Júrsinálı aqsaqal uzap bara jatqan kóliktiń sońynan ilesken shań seıilgenshe esik aldynda turdy. Jylda jan-jaqtan jıylǵan balalary qosaǵy Rahıma ekeýiniń kóńilin bir aýlap ketetini bar. Quddy bir túý qııannan qanatyn taldyryp uıasyna oralatyn qarlyǵashtar sekildi. Buryn nemerelerdiń qylyǵyn qyzyqtaıtyn, qazir shóberelerdiń sheti kórindi. Qazaq ádette jan sanamaıdy ǵoı. Sonda da Qudaı bergen 9 perzentinen 35 nemere, 46 shóbere súıip otyrǵanyna ishteı shúkirlik aıtatyny bar. Kólik kózden tasa bolǵanda úıge qaraı buryldy. Ishteı «Aman bolyńdar, balapandarym» degendi san qaıtalap barady.
Kezinde Aral teńiziniń qoltyǵynda Uıaly deıtin aýyl bolǵan. Balyǵy taıdaı týlaǵan, baqasy qoıdaı shýlaǵan osy qut mekende 1933 jyly dúnıege kelipti. Ákesi Baıqadam Tájibaev aıadaı ǵana eldi mekendegi bedeldi azamattardyń biri boldy. Bul aýyldaǵy kásip kózi teńizben tikeleı baılanysty. Jetijyldyq mektepte oqyǵan keıipkerimiz osy izben kishkentaıynan qaıyqqa otyrdy. «Bári de Jeńis úshin, bári de maıdan úshin» degen urannyń aıasynda osyndaı ulandardyń da eńbegi jatyr.
Buryn-sońdy teńiz sýy taýsylady degendi kim estipti. Adamnyń pıǵyly buzylsa, telegeı teńiziń de túk qalmaı tartylady eken. Aıdynǵa qatar quıyp jatqan qos ózenniń biri Ámýdarııanyń joly býylyp, shalqar kún sanap keri shegine berdi. Bul áýlet 1960 jyly Uıalyny tastap Qazalyǵa qonys tepkende jas Júrsinálıdiń Rahıma Qulmyrzaqyzymen shańyraq qurǵanyna kóp bola qoımaǵan edi. Jańa qonysta «Remstroı» mekemesine kólik júrgizýshi bolyp ornalasty. Bul jumysy keıin aýdandyq aýrýhanada jalǵasty. «Rembyttehnıka» mekemesinen zeınetke shyqqan zaıyby Rahıma ekeýi 9 perzent ósirdi.
Búgingi berekege myń shúkir, keshegi toqsanynshy jyldardaǵy qıyndyqta kóp jurt týǵan jerin tastap, jan-jaqqa ketkenin kóz kórdi. Árıne, balanyń qamy baıyz taptyrmaǵan olardyń da jaıyn túsinedi. Al ózi baıyrǵy qonysyn qımaı qalyp qoıdy. «Daraq bir jerde kógeredi» demeı me? Qazir ózinen órbigenderden uldary Ysqaq pen Ismaıl, qyzy Mıra – Shymkentte. Zeınegúli – Atyraýda, Anargúl atty qyzy Arys qalasynda turady. Baýyrlar jan-jaqtan jınalǵanda Qulsarydan Jadyrasy men Aqtóbe qalasyndaǵy kenje qyzy Jazıra jetedi. Bulardyń aldy áldeqashan ata-áje atansa da, qosaǵy Rahıma ekeýine áli bala sııaqty. Osy Qazalydaǵy Smaǵuly men Janargúli bulardyń qas-qabaǵyn baǵyp, qyzmetin jasap otyr. Byltyr 90 jastyń tórine shyqqanda qos qarııanyń izinen erip, qurmet kórsetken balalary kópti súısintti.
Áýlet aýdandyq, oblystyq «Mereıli otbasy» baıqaýynda da qurmetke bólenip júr. О́tken jyly aýdan ákimdigi Qazalydaǵy erli-zaıypty qarııalardy shaqyryp, marapattaǵanda da kósh basynda otasqandaryna 65 jyl tolǵan zaıyby ekeýi júrdi. Júrsinálı qarııanyń ózinen keıingi 11 baýyry da elimizdiń ár túkpirinde turyp jatyr.
Balasy Smaǵul aıtady: «Qarııasy bar úıdiń qazynasy bar» degendi jıi aıtqanymyzben, maǵynasyn kóp túsine bermeıtinimiz ras qoı. Qarashańyraqta otyrǵannyń orny bólek bolady eken. Baýyrlarym jan-jaqtan jıylǵandaǵy áke-sheshemniń qýanyshyn aıtyp jetkize almaspyn. Alystan kelgen aǵaıyn da sálem berýge aldymen osy úıge kelgen saıyn bir jasap qalady. «Áke – balaǵa synshy» degen bar ǵoı. Jastaıymnan sharýaǵa, aǵaıyn arasyndaǵy jón-joralǵyǵa beıimdigimnen bolar ákem maǵan erekshe qarady. Onyń ústine ózimnen keıingi inim kásip qýyp, syrtqa ketti de, áke-sheshemniń qasynda men qaldym. Álgi Jarasqan aqynnyń «Kenje bala» óleńindegi qarashańyraqty kúzetken keıipker men bolarmyn, sirá? Ákem men sheshem álpeshtep ósirgen, baýyrlarymmen birge ósken shańyraqtyń qadiri bólek qoı, shirkin!»
Ata-anany altyn dińgekke balaǵan Baıqadamovtar áýleti týraly qysqasha baıan osyndaı. Sen netken qudiretti ediń, qarashańyraq!
Qyzylorda oblysy,
Qazaly aýdany