Elimizdegi monoqalalardyń biri – Sátbaev qalasyna ekonomıkany ártaraptandyrý aýadaı qajet. Jańa óndiris oryndaryn ashýdyń da oraıy ońaılyqpen kele qoımaıdy. О́ńirdegi logıstıkalyq túıtkil shaǵyn qalaǵa qaltalylardyń kelýine qolbaılaý jasap tur. Degenmen jergilikti bılik múmkindikti múlt jibermese, ınvestordy da ıildirýge bolady eken. Jýyrda qala ákimdigi men qytaılyq «Stecol Sorporation» jáne otandyq «Siena» JShS arasynda yntymaqtastyq týraly memorandýmǵa qol qoıyldy.
Qala ákimi Murat Bóribaevpen birge memorandýmǵa «Stecol Sorporation» jetekshisi Iаng Honveı jáne «Siena» kompanııasynyń dırektory Rýslan Sharıpov qol qoıdy. Ákim qyzmetine shilde aıynyń bas kezinde taǵaıyndalǵan Murat Bóribaev qala bıýdjeti nebári 11 mlrd teńge ekenin aıtyp, qazynany toltyrý basty mindet degen edi. Jańa basshylyq is oraıyn tapqan sekildi. Talaı jyl jyrǵa aınalǵan «Jezqazǵan – Qyzylorda» kólik jolynyń kúrdeli jóndeýi aqyry bastalatyn boldy. 8 lotqa bólingen jumysty qytaılyq 4 kompanııa jeńip aldy. «Stecol Sorporation» – sol 4 kompanııanyń biri. Al «Siena» – Qytaıdyń osy kompanııasymen birneshe jyldan beri seriktes bolyp kele jatqan otandyq kompanııa.
Jol salýǵa qum da, qıyrshyq tas ta kerek. Sátin salǵanda, Sátbaev qalasynyń aýmaǵynda osynyń bári de tabylady. Qala ákimi dereý «Stecol Sorporation» kompanııasynyń basshylyǵyna habarlasady. «Jol qurylysyna qajetti materıaldardy bizden alady ekensizder, endeshe nege ekijaqty tıimdi jumys istemeske? Sizder bizdiń qalaǵa tirkelińizder, salatyn zaýyttaryńyzǵa tıisti jer bólip berýge ázirmiz» degen ákimniń usynysy kompanııanyń da kóńilinen shyǵa keldi. Sóıtip, «Stecol Sorporation» óziniń senimdi seriktesi «Siena» kompanııasymen birge Sátbaev qalasyna keldi.
«Bizdiń tarapymyzdan qytaılyq «Stecol Sorporation» kompanııasyna qyzyǵýshylyq tanytýymyz beker emes. О́ıtkeni bul kompanııa – Qytaı elindegi ataqty «China Power» memlekettik korporasııasynyń enshiles qurylymy. Kompanııa elimizde jumys istegen úsh jyl ishinde ózin senimdi jáne jaýapty seriktes retinde kórsete bildi. Al «Siena» – otandyq qurylys naryǵynda orny bar, aldyńǵy sanatty kompanııa. Olar jol qurylysyna qajetti materıaldardy jetkizýmen aınalysady. Qosalqy merdiger retinde jóndeý jumystaryna da tikeleı aralasady. Sondyqtan birimen-biri baılanysty qos kompanııany birge jumys isteýge shaqyrdyq. Usynysymyzdy qabyl alǵany úshin atalǵan kompanııa basshylaryna qala halqynyń rızashylyǵyn jetkizgim keledi», deıdi Murat Bóribaev.
Kompanııalardyń qalaǵa kelip tirkelýi salyq túsimin molaıtyp qana qoımaı, jańa jumys oryndarynyń ashylýyna túrtki bolady. Qanysh qalasyna kelgen qos ınvestor qalada asfalt-bıtým zaýytyn turǵyzady. Munda kem degende jańa 30 jumys orny ashylady. Sonymen birge syıymdylyǵy 0-15 myń tonna bolatyn bıtým qoımasyn salady.
«Jol qurylysyna jaqyn jerden zaýyt pen qoıma salý óte paıdaly. Bul óz kezeginde tasymal shyǵyndaryn azaıtady. Sonymen qatar qurylystyń neǵurlym jedel júrgizilýine de yqpalyn tıgizedi. Zaýytqa qajetti shıkizattardy da qolsozym jerden alamyz. Sátbaev qalasy basshylyǵynyń usynysyna kóp oılanbastan kelisim bergenimiz de sondyqtan», dedi memorandýmǵa qol qoıý saltanaty kezinde sóz alǵan ınvestorlar.
Bir súısinerligi, ınvestorlar qalanyń áleýmettik-mádenı ómirine, ınfraqurylymyna, keskin-kelbetine óz úlesterin qosýǵa nıetti. Aıtalyq, kompanııalar qala kósheleriniń jolyn jóndeýden ótkizýge, demalys aımaqtaryn jáne balalar oıyn alańdaryn salýǵa da qatysyp, qarjy quıýdy kózdep otyr. «Biz osylaısha qalada qoltańbamyzdy qaldyrǵymyz keledi» deıdi.
Qos birdeı ınvestordyń kelýi Sátbaev qalasynyń ekonomıkasyn damytýǵa oıdaǵydaı oń áserin tıgizetini kúmánsiz.
Ulytaý oblysy,
Sátbaev qalasy