Májilis spıkeri Erlan Qoshanovtyń tóraǵalyǵymen Palatanyń bıýro otyrysy ótti. Onda 4 qyrkúıekte ótetin VIII shaqyrylymdaǵy úshinshi sessııasynyń birinshi jalpy otyrysynyń kún tártibi bekitildi.
Aldaǵy sársenbide Májilistegi Qarjy jáne bıýdjet komıteti Qazaqstan Respýblıkasynyń jańa Salyq kodeksiniń jobasyn jumysqa qabyldaıdy. Bul týraly Palatanyń bıýro otyrysynda belgili boldy.
Zań jobasynda depýtattar Memleket basshysynyń Joldaýynda aıtylǵan salyqtyq ákimshilendirýdi jáne salyq rejimderin ońtaılandyrýǵa, salyqtyq jeńildikterdi qaıta qaraýǵa jáne taǵy da basqa da bastamalardy iske asyrýǵa tıis. Onymen birge komıtet Qazaqstan Respýblıkasynyń keıbir zańnamalyq aktilerine salyq salý máseleleri týraly ilespe túzetýler boıynsha qorytyndy shyǵarýy kerek.
Sonymen qatar birinshi oqylymda Prezıdenttiń tapsyrmasy negizinde ázirlengen ilespe túzetýlermen «Tutynýshylardyń quqyqtaryn qorǵaý týraly» Zańnyń jańa jobasy qaralady. Zań jobasynda tutynýshylardyń quqyqtaryn qorǵaý máseleleri boıynsha ombýdsman ınstıtýtyn engizý, onlaın-saýdada tutynýshylardyń quqyqtaryn qorǵaýdy kúsheıtý jáne basqa da birqatar norma qarastyrylǵan.
Májiliske Qazaqstan Respýblıkasynyń Ulttyq qorynan 2025-2027 jyldarǵa arnalǵan kepildendirilgen transfert týraly, 2025-2027 jyldarǵa arnalǵan respýblıkalyq bıýdjet týraly zań jobalary jáne Astana men respýblıkalyq mańyzy bar qalalardy damytý máseleleri boıynsha zań jobalary túsedi.
Budan basqa, Palata jumysyna Eýrazııalyq ekonomıkalyq odaq elderi men Sıngapýr arasyndaǵy erkin saýda týraly kelisimdi jáne oǵan jan-jaqty ekonomıkalyq yntymaqtastyq týraly negizdemelik kelisimdi, Qazaqstan men Qatar Úkimetteri arasyndaǵy basym salalardaǵy jobalardy damytý úshin uzaq merzimdi strategııalyq áriptestik ornatý týraly kelisimdi, sondaı-aq zaǵıptardyń jáne kórý qabileti buzylǵan nemese baspa aqparatyn qabyldaýǵa ózge de qabiletteri shekteýli adamdardyń jarııalanǵan týyndylarǵa qol jetkizýin jeńildetý týraly Marrakesh shartyn ratıfıkasııalaý týraly zań jobalary kelip túsedi.