Birneshe aıdan beri Atyraý oblysyndaǵy Qulsary qalasynda sý tasqynynan búlingen nysandar qalpyna keltirilip jatyr. Munda Jem ózeniniń arnasynan asqan tasqyn sý saldarynan turǵyn úıler men áleýmettik nysandar búlingeni belgili.
Atyraý oblysy ákimi baspasóz qyzmetiniń málimetinshe, sý tasqynynan 5 bilim ordasynyń, 3 balabaqsha men 1 saz mektebiniń búlingeni anyqtalǵan. Tehnıkalyq zerdeleý júrgizýden soń, 3 ǵımarat jaramsyz dep tanyldy. Onyń biri – «Saltanat» balabaqshasy. Ekeýi – 1963, 1975 jyldary salynǵan mektep ǵımaraty.
Al ózge nysandarda kúrdeli jáne ortasha jóndeý qolǵa alynǵan. Jumys qarqyny qandaı? Oblys ákimi Serik Shápkenov Qulsary qalasyndaǵy sý tasqynynan búlingen nysandardy qalpyna keltirý jumysyn tekserip, merdiger mekemelerge qolǵa alǵan isti jedeldetýdi tapsyrdy.
«Qulsary qalasynda 18 kóshedegi uzyndyǵy 12,1 shaqyrym joldy qaıta jańartý kózdeldi. Joba quny – 2 mlrd 390 mln 289 myń teńge. Osy kezge deıin «Kazkomservıs» JShS 6,8 shaqyrym jolǵa jóndeý júrgizdi. Bul jumysty jyl sońynda aıaqtaý josparlanyp otyr», dep habarlady ákimdiktiń baspasóz qyzmeti.
Qazir Qulsarydaǵy №8 orta mektep pen «О́rken» balabaqshasynda jóndeý jumysy bekitilgen kestege saı júrip jatyr. Bul nysandar qyrkúıekke deıin paıdalanýǵa beriledi. Tasqyn sýdan zardap shekkenderge «Bolashaq» shaǵyn aýdanynda 100 turǵyn úıdiń qurylysy júrgizilip jatyr. Bul jumysty atqarýǵa jergilikti 8 qurylys kompanııasy tartyldy. Qurylysshylar 94 úıdiń qabyrǵasyn qalap, 85 úıdiń shatyryn jabýdy aıaqtapty. Jańadan salynyp jatqan 60 úıge sylaq, 42 úıge árleý jumystary qolǵa alynǵan. Al 62 úıge tereze ornatylǵan. Shaǵyn aýdanda ınjenerlik ınfraqurylym jelilerin júrgizý aıaqtalyp keledi.
«Qıyn kezeń artta qaldy. Bizdiń mindetimiz – qalpyna keltirý jumystaryn ýaqtyly atqaryp, turǵyndardyń ómir súrý sapasyn jaqsartý. Júz otbasy jańa baspanaǵa kóshýdi, qonys toıyn jasaýdy asyǵa kútip otyr. Ýaqyt az, biraq úısiz qalǵan turǵyndardyń jaǵdaıyn oılaǵanymyz jón. Sondyqtan turǵyn úı qurylysyn júrgizýdi jedeldetip, baqylaýdy kúsheıtý qajet. Aldaǵy 1 qyrkúıekke deıin turǵyndardyń ıgiligine 80, 5 qyrkúıekte 20 baspana tapsyrýymyz kerek», dedi Serik Shápkenov.
Ákimniń aıtýynsha, jańa shaǵyn aýdanǵa tasjol tóseýdi keshiktirmeı bastaý qajet. Sondaı-aq Binom mektebi men oqýshylar saraıyn salýǵa daıyndyqty jedeldetken jón.
Qulsary qalasyndaǵy turǵyndardy alańdatatyn taǵy bir másele bar. Bul – taza aýyzsý sapasy. Osyǵan oraı sý tazartý qurylǵylaryn jańǵyrtý máselesi qozǵalyp otyr.
О́ıtkeni Jylyoı aýdanynyń ortalyǵy – Qulsary qalasyna aýyz sý «Astrahan – Mańǵyshlaq» magıstraldyq qubyrmen jetkiziledi. Qubyrmen jetken tirshilik nárine «Magıstraldyq sý qubyry» JShS stansasynda tazartý júrgiziledi. Al turǵyndarǵa taza aýyz sý «Jylyoısý» KMK arqyly beriledi.
Reseıdiń Astrahan oblysymen shekaradaǵy Qıǵash ózenindegi sýdyń sapasyna baılanysty túrli syltaý aıtylady. Máselen, «Magıstraldyq sý qubyry» JShS dırektorynyń mindetin atqarýshy Erkin Tańqybaevtyń aıtýynsha, kóktemde sý sapasy ózgergen. Oǵan Qıǵash ózeni tasyp, «Astrahan – Mańǵyshlaq» qubyrymen jetkizilgen sýdyń shamadan tys laılanǵany sebep bolǵan. Aýyzsý sapasyna sý qubyrynyń boıynda jańa ýchaskeniń paıdalanýǵa berilýi de áser etken.
«Qazir bizdiń mekemede 7 rezervýar bar. Onyń beseýi jumys istep tur. Bireýi jóndeýge qoıyldy. Jańadan bir rezervýar salynyp jatyr. Sý birneshe ret tazartylady. Keıin hlor qosylady. Qıǵash ózenindegi qorshaý ornynda tazartý júrgizilip, sý sapasy jaqsaryp keledi. Kún saıyn sý qubyrynan synama alyp, sapasyn baqylap otyrmyz», deıdi Erkin Tańqybaev.
Al «Jylyoısý» KMK dırektorynyń mindetin atqarýshy Batyr Keıkinniń aıtýyna qaraǵanda, Qulsary qalasyndaǵy sý saqtaıtyn rezervýarlar tazartylyp, dezınfeksııalanady. Sondaı-aq sýmen jabdyqtaý jelilerin jýý jumysy atqaryldy. Alaıda oblys ákimi S.Shápkenovtiń pikirinshe, turǵyndardy taza aýyzsýmen qamtý máselesinde salǵyrttyq bar. Ásirese Qulsary qalasyndaǵy kópqabatty úılerdi sýmen jabdyqtaý júıesi tazartylmaı keledi.
«Bıyl kóktemde Qıǵash ózeninde sý deńgeıi kóterilgen joq. Demek másele jumystyń júıesizdiginde. Mamyrda turǵyndardy taza aýyzsýmen qamtý máselesin jaqsartýdy mindettegen edim. Biraq eshqandaı nátıje kórip turǵan joqpyn. Bul – salǵyrttyqtyń saldarynan týyndaǵan ári keshirilmeıtin másele. Aýyzsýdyń sapasy turǵyndardyń densaýlyǵyna áser etetini eskerilmeıdi. Endi qysqa merzimde zamanaýı tehnologııalardy paıdalanyp, sý tazartý qurylǵylaryn qaıta qurý jobasyn ázirleý kerek», dep málimdedi S.Shápkenov.
Atyraý oblysy