«Egemen Qazaqstan» gazeti bilim salasyndaǵy kóp ıgi istiń uıytqysy bolyp keledi. Bas basylymnyń belsendi avtorlary men jazylýshylarynyń arasynda da pedagogter qatary qalyń ekeni atap ótýge turarlyq. Osy rette qoǵamnyń qozǵaýshy kúshi sanalatyn ustazdar qaýymyna jáne oqyrmandarymyzǵa súıinshi jańalyqty jetkizbekpiz.
Oqý-aǵartý mınıstrligi pedagogıka salasyndaǵy súbeli maqalalardy jarııalaýǵa usynylatyn basylymdar tizimine «Qazaq gazetteri» seriktestigine qarasty gazet-jýrnaldardyń da engizilgenin habarlady. Atalǵan tizim mınıstrlikke qarasty Y.Altynsarın atyndaǵy Ulttyq bilim akademııasynyń saıtynda jarııalandy.
Bul – Oqý-aǵartý mınıstrligi Orta bilim berý komıtetiniń 2024 jylǵy 20 mamyrdaǵy №20-1-20-7/3360-I hatyna sáıkes bekitilgen basylymdar tizbegi. Mine, sol tizimge «Qazaq gazetteriniń» quramyna kiretin «Baldyrǵan», «Aqjelken» jýrnaldary men «Ana tili» «Ulan», «Drýjnye rebıata» gazetteri qosyldy. Endi pedagogter óziniń biliktiligin arttyrýǵa sep bolar úzdik jumystaryn, tájirıbesin, maqalasyn joǵaryda atalǵan basylymdarda da jarııalaı alady.
Ulttyń mańdaıaldy ǵalymdary men aqyn-jazýshylaryn jas kúninde shyǵarmashylyqqa baýlyǵan tarıhı gazet-jýrnaldarymyz aldaǵy jyldary tizimniń basynan oryn alady dep senemiz. Sonymen qatar bas basylym – «Egemen Qazaqstan» gazetiniń de bilim salasyndaǵy túıtkildi taqyryptardy udaıy kóterip, oń sheshimin tabýǵa atsalysyp, jetistikter men ıgi isterdi, jaǵymdy jańalyqtardy qalyń oqyrmanǵa jetkizýde mańyzdy oryn alatyny belgili.