Memleket basshysy Qasym-Jomart Toqaevtyń Joldaýynda 2025 jylǵa deıin 800 myń balanyń zamanaýı mektepte oqýyna jaǵdaı jasalatyny aıtylǵan. Bul bastamanyń júzege asyrylyp jatqanyna kúni keshegi Bilim kúninde óńir jurtshylyǵy kýá boldy. Túrkistan oblysynda qazirgi tańda qurylysy júrgizilip jatqan 49 mekteptiń 42-si bıyl paıdalanýǵa beriledi. Onyń alǵashqylary Bilim kúninde ashyldy.
Mysaly, Saryaǵash aýdanynda 300 oryndyq Baqybek mektebi, al Derbisek eldi mekeninde 350 oryndyq mektep el ıgiligine paıdalanýǵa berildi. Oqýshylardyń bilim alýyna qolaıly jaǵdaı jasalǵan 350 oryndyq mektepte 52 aýyl turǵyny turaqty jumyspen qamtamasyz etildi. Jeke kásipker Serik Narbaevtyń esebinen salynǵan zııatkerlik mektepte sýyq sý, jylý jáne sanıtarlyq baılanys qubyrlary ortalyqtandyrylǵan. Bilim uıasynda kitaphana, barlyq pán kabıneti tolyqtaı zamanaýı qural-jabdyqtarmen jáne ınteraktıvti taqtamen jabdyqtalǵan. Sport zaly, ashana jáne medısınalyq bólmesi bar. Árbir bólme arnaıy qural-jabdyqtarmen, jıhazdarmen jabdyqtalyp, syrtqy jáne ishki beınebaqylaý kameralary ornatylǵan. Sonymen qatar mektepte ishki basseın de ornatylǵan. Aýdanda, sondaı-aq Sarysý eldi mekenindegi №40 N.Ábdirov atyndaǵy negizgi orta mekteptiń 200 oryndyq oqý ǵımaraty jańa oqý jylynda paıdalanýǵa berildi. Al Otyrar aýdanynda Aqkól eldi mekenindegi 100 oryndyq J.Egemberdıev atyndaǵy negizgi mektebiniń, Saýran aýdanynda tórt mekteptiń saltanatty ashylý rásimi ótti. Jańa oqý jylyna paıdalanýǵa berilgen tórt mekteptiń bireýi – memlekettik, úsheýi – jekemenshik mektep. Al jyl sońyna deıin «Jaıly mektep» ulttyq jobasy aıasynda Saýran aýdanynda 3 mektep paıdalanýǵa beriledi. Kelesi jyly Yntaly men Qumtúıin eldi mekenderinde 600 oryndyq eki mekteptiń qurylysy aıaqtalmaq. Oqýshylardyń bilim alýyna tolyq jaǵdaı jasalǵan bilim oshaǵy Kentaý qalasynda da paıdalanýǵa berildi. Sońǵy úlgide salynǵan jekemenshik «Bastau» mektebi 450 oqýshyǵa arnalǵan. Al Arys qalasynda oqýshy sanynyń artýyna baılanysty jańadan paıdalanýǵa berilgen 300 oryndyq oqý ǵımaraty tolyqtaı zamanaýı úlgide jabdyqtalǵan. Úsh qabattan turatyn ǵımaratqa jyly sý júıesi, oıyn jáne sporttyq alańshalar ornatylǵan. Barlyq oqý kabıneti jańa parta-ústeldermen, ınteraktıvti taqtalarmen, oqý-ádistemelik quraldarmen, ishki ájethanalarmen jabdyqtalǵan.
Tóle bı aýdanynda pesh jaǵyp, oqýshylary tútinge tunshyǵyp, tar, tozyǵy jetken ǵımaratta oqıtyn mektep bar edi. Kórshiles aýyldardaǵy balalar zamanaýı tıptegi záýlim mektepterge baryp júrgende solardyń qaq ortasynda ornalasqan Taǵaına eldi mekeninde oqýshylar peshpen jylytylatyn, ábden tozyǵy jetken eski ǵımaratta oqýǵa májbúr bolǵan edi. Bul mekteptegi jaǵdaıdy arnaıy baryp kórgenbiz. Máseleni tıisti oryndarǵa jetkizgen de edik. Táýba! Taǵaınada tamasha mektep salynýyna atsalysqan azamattarǵa, máseleni baqylaýda ustaǵan «Amanat» partııasynyń ókilderine, bıýdjetten qarjy bólý usynysyn qoldaǵan oblystyq ákimdiktegilerge aýyl turǵyndarynyń aıtar alǵysy sheksiz. Jańa oqý jylynda Taǵaına eldi mekenindegi 200 oryndyq mektep pen Kóksáıek eldi mekenindegi aýdandyq saz mektebi paıdalanýǵa berildi. Taǵaına jalpy orta mektebiniń ashylý saltanatynda aýdan ákimi Tólegen Telǵaraev aýyl halqynyń kópten kútken bilim ordasynyń qurylysyn merdiger mekeme «Dos ı K servıs» JShS júrgizgenin atap ótti. Quny 925 mln teńge bolatyn mektepte oqýshylardyń tııanaqty bilim alýyna jan-jaqty jaǵdaı jasalǵan. Aýdanda tozyǵy jetken úsh bilim uıasyna kúrdeli, al 33 mektepke aǵymdaǵy jóndeý jumystary júrgizildi. Sonymen qatar «Jaıly mektep» ulttyq jobasy boıynsha úsh mekteptiń qurylysy aıaqtalýǵa jaqyn.
Sondaı-aq Bilim kúni Túlkibas aýdanynda 300 oryndyq jańa mektep ashylsa, Keles aýdany Qoshqarata aýyldyq okrýgine qarasty Besqubyr eldi mekeninde №25 S.Seıfýllın atyndaǵy jalpy bilim beretin mektebinde 300 oryndyq qosymsha jańa ǵımarat paıdalanýǵa berildi. Aýdanda «Jaıly mektep» jobasy aıasynda úsh mekteptiń qurylysyn jyl sońyna deıin aıaqtaý kózdelgen.
Túrkistan oblysy