Mádenıet jáne aqparat mınıstrligi, Ulttyq kıno ortalyǵy» qoldaýymen túsirilgen «Baýyryna salý» fılmi halyqaralyq festıvaldarda top jaryp keledi. Jaqynda rejısser Ashat Kýchıncherekovtiń fılmi Aýstrııa men Sankt-Peterbýrgte eki bedeldi marapatqa ıe boldy.
Aýstrııadaǵy «Der Neue Heimatfilm» halyqaralyq kınofestıvalinen týyndy «Úzdik kórkem fılm» syılyǵyn jeńip aldy. Atalǵan festıval júzdegen kásibı mamannyń basyn biriktirip, mańyzdy derekti kartınalardy usynady.
23-27 tamyz aralyǵynda Sankt-Peterbýrgte ótken «Lendoc Film Festival» festıvalinde «Baýyryna salý» taǵy bıikten kórinip, Ersultan Erman «Úzdik akter» atalymyn enshiledi. Halyqaralyq festıvaldy bes jyldan beri «Lendok» ashyq kınostýdııasy «Kınokýltýra» AUO-men birlesip ótkizip keledi.
«Baýyryna salý» fılmi ájesiniń qolynda ósken jetkinshektiń oqıǵasyn baıandaıdy. Ájesi qaıtys bolǵannan keıin ol óziniń ata-anasyna oralýǵa, bóten adamdarmen jańa ortada qarym-qatynas qurýǵa májbúr bolady.
«Bul – ishinara jeke ómirimnen alynǵan oqıǵa. Men de ájemniń qolynda óstim, meni tárbıelegen sol kisi. Osy máseleni jiti zerttedim. Mundaǵy basty nárse – ata-ana men balanyń qarym-qatynasy. Ata-ájesiniń qolynda ósken kez kelgen bala óz ata-anasyn «áke» ne «ana» dep atamaıdy. Nege olaı? Ár sondaı balanyń ishinde «meni tastap ketken» degen renish bar. Fılmniń dramatýrgııasy – otbasynan aıyrylǵannan keıin áli de jańa otbasy tabý múmkindigi bar ekenin kórermenge jetkizý», deıdi rejısser.
Kýchınchırekov bul jobada rejısser, ssenarıst jáne prodıýser retinde jumys istedi.
Fılmniń tusaýkeseri iri halyqaralyq kınofestıvaldarda ótken. Sonymen qatar jaqynda kartına prokatqa shyǵyp, kórermenniń yqylasyna bólendi. Rejısserdiń aıtýynsha, bul týyndy – qazaq halqynyń salt-dástúrine degen erekshe qurmet.