Bilim kúni merekesine oraı elimizdegi alǵashqy «Jaıly mektepter» ashyldy. 1 qyrkúıekte paıdalanýǵa berilgen sondaı oqý oshaǵynyń saltanatty ashylýyna Premer-mınıstrdiń birinshi orynbasary Roman Sklıar, vıse-premer Tamara Dúısenova bastaǵan Úkimet músheleri, Oqý-aǵartý mınıstri Ǵanı Beısembaev qatysty.
«Jaıly mektep» ulttyq jobasymen salynǵan elordadaǵy №103 mektepte mınıstr Ǵ.Beısembaev bilim salasy qyzmetkerlerin, ata-analar men oqýshylardy jańa oqý jylynyń bastalýymen quttyqtady.
– Qadirli ustazdar, ata-analar jáne oqýshylar! Búgin 2024-2025 oqý jylynyń jańa paraǵy ashyldy. Elimizdiń barlyq óńirinde Bilim kúnin asyǵa kútken 3,9 mln bala súıikti mektebimen, ustazdarymen qaıta qaýyshty. Memleket oqýshylardyń sapaly bilim, sanaly tárbıe alýy úshin barlyq jaǵdaıdy jasap jatyr. Búgin 90 myńǵa jýyq oqýshy sý jańa mektepterde oqý jylyn bastaıdy. Onyń ishinde «Jaıly mektep» ulttyq jobasymen salynǵany da bar. Al 200 myńnan asa bala kúrdeli jóndeýden ótip, qaıta jabdyqtalǵan mektepterde bilim alady.
1 qyrkúıek – alǵash ret mektep tabaldyryǵyn attaǵan balalar úshin erekshe mereke. Qymbatty balalar, oqý jyly senderdi jańa jetistikterge jetelep shabyttandyratyn qyzyqty, tanymdy ári taǵylymdy bolsyn dep tileımin! Dál osy kúni ustazdardyń óskeleń urpaqqa bilim men tárbıe berýdegi orasan eńbegin de atap ótkim keledi. Ultymyzdyń aǵartýshy uly tulǵasy Ahmet Baıtursynuly «Ustaz – ult kelbeti» dep beker aıtpasa kerek. Sondyqtan aǵartýshylyq mıssııasyn adal atqaryp júrgen ustazdardyń eńbegi laıyqty túrde joǵary baǵalanýǵa tıis. Qurmetti áriptester, óz mamandyqtaryńyzǵa adaldyqtaryńyz, urpaq isindegi jankeshti eńbekterińiz úshin alǵysymdy bildiremin. Sizder balalarǵa bilim berip qana qoımaı, olarǵa halqymyzdyń basty qundylyqtaryn sińirip kelesizder. Bıylǵy oqý jyly joǵary jetistikter men tolaǵaı tabystarǵa toly bolsyn! – dedi Ǵ.Beısembaev.
Jalpy, jańa oqý jylynda elimizde 90 myńǵa jýyq oqýshy jańa 70 mektep esigin aıqara ashty. Onyń ishinde 16 oqý oshaǵy – «Jaıly mektep». Osy 16 «Jaıly mekteptiń» 9-y Astanada ornalasqan. Al 200 myńnan asa bala kúrdeli jóndeýden ótip, qaıta jabdyqtalǵan mektepterde bilim alady. Eske salsaq, 2023–2025 jyldarǵa arnalǵan «Jaıly mektep» ulttyq jobasy aıasynda 401 mektep salý josparlanǵan. Mınıstrliktiń taratqan aqparatyna súıensek, bul joba oqýshy ornynyń jetispeýshiligin sheshýge, qala men aýyl mektepteri arasyndaǵy alshaqtyqty azaıtýǵa baǵyttalǵan. Jobada fýnksıonaldy jáne qaýipsiz bilim berý ortasyn qurýǵa erekshe nazar aýdarylady. Bastaýysh jáne joǵarǵy synyp oqýshylary úshin bólek bloktar qarastyrylǵan. Sondaı-aq tehnıkalyq quraldardy engizý arqyly qaýipsizdik sharalaryn arttyrý, erekshe bilim berýdi qajet etetin balalar úshin kedergisiz orta qalyptastyrý, mektepti zamanaýı pándik kabınettermen jabdyqtaý talap etiledi. 2024–2025 oqý jylynda barlyǵy 217 nysannyń qurylysy júrip jatyr.
Jalpy otandyq mektepterde 3,9 mln oqýshy bilim alady. Bıyl 352 myń bala alǵash ret mektep tabaldyryǵyn attady, al 219 myń oqýshy 11-synypqa kóshti.