2025-2026 oqý jylynda qoldanysqa engiziletin 4-synyptarǵa arnalǵan oqýlyqtar qoǵamdyq talqylaýǵa shyǵaryldy, dep habarlaıdy Egemen.kz.
Talqylaýǵa qatysý úshin Bilim mazmunyn saraptaý ortalyǵynyń https://bmso.kz saıtyndaǵy «Oqý ádebıetterin qoǵamdyq talqylaý» bólimine ótý kerek.
Aıta keteıik, talqylaýǵa muǵalimder, ata-analar, qoǵamdyq uıymdardyń ókilderi men mektep oqýlyqtarynyń sapasyna beı-jaı qaramaıtyn barlyq azamat qatysa alady.
Oqý-aǵartý mınıstrliginiń habarlaýynsha, barlyq kelip túsken syn-eskertpeler, oqýlyqtardyń sapasy men mazmunyn jaqsartýǵa qatysty usynystar saraptama barysynda eskeriledi. Talqylaý 2024 jyldyń 30 qyrkúıegine deıin jalǵasady.
Aıta keterligi, qoldanystaǵy zańnama boıynsha búginde oqýlyqtar saraptamanyń bes kezeńinen ótedi:
ǵylymı-pedagogıkalyq saraptama; oqýlyqtardy pılottyq mektepterde synaqtan ótkizý; qoǵamdyq-pedagogıkalyq talqylaý; pándik saraptalyq komıssııanyń qaraýy.Qazirgi ýaqytta atalǵan oqýlyqtar qoǵamdyq talqylaýmen qatar, elimizdiń birneshe óńirinde 31 pılottyq mektepte synaqtan ótip jatyr.
«Ǵylymı-pedagogıkalyq saraptamaǵa ǵalymdar men biliktilik sanaty «zertteýshi pedagogten» tómen emes praktık-muǵalimder tartylady. Sarapshylar arnaıy oqý kýrsynan ótip, sarapshy sertıfıkatyn alǵan jáne respýblıkalyq sarapshylar bazasyna engen. Osyndaı joǵary talaptar synaq jáne pándik saraptalyq komıssııa qatysýshylaryna da qoıylady», dep habarlady Oqý-aǵartý mınıstrliginiń baspasóz qyzmeti.
Aıta keteıik, pándik saraptama komıssııasynyń sheshimimen saraptamanyń barlyq kezeńderinen ótken oqýlyqtar mektepterde paıdalaný úshin jáne Qazaqstan Respýblıkasynyń Oqý-aǵartý mınıstrligi bekitetin oqýlyqtar tizbesine engizý úshin usynylady.