Memleket basshysy Qasym-Jomart Toqaevtyń ǵylym men tehnıkanyń jetistikterin óndiriske engizý týraly tapsyrmasyn iske asyrý aıasynda Qaskeleń qalasynda Ǵ.Dáýkeev atyndaǵy Almaty energetıka jáne baılanys ýnıversıtetiniń «Future University» jobasy júzege asatyn bolady.
Joba boıynsha atalǵan ýnıversıtettiń jańa stýdenttik kampýstary Qaskeleńde boı kóteredi. Atap aıtqanda, qala mańynan bólingen 15 gektar aýmaqqa árqaısysy 60 myń sharshy metrdi quraıtyn eki oqý korpýsy jáne 6 myń stýdentke arnalǵan zamanaýı úlgidegi jaıly jataqhana salynady dep josparlanyp otyr. Jobanyń ınvestısııalyq quny shamamen 100 mln dollardy quraıdy.
Jobanyń ashylý saltanatyna Almaty energetıka jáne baılanys ýnıversıtetiniń rektory Ǵanı Nyǵymetov, Nıý-Iork kınoakademııasynyń prezıdenti Maıkl Iаn, Almaty oblystyq ishki saıasat basqarmasynyń basshysy Erik Ábıtov, Qarasaı aýdanynyń ákimi Jasulan Estenov qatysty. Osydan keıin qonaqtar ýnıversıtet ǵımaratyna kelip, atalǵan joba týraly beınekórsetilimmen tanysty.
Onda alǵashqy ret jasandy ıntellektiniń kómegimen Almaty qalasynan shyǵatyn qoqysty tasymaldaý, óńdeý jáne turmystyq qaldyqtardan jańa tehnologııalardy paıdalana otyryp, alynatyn kógildir otyndy ıgerý, ony tıimdi paıdalaný týraly tórt jańa joba – startap tanystyryldy. Atalǵan jobalar jasandy ıntellekt pen robottehnıkany paıdalana otyryp, turmystyq jáne óndiris qaldyqtaryn suryptaý, qaıta óńdeý jáne paıdalaný tehnologııalaryn kórsetti. Damyǵan memleketterde qaldyqtardyń 80 paıyzdan astamy óńdeýden ótetinin eskersek, elimizde bul nebári 15 paıyzdan aspaıdy. Bul qorshaǵan orta men ekologııamyzǵa, ekonomıkamyzǵa da zor shyǵyn ákeletini belgili.
Qaskeleń qalasyndaǵy Kreatıvti ındýstrııa parkiniń ashylý saltanatynda sóz bastaǵan Almaty energetıka jáne baılanys ýnıversıtetiniń rektory Ǵanı Nyǵymetov «Future University» jobasy jáne oqý ornynyń alǵa qoıyp otyrǵan tyń bastamalary týraly baıandady.
«Future University» jobasy boıynsha jańa oqý korpýstarynyń ashylýy mundaǵy oqý baǵdarlamasyn jetildirýimen qatar, jańartylatyn jáne atom energetıkasy, jasandy ıntellekt, robottehnıka, jasyl jáne klımattyq tehnologııalar, kınoındýstrııa men oıyndar salasy boıynsha maman daıarlaıtyn Ortalyq Azııadaǵy jetekshi oqý oryndarynyń birine aınalady», dedi ýnıversıtet rektory.
Sondaı-aq «Future University» Qaskeleń qalasynda ornalasqan Sýleıman Demırel ýnıversıtetine kórshiles qonystanýy eki joǵary oqý ornynyń birigip jumys isteýine mol múmkindik beredi. SDÝ búginde elimizdegi jetekshi ýnıversıtetterdiń birine aınalǵany aqıqat. Sondyqtan stýdentter men oqytýshylardy almastyrý, ǵylymı jobalardy birlese júzege asyrý, ýnıversıtettiń qurylymy men tehnıkalyq múmkindikterin birigip paıdalaný arqyly zamanaýı mamandardy daıarlaý, ozyq jańalyqtardy júzege asyrý múmkindigi artady. Joǵary oqý oryndary arasyndaǵy ózara áriptestiktiń nátıjesinde tabıǵaty kórkem Qaskeleń qalasy da jedel damyp, 20 myńnan asa stýdenttiń qutty mekenine aınalary sózsiz.
О́z kezeginde Qarasaı aýdanynyń ákimi Jasulan Estenov halyq sany jarty mıllıonǵa jýyqtaıtyn aýdannyń óndiristik salasy kún ótken saıyn damyp kele jatqanyn tilge tıek etip, aýdan aýmaǵynda ekinshi joǵary oqý ornynyń ashylýyn qýana quptaıtyndyǵyn bildirdi. Sondaı-aq ol Qaskeleń qalasynyń stýdentter qalashyǵyna aınalýy óńirdiń damýyna dańǵyl jol ashatynyn atap ótti.
Almaty oblysy