Atyraý oblysynan V Dúnıejúzilik kóshpeliler oıyndaryna 3 sportshy qatysady. Ulttyq sportty serik etken olar osy kezge deıin respýblıkalyq chempıonatqa qatysyp, úzdik atanyp júr.
Oblystyq Dene shynyqtyrý, sport jáne týrızmdi damytý basqarmasy basshysynyń mindetin atqarýshy Nurjaýǵan Tóleýovanyń aıtýynsha, 20 jastaǵy palýan Nurjan Sársenǵalıev alysh kúresinen el chempıonatynda baq synap, óz salmaǵynda jeńimpaz atanǵan. Al qusbegilikten sport sheberi Arman Qoshqarov biraz jyldan beri saıatshylyqty serik etip keledi. Onyń da enshisinde Qazaqstan chempıonatynyń jeńimpazy júldesi bar. Úshinshi sportshy – Marat Beksultanuly. Dástúrli sadaq atýdan el chempıonaty men birneshe halyqaralyq týrnırde top jarǵan sportshy sport sheberi ataǵyn ıelengen.
«Kóshpeliler oıyndaryna Atyraý óńirinen 3 kıiz úı tigiledi. Kıiz úıdiń birine jergilikti murajaıdyń jádigerleri qoıylady. Al ekinshi úıde ulttyq salt-dástúr tanystyrylady. Úshinshi kıiz úıde aımaq týrızmine qatysty málimetter kópshilik nazaryna usynylady», deıdi N.Tóleýova.
Onyń deregine súıensek, atyraýlyq sportshylar budan buryn ótken Dúnıejúzilik kóshpeliler oıyndarynda júldeli oryndardy ıelenip júr. Máselen, 2016 jylǵy II Dúnıejúzilik kóshpeliler oıyndarynda Suńǵat Zakarııaev qazaq kúresinen altyn, Arman Qalıev kúmis medalǵa orynǵa ıe bolǵan. Al 2018 jyly Arman Qalıev qyrǵyz kúresinen kúmis, Abylaı Amandyq túrkimen kúresinen, Qaıypqan Aqjol alysh kúresinen qola júldeni qanaǵat tutypty.
Endi mine, Astanada bastalatyn V Dúnıejúzilik kóshpeliler oıyndaryna 100-ge jýyq sadaqshy qatysady. Solardyń qatarynda atyraýlyq sportshy, sadaq atýdan sport sheberi Marat Beksultanuly el namysyn qorǵaýǵa bekinip otyr. Bir qyzyǵy, onyń mamandyǵy – zańger. Biraz jyl memlekettik qyzmette jumys istep, laýazymdyq qyzmet atqarǵan. Biraq 4 jyldan beri jeke sharýashylyqpen aınalysýǵa bet burǵan eken. Qazir atyraýlyqtarǵa dástúrlik, sadaq atýdy úıretip júr.
«Halqymyzdyń kóshpelilerge tán ulttyq óneri kóp. Dástúrli án, kúı mektebi qalyptasqan. Baǵzy dáýirde ań aýlaýǵa shyqqan babalarymyzdyń bárinde birdeı beren myltyq bolmaǵan shyǵar. Osy turǵydan aıtqanda, sadaq atýdy sol babalardan qalǵan asyl muraǵa jatqyzýǵa bolady. Al ony jas urpaqqa keńinen nasıhattap júrmiz be? Osy saýal tóńireginde oılanyp, «Bul isti nege qolǵa almasqa?» degen toqtamǵa keldim. Alaıda Atyraýdan sadaq atýdyń qyr-syryn úıretýdi qolǵa alǵan úıirme tappadym. Sol sebepten ózim sadaq atýdy úıretetin sabaqty ınternet jelisinen taýyp aldym. Sol arqyly sadaq atýdy meńgerdim», deıdi Marat Beksultanuly.
Sportshynyń basty maqsaty – dástúrli sadaq atýdy nasıhattaý. Ásirese jas býynnyń osy sportqa yntasyn oıatyp júrgen sportshynyń aıtýynsha, qazir sadaq atý mektebi qalyptasa bastaǵan.
«Sadaq atýmen aınalysýdyń paıdasy óte kóp. Aldymen bul – adamnyń rýhanı jetilýine, fızıkalyq damýyna oń áser etetin óner ári sport. Ekinshiden, jas býynnyń minez-qulqynyń salmaqty bolýyna yqpalyn tıgizedi. Sadaq atýdy meńgergen jastardyń minezi baısaldy bolady. О́ıtkeni sadaqshyǵa baısaldylyq aýadaı qajet. Bul sportta ashýǵa boı aldyryp, asyǵys áreketpen jeńiske jetý múmkin emes. Úshinshiden, sadaq atqan adamnyń eptiligi, sheberligi jetiledi», deıdi Marat.
Qazir ol «Batýhan jebesi» federasııasynyń jumysyn jandandyrýǵa jumystanyp júr. Bıyl jergilikti bıýdjetten qarjy bóline bastapty. О́ziniń 40-qa jýyq shákirti bar.
«Keıingi 4-5 jylda Atyraý oblysynda dástúrli sadaq atýǵa nıet bildirgender sany 100-ge jýyqtady. Olardyń arasynda 7 jasar bala da, jasy 60-ty alqymdaǵan úlkender de bar. El quramasyna bizdiń óńirden menimen birge Baýyrjan Aqtaev, Álı Sesıgúzel, Mádına Bısembıeva alyndy. Bárimiz de irikteý saıysyna qatystyq. Sol saıysta men V Dúnıejúzilik kóshpeliler oıyndarynyń joldamasyna ıe boldym. Endi dúbirli dodada eldiń namysyn qorǵap, jaqsy nátıje kórsetýge barymdy salam», deıdi M.Beksultanuly.
Atyraý oblysy