Mádenıet jáne aqparat mınıstri Aıda Balaeva Qazaqstan halqyn Otbasy kúnimen quttyqtady, dep jazady Egemen.kz aqparat agenttigi.
- Qurmetti qazaqstandyqtar! Sizderdi Otbasy kúnimen shyn júrekten quttyqtaımyn! Bul mereke kúntizbedegi jaı ǵana data emes. Otbasy – súıispenshiliktiń, izgilik pen meıirimniń, qurmet pen tatýlyqtyń oshaǵy, ıaǵnı kez kelgen qoǵamnyń dińgegi. Balalarymyz otbasynda tárbıelenip, eń basty qundylyqtardy boıǵa sińirip, elimizdiń bolashaǵy qalyptasady. Otbasynyń bereke-birligi men dástúrli qundylyqtaryn nyǵaıtý – Memleket basshysy belgilegen memlekettik saıasattyń basym baǵyttarynyń biri, - dedi mınıstr.
Prezıdenttiń Ulttyq quryltaıda bergen tapsyrmasyna sáıkes, otbasy ınstıtýtyn nyǵaıtý, urpaqtar sabaqtastyǵyn saqtaý baǵytynda belsendi jumystar júrgizilýde. Otbasylyq jáne genderlik saıasattyń 2030 jylǵa deıingi tujyrymdamasy aıasynda otbasyn qoldaý, turmystyq zorlyq-zombylyqpen kúres jáne otbasy qundylyqtaryn qorǵaý sharalary júzege asyp keledi.
- Sońǵy 10 jylda Qazaqstandaǵy otbasylar sany bir jarym mıllıonǵa ósip, búginde 5,5 mıllıon otbasyǵa jetti. Bul adamdardyń turaqtylyq pen otbasylyq qarym-qatynastardy kóbirek baǵalaıtynyn kórsetedi. Sondaı-aq sońǵy 5 jylda ajyrasýdyń 48,6%-ǵa azaıǵany – qazaqstandyq otbasylarynyń nyǵaıyp kele jatqanynyń taǵy bir kórsetkishi.Bıyl «Analar kúni» men «Ákeler kúnin» alǵash ret toıladyq. Bul merekeler úlken qoldaý taýyp, oǵan myńdaǵan qazaqstandyq qatysty. Mundaı bastamalar ata-ana men bala arasyndaǵy baılanysty arttyryp, sanaly tárbıe men otbasyndaǵy bos ýaqyt ótkizý mádenıetin qalyptastyrýǵa sep bolady. Otbasy – bárimizdi biriktiretin qundylyq. Ár úıde mahabbat pen yrys-bereke, baqyt ornap, balalarymyz qurmetke, qamqorlyqqa bólenip ósýine tilektespin. Mereke qutty bolsyn, qymbatty dostar! Ár shańyraqqa shattyq ornasyn!, - dep jazdy Balaeva.