Qashannan beri ulttyq qundylyqtardyń altyn besigi ispetti Ulytaý oblysynda byltyrǵy oqý jylynan beri biryńǵaı orys tilinde bilim beretin birde-bir mektep qalǵan joq. Aımaqta jyl sanap balalaryn qazaq mektebinde oqytýǵa degen umtylys qarqyn alyp keledi.
– Bıyl oblys boıynsha 4 270 bala mektep tabaldyryǵyn alǵash ret attady. Sonyń 3 468-i – qazaq, qalǵan – 802-si orys synyptaryna bardy, – deıdi oblystyq bilim basqarmasy basshysynyń orynbasary M.Tórebekov.
Sátbaev qalasyndaǵy №14 mektepte ótken jyly alǵash ret qazaq synyby ashylǵan edi. Qaı nárseni bolsa da bastaý qıyn emes pe? Sol synypqa nebári 6 oqýshy jınalǵan edi. Qazir olar ekinshi synypta oqyp júr. Bir qyzyǵy, sol altaýdyń ekeýi – ózge ult ókilderi bolatyn. Al bıylǵy jaǵdaı qalaı boldy eken?
– Bıyl mektebimizde 2 qazaq, 2 orys tildi 4 birinshi synyp ashyldy. Qazaq synyptaryna – 39, orysshaǵa – 57 bala jınaldy. Bizdi balalaryn qazaqsha oqytqysy keletin ata-analar qatarynyń molaıa túskeni qýantady, –deıdi mektep dırektory Farıda Syzdyqova.
Árıne, bul qýanyshty jaǵdaı. Degenmen Sátbaev qalasy boıynsha bıylǵy orys mektebiniń tabaldyryǵyn alǵash attaǵan 320 balanyń 114-niń qazaq balasy ekenin bilgende kóńil jabyrqap-aq qalady. Demek ulttyq sana silkinisin kúsheıte túspese bolmaıdy-aý...
Ulytaý oblysy