵyndary qatysa alady. Joba 8 jylǵa arnalǵan. Osy ýaqyt aralyǵynda elimizdiń 68000 azamatyn jeke turǵyn úımen qamtamasyz etý kózdelgen.
Bıylǵy jyldyń ózinde baǵdarlama arqyly 12 myń qazaqstandyq baspanaly bolady dep josparlanǵan. Ony iske asyrýǵa bıyldyqqa 300 mlrd qarajat bólingen. Jańa «Naýryz» ıpotekalyq baǵdarlamasy boıynsha halyqtyń áleýmettik osal toptary jyldyq 7 paıyzben (JTSM 7,3%-dan 8,9% deıin) nesıe ala alady. Atap aıtqanda, I jáne II toptaǵy múgedekter, múgedek balalary bar nemese olardy tárbıelep otyrǵan otbasylar, densaýlyq saqtaý salasyndaǵy ýákiletti organ bekitken aýrýlardyń tizbesinde atalǵan keıbir sozylmaly aýrýlardyń aýyr túrlerimen aýyratyn adamdar, jasy boıynsha zeınetkerler, kámeletke tolǵanǵa deıin ata-anasynan aıyrylǵan 29 jasqa deıingi jetim balalar men ata-anasynyń qamqorlyǵynsyz qalǵan balalar. Mundaı adamdar áskerı qyzmetke shaqyrylǵan kezde jasy mindetti áskerı qyzmet ótkerý merzimine uzartylady; qandastar; ekologııalyq zilzalalar, tabıǵı jáne tehnogendik sıpattaǵy tótenshe jaǵdaılar saldarynan baspanasynan aıyrylǵan adamdar; «Altyn alqa», «Kúmis alqamen» marapattalǵan nemese buryn «Batyr ana» ataǵyn alǵan kópbalaly analar, sondaı-aq I jáne II dárejeli «Ana dańqy» ordenderimen marapattalǵandar, kópbalaly otbasylar; memlekettik nemese qoǵamdyq mindetterdi, áskerı qyzmetti oryndaý kezinde, ǵarysh keńistigine ushýǵa daıyndyq nemese ushýdy oryndaý kezinde, adam ómirin qutqarý kezinde, quqyqtyq tártipti qamtamasyz etý kezinde qaza tapqan (qaıtys bolǵan) adamdardyń otbasylary; tolyq emes otbasylar. Al bulardyn qataryna kirmeıtinder 9 paıyzben (JTSM 9,3%-dan 11,8% deıin) nesıe alady. Baǵdarlamaǵa qatysý úshin «Otbasy bankinde» depozıt shoty ashylýy kerek, biraq salym merzimi eskerilmeıdi. Jınaq shotynda kemi 1 mln teńge kóleminde qarajat bolýy tıis deıdi uıymdastyrýshylar. Eń bastysy qatysýshynyń sońǵy 5 jylda atynda úıi bolmaýy tıis.
Sonymen qatar bul baǵdarlamaǵa stýdentter de qatysý múmkindigine ıe. Olardyń stıpendııasynyń mólsheri eskeriledi. Qaryzdyń eń joǵary somasy 30 mıllıon teńgeni quraıdy. Sondaı-aq bir nesıe aıasynda azamattar satyp alatyn úıdi jóndeı alady. Buǵan da kredıt qarastyrylǵan, ol nesıeniń jalpy somasynyń 20% - nan aspaýǵa tıis. Bank ókilderiniń aıtýynsha, baǵdarlama baspana alamyn deýshilerge úlken múmkindik. «Otbasy bank» ókilderiniń sózinshe mundaı ashyq esik kúni aldaǵy ýaqytta jalǵasyn tappaq.
Aqmaral BISEMBAEVA