Bilim kúni Qosshy qalasynda 1 200 oryndyq mektep ashylyp, alǵashqy qońyraý saltanaty turǵyndardyń kól-kósir qýanyshymen kómkerilip, ádemi áserge bóledi.
Qosshy qalasy turǵyndarynyń jyl sanap ósip kele jatqandyǵy belgili. Qala mártebesin alǵan úsh jyldyń ishinde tórtinshi mektep ashylyp otyr. Qazir eldi mekende 8 bilim oshaǵy jumys istep tur. Qazir qalada 11 myńnan astam oqýshy bar ekenin aıta ketsek artyq bolmas.
Kórgen kózdi súısindiretin úsh qabatty zamanaýı mektep úıinde oqýshylardyń tereń bilim alýyna barlyq jaǵdaı jasalǵan. Munda 48 pán kabıneti, baı kitaphana bar. Metall, aǵash óńdeıtin jáne tigin sheberhanalary qajetti quraldarmen tolyq qamtamasyz etilgen. Eki sport, saltanat zaldary aınadaı jarqyrap tur. Mektep oqýshylary tamaqtanatyn keń de jaryq ashanasy qandaı!
Jańa oqý jylynda bilim oshaǵynyń tabaldyryǵyn bes júzden astam oqýshy attap otyr. Olarǵa 35 ustaz tálim-tárbıe beredi. Bir aıta keterligi, jergilikti ult tilinde bilim beretin bilim oshaǵy el erteńi – oqýshylar men ulaǵatty ustazdarǵa meılinshe jaıly. Qaýipsizdikti saqtaý máseleleri de eskerilgen.
Bilim oshaǵy oblystyq bıýdjet esebinen salynǵan. Qurylys jumystaryn «FBK Delo» jaýapkershiligi shekteýli seriktestigi júzege asyrypty. Qurylysshynyń qalaǵynan jańa shyqqan eńseli ǵımarat jas tolqynnyń boıyna bilim nárin qapysyz quıary sózsiz.
Aqmola oblysy,
Qosshy qalasy