Tumsa tabıǵattyń taý-tasyn aralap, bulaq sýynan meıir qandyryp, saf aýasymen tynystaý, qustardyń saıraǵan únine qulaq túrip, jel terbegen gúlderin súısine tamashalaýdan asqan demalys bola ma? Al oǵan otbasymen shyǵyp, balalarǵa syr tunǵan saı-salasyn aralatyp, qaraǵaıyn saıalatyp, tasqa búgilgen tarıhyn tanystyrý da ata-ananyń bir paryzy bolsa kerek. Sonaý jalyndaǵan jastyq shaǵynan beri ıyǵyna fotoapparatyn asynyp, tamyljyǵan tabıǵattyń san alýan ǵajaıyp kórinisin, qaıtalanbas sátin túsirýdi aınymas ádetke aınaldyrǵan Nurbolat Tastanqulov jyldyń tórt mezgilinde de otbasylyq demalys uıymdastyrýdy daǵdyǵa aınaldyrǵan.
«Fotograf bolýdyń ǵajaıyp bir qasıeti – turmys-tirshilikti, qorshaǵan ortany kókirek kózimen kóresiń. Sýretten jeldiń gýili, qustyń qanat qaqqan sybdyry estiletindeı áserli bolýy kerek. Sonda sýretke jan bitkendeı bolady. Qııaldyń qanatynda qalyqtaı júrip, talaı jerdiń dámin tattym. Qazaqta «Atyń barda jer tany, jelip júrip» dep beker aıtpasa kerek. Osynaý saparlarymda ómirlik serigim Qaınargúl men altyn asyqtaı uldarymdy, qyrmyzy gúldeı qyzdarymdy birge ilestire júrýdi ádetke aınaldyrdym. Balalardyń kishkene kezindegi kórgen-bilgenderi eshýaqytta esten ketpeıtini belgili. Sondyqtan olardyń týǵan kúnderinde, aıtýly merekelerde, toqsandyq demalystaryn kóńildi ári este qalarlyqtaı etip ótkizýge tyrystyq. Mundaı saparlarda balalarymyz tabıǵat tósinde demalyp qana qoımaıdy, tanym kókjıegin keńeıtedi. Qorshaǵan ortanyń qadirin bilip, tasy men gúline úńiledi. Súısinedi, súıedi. Jer-anany aıalaýdy úırenedi. Osyndaı sezimdi boıyna sińirip ósken bala asa sezimtal, týǵan jerge, Otanǵa degen súıispenshiligi artyp, óz eliniń patrıoty bolary anyq», degen Nurbolat Tastanqulovtyń otbasy músheleri de shetterinen ónerli.
Ata-ananyń aıaly alaqany men meıirimine bólenip ósken ul-qyzdary joǵary bilim alyp, osy kúni san salada eńbek etip júr. «Uıada ne kórse, ushqanda sony iledi» degendeı, ónerge jaqyn otbasy músheleri ótken jyly «Mereıli otbasy» baıqaýynyń jeńimpazy atanǵan.
«Men ózim fotojýrnalıst bolǵandyqtan aýdanymyzdyń ásem jerlerin sonaý 1985 jyldan beri fotoapparatyma túsirip, muraǵatymda san myńdaǵan kadrlarym saqtalǵan. Aýdanǵa kıno jáne beınekamerany alǵash ákelgenderdiń birimin. Bul meniń mamandyǵym, hobbıim desem bolady. О́ńirdiń ásem tabıǵatyn, tarıhı oryndaryn aragidik áleýmettik jelide jarııalap, elimizdiń týrızm salasyn damytýǵa ózindik úlesimdi qosyp, qyzmet jasap kelemin. Álemge áıgili Kólsaı, Qaıyńdy kólderi, Sharyn shatqaly, Shóladyr taýynyń etegindegi Qumtekeı qumy, Aqtasty petroglıfteri men tado býchık jazýy, san ǵasyr saqtalǵan Úısin tóbeler, Qarqara jaılaýyndaǵy obalar áli de zertteýge zárý. Sarykóldiń tuzdy batpaǵy qanshama janǵa shıpa, janyna qýat boldy. Jýantóbe, Qatartóbe, Qostóbe atalyp, qoınaýyna syr tunǵan tóbeler kimdi de bolsa oılantýy kerek», degen kásibı fototilshi keń-baıtaq jerimizdiń keremetterin tamsana tilge tıek etti.
Tastanqulovtar áýleti jaqynda elimizdiń ońtústik óńirin aralap qaıtypty.
«Túrkilerdiń tóri atanǵan Túrkistanda bolyp keldik. Arystanbab, Qoja Ahmet Iаsaýı kesenelerinde, sol mańda ornalasqan Shyǵys monshasy, jerasty Qylýet meshitiniń biz oqyǵan syrlarynan bólek tańǵajaıyp qyrlaryn kózben kórip, qolymyzben ustap qaıttyq. Týrısterdiń kóptigi ózime úlken oı týǵyzdy. Osyndaı ushy-qıyry joq keń dalany babalarymyz naızanyń ushymen, bilektiń kúshimen, aqyl-aılasymen qorǵaǵany keıingi urpaqqa sabaq bolar degen oıdamyn. Ony óskeleń urpaqqa úlgi ete bilsek qana kóp nársege qol jetkizetinimizge tolyq senimdimin. Osy turǵyda ólketanýshy dosym Bolat Japsarbaıulyn aıtpaı ketýime bolmaıdy. Eren eńbeginiń, tynymsyz izdenisiniń nátıjesinde «Kegen aýdanynyń 100 tarıhı kıeli orny» degen ataýmen ólkemizdiń tarıhnamasyn jaryqqa shyǵardy. Biz otbasymyzben aralasyp qana qoımaı, el-jurtymyzdyń qajetine jaraıtyn, urpaqqa úlgi bolarlyq is qaldyrý jolynda jumyla jumys istep kelemiz. Bul da bizdiń otbasylyq dástúrimizdiń bir kórinisi», deıdi kórgeni kóp otaǵasy.
Temirlik aýlynda dúnıege kelgen N.Tastanqulov 40 jylǵa jýyq aýdandyq «Kommýnızm nury», keıinnen «Hantáńiri», qazirgi «Qarqara» gazetinde tabandy eńbek etip keledi.
Jeti balany ósirip, jetkizgen Nurbolat Tastanqulov pen Qaınargúl Smaıylqyzy – bul kúnde uldy uıaǵa qondyryp, qyzdy qııaǵa ushyryp, olardan 17 nemere-jıen súıgen baqytty otbasy.
Almaty oblysy