Batys Qazaqstan oblysynyń Qaztalov aýdanyna qarasty Saraljyn aýylynda 60 oryndyq jańa mektep ashyldy. Shalǵaıdaǵy shaǵyn aýyldyń balalary jańa oqý jylyn jańa ǵımaratta bastady.
Aýyl halqynyń kópten kútken qýanyshyna oblys ákiminiń orynbasary Qaıyrjan Meńdiǵalıev, aýdan ákimi Aslanbek Sarqulov qatysty.
– Barshańyzdy Bilim kúnimen birge kelgen zor qýanysh, mynadaı keremet mekteptiń ashylýymen quttyqtaımyn! Bul – memleketimizdiń sizderge, aýylda otyrǵan qaısar halyqqa, aýylda týyp, aýylda ósip kele jatqan baldyrǵandarǵa tartýy. Osy jyly Prezıdent tapsyrmasymen oblysymyzda 11 mektep salynsa, sonyń biri – osy ǵımarat. Bul mektepti «KPO B.V.» kompanııasy oblys aldyndaǵy áleýmettik mindettemeleri aıasynda salyp berip otyr, – dedi Qaıyrjan Meńdiǵalıev.
Jańa mekteptiń ashylý saltanatyn aýyl turǵyndarymen birge erekshe kútken jannyń biri – ardager ustaz, Qazaqstan Jazýshylar odaǵynyń múshesi, halyqaralyq «Alash» syılyǵynyń laýreaty Darıǵa Mushtanova bolatyn. О́ıtkeni búginde «Parasat» ordeniniń ıegeri, «Qaztalov aýdanynyń qurmetti azamaty» atanǵan aqyn dál osy jerde dúnıege kelgen. Týǵan aýylyndaǵy toıǵa aqyn da arnaıy bardy.
«Aýylym – ata qonys, qut mekenim,
Babalar aıtyp ketken qutty ekenin.
Qııaǵa qanat qaǵyp perzentteri,
Tanytqan topyraǵynyń myqty ekenin!» dep jyrlaǵan aqynnyń atyna jańa mektepte arnaıy synyp ashylypty. Shaǵyn aýyl mektebinen buryn da ónerli órender, sahna sheberleri kóp shyqqan eken. Al aqyn atyndaǵy jańa synypta dombyra, kórkemsóz oqýshylar úıirmesi ashylmaq.
Kókterek aýyldyq okrýgine qarasty Saraljyn aýylynda nebári 60-qa jýyq úı, 265 turǵyn turady. Aýylǵa tabıǵı gaz tartylǵan. О́ńirde qolǵa alynǵan «Qaladan – aýylǵa» baǵdarlamasy aıasynda munda eki páterli sý jańa úı salynyp jatyr. Ol da jaqyn arada paıdalanýǵa berilmek.
– Keńes odaǵynyń batyry Májıt Júnisov atyndaǵy negizgi mekteptiń kóne ǵımaraty 1989 jyly salynǵan edi. Ol endi kitaphana men feldsherlik-akýsherlik pýnktke beriledi. Sý jańa oqý kabınetterimen jabdyqtalǵan jańa mekteptiń jalpy quny – 750 mln teńge. Onyń aýlasynda shaǵyn fýtbol alańy, basketbol, júgirý jolaǵy, demalys múıisteri bar, – deıdi aýdan ákiminiń orynbasary Serik Qaıyrlıev.
«Aýylymyzdyń óńi kirip, ekinshi tynysy ashylǵandaı boldy. Shirkin, endi uıaly baılanys ornap, aýdan, okrýg ortalyǵyna jalǵaıtyn jolymyz jóndelse», deıdi saraljyndyqtar.
Batys Qazaqstan oblysy