Premer-mınıstr Oljas Bektenov Aqmola oblysyna jumys sapary barysynda otandyq ónerkásip flagmandarynyń biri sanalatyn Stepnogorsk taý-ken hımııa kombınatynda bolyp, kásiporyn ujymymen kezdesti, onda energetıkalyq qaýipsizdikti arttyrý men otandyq ónerkásipti damytýdyń ózekti máselelerin talqylady. Prezıdenttiń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Qazaqstan halqyna Joldaýynda qoıylǵan mindetterdi iske asyrýǵa nazar aýdaryldy, dep habarlaıdy Egemen.kz Úkimettiń baspasóz qyzmetine silteme jasap.
Oljas Bektenov Stepnogorsk taý-ken hımııa kombınatyn aralaý barysynda quramynda ýran bar shıkizatty qaıta óńdeý boıynsha ozyq óndiristik prosestermen tanysty.
«Qazaqstan álemdik óndiristiń shamamen 40%-yn qamtamasyz ete otyryp, ýran óndirý boıynsha álemde birinshi orynda tur. Ýrandy qaıta óńdeıtin Stepnogorsk taý-ken hımııa kombınaty álemdik atom energetıkasy úshin turaqty jetkizilimdi qamtamasyz etedi jáne óńir ekonomıkasynyń damýyna eleýli úles qosady. О́tken jyly kombınat 1650 tonna daıyn ýran ónimin óndirdi. Jobalyq qýaty jylyna 4 myń tonna tabıǵı ýrandy, qaıta óńdeý – 1 mln tonnaǵa deıin mys-molıbden kenin quraıdy», delingen habarlamada.
Tekserý barysynda Premer-mınıstrge qaıta óńdeý qýatyn jylyna 6 myń tonna ýranǵa deıin ulǵaıtýǵa baǵyttalǵan kombınatty odan ári jańǵyrtý jónindegi josparlar týraly baıandaldy. Aıta keteıik, qala quraýshy kásiporynda 1 myńnan astam adam jumys isteıdi.
Sonymen qatar 2026 jyldan bastap «Býdenov» ken ornynan jetkiziletin quramynda ýran bar shıkizatpen tolyq qýatyna shyǵarý josparlanǵan. Bul monoqala turǵyndaryn jańa jumys oryndarymen jáne turaqty jumyspen qamtamasyz etedi.
Jalpy, Qazaqstannyń energııa tutyný kólemi shamamen 17 GVt quraıdy, bul óndiris kóleminen joǵary. Bul rette qazir elektr energııasynyń belgili bir kólemi kórshiles elderden satyp alynýda. Sondyqtan Qazaqstan basqa energııa kózderine kóshýi tıis ekeni atap ótildi.
Atom energetıkasynyń Qazaqstan úshin negizgi energııa kózine aınalyp, energetıka júıesiniń turaqty damýyna yqpal etýi múmkin ekendigi atap ótildi. Referendým qorytyndysy boıynsha oń sheshim qabyldanǵan jaǵdaıda AES-tiń salynýy ósip jatqan suranys jaǵdaıynda naryqtaǵy elektr energııasy tapshylyǵyn azaıtýǵa, jabdyqtardyń tozýy sebebinen tómendep jatqan óndiristi tolyqtyrýǵa múmkindik beredi. Bul qaýipsiz ári ekologııalyq taza energııany turaqty túrde óndirýge jol ashady.
«Energetıka júıesiniń senimdiligi men turaqtylyǵy – Úkimettiń basty mindeti. Qalyptasqan kúrdeli ahýal bizden túbegeıli jańa tásilder men kóp jyldan beri qordalanyp qalǵan máseleni sheshýdi talap etip otyr. Qazaqstanǵa elektr energııasynyń jańa negizgi generatoryn engizý qajet. Eger Prezıdent 6 qazanǵa belgilegen referendýmda halyqtan qoldaý kóp bolsa, onda biz osy baǵytpen júremiz. Onsyz ónerkásipti damytý da, qarapaıym tirshilikti qamtamasyz etý de múmkin emes. Bul elimizdiń damýyna múmkindik beredi», dedi Oljas Bektenov.