«Nemerelerim maǵan eliktegen bolýy kerek. Ekeýi muǵalimdikti tańdap, elimizdiń sanaly urpaqtaryn tárbıeleýge atsalysyp júr. Árqashanda adal bolyńdar, sonda joldaryń ashyq bolady dep aıtyp otyramyn. Taǵy bir nemerem Túrkistan ındýstrıaldy-pedagogıkalyq kolledjinde oqyp júr. Eger naqty osy salany tańdaǵan bolsań oqýyńdy odan ári qaraı jalǵastyryp, bilimińdi jetildir dep keńes berdim. Prezıdenttiń tapsyrmasymen pedagogterdiń mártebesi ósip, jalaqylary kóbeıip jatyr. Endi osyǵan saı muǵalimder de qyzmetterin úlken jaýapkershilikpen, adaldyqpen atqarsa degen tilegim bar».
Qyryq jyldan astam ýaqyt bilim salasynda eńbek etken Jarqynbek Qulbaıymbetov osylaı deıdi. Iá, búginde zeınetker ustazdyń nemereleri Ulbala men Mahabbat atasynyń jolyn jalǵap, ustazdyq etip júr. Jalpy, Qulbaıymbetovter áýletin pedagogter dınastııasy deýge bolady. Shańyraqtyń otanasy, jarty ǵasyr ómirin ustazdyqqa arnaǵan, Gúlzına Bazarbekova matematıka pániniń muǵalimi bolyp eńbek etken. Al Jarqynbek aqsaqaldyń qaryndasy Ásemgúl Qulbaıymbetova qazaq tili men ádebıet pániniń muǵalimi. «Ákege qarap ul óser, sheshege qarap qyz óser» demekshi, búginde qyzdary – Gúlmıra men Lázzat ta áke-ana jolyn jalǵap, shákirt tárbıelep júr. Kelinderi Maıra Júsipova geografııa páninen sabaq berse, Gúlnur Qulbaıymbetova qazaq tiliniń mamany. Úsh býyn urpaqqa ustazdyq etken bul áýlettiń jalpy eńbek ótilin esepteseńiz, 150 jyldan asady eken.
Qasıetti Túrkistan qalasynda bilim salasynyń damýyna eleýli úles qosqan, sanaly ǵumyryn shákirt tárbıeleýge arnaǵan, seksenniń seńgirine shyqqan Jarqynbek aqsaqal ózin tyń, shıraq sezinedi. О́tkendi eske alyp, búgingi qoǵam ómirine, eńbektiń baǵalanýy, eńbek adamynyń alar ornyna qatysty da óz kózqarasyn bildirgen aqsaqal mamandyqtyń jamany joq ekenin aıtady. Al eń asyly – ustazdyq dep esepteıdi. «Shákirttiń ushqyr qııalyn qııaǵa samǵatatyn, bilim qaınarymen sýsyndatatyn da ustaz. Qazaqtyń qaısar uly Baýyrjan Momyshulynyń «Ustazdyq – uly qurmet. Sebebi urpaqtardy ustaz tárbıeleıdi. Bolashaqtyń basshysyn da, danasyn da, ǵalymyn da, eńbekqor eginshisin de, kenshisin de ustaz ósiredi» degen sóziniń jany bar. Barlyǵy da muǵalimniń bizge bergen sarqylmas bilimi men baǵa jetpes tárbıesinen bastaý alady emes pe?», deıdi Jarqynbek aqsaqal.
Keıipkerimiz Jarqynbek Qulbaıymbetov 1941 jyly burynǵy Ońtústik Qazaqstan oblysy, Túrkistan aýdanyna qarasty Shoıtóbe aýylynda dúnıege kelgen. Orta mektepti bitirgen soń, 1964 jyly Shymkent qalasyndaǵy pedagogıka ınstıtýtyn fızıka, matematıka pánderiniń muǵalimi mamandyǵy boıynsha támamdaıdy. Eńbek jolyn Túrkistan qalasyndaǵy V.Kýıbyshev orta mektebinde bastaıdy. Azamattyq boryshyn Reseıde ótep kelgen soń Syrdarııa orta mektebine muǵalim bolyp ornalasady, ári syrttaı oqytý mektebiniń keńes berý bóliminiń meńgerýshisi bolyp eńbek jolyn jalǵastyrady. Bilikti mamanǵa qashanda suranys joǵary. Jarqynbek Qulbaıymbetulynyń qarym-qabiletin eskergen basshylyq ony 1969 jyly Túrkistan qalalyq bilim bóliminiń ádistemelik kabınet meńgerýshisi qyzmetine shaqyrady. Araǵa eki jyl salyp, qalanyń bilim salasyna kóptegen jańashyldyq engizgen maman S.Seıfýllın atyndaǵy orta mekteptiń dırektory qyzmetine bekitiledi. Osy mektepte jıyrma jyldaı qyzmet atqarǵan Jaqań mekteptiń materıaldyq-tehnıkalyq bazasynyń nyǵaıýyna, kadr sapasynyń artýyna, oqýshylardyń joǵary deńgeıde bilim alýyna jaǵdaı jasaıdy. «S.Seıfýllın atyndaǵy mektep 1974 jyly paıdalanýǵa berildi. Úlken, jańa, zamanaýı mundaı mektep Túrkistanda bolmaǵan edi. Men basshylyqta bolǵan jyldary sol mektepte qyzmet atqarǵan muǵalimderdiń jeteýi ózge bilim oshaqtaryna dırektor bolyp bardy. Bul da kóp jaıdy ańǵartady. Sol keremet mektepte dırektor bolǵanyma, ondaǵy bilikti ustazdarmen birge jumys istegenime áli kúnge deıin qatty qýanamyn, saǵynamyn», deıdi ardager ustaz sol bir jyldardy eske alyp.
Bilikti basshy 1984 jyly aýdandyq bilim bóliminiń meńgerýshisi qyzmetine taǵaıyndalady. Al 1987 jyly aýdandyq bilim bólimi oblys kóleminde úzdik dep tanylǵan. Jarqynbek Qulbaıymbetuly 1999 jyldan bastap Túrkistan qalalyq bilim bólimi meńgerýshisiniń orynbasary, M.Ábenova atyndaǵy orta mektep dırektorynyń tárbıe isi jónindegi orynbasary boldy. Q.A.Iаsaýı atyndaǵy halyqaralyq qazaq-túrik ýnıversıtetiniń janynan ashylǵan «Túrkistan» lıseıiniń dırektorlyǵyna 2002 jyly taǵaıyndaldy.
«Sol jyldary mektepterde Ulttyq biryńǵaı testileý júıesi bastaldy. UBT kórsetkishi boıynsha 2003 jyly respýblıkada mektebimiz eń úzdik 100 mekteptiń ishinde 37-orynǵa ıe boldy. Kelesi jyly 20-orynǵa kóterildik. Al 2005 jyly oqýshylardyń UBT qorytyndysy joǵary kórsetkishke jetip, nátıjesinde úshinshi orynǵa bir-aq shyqtyq. Bul búkil ujymnyń tynbas eńbeginiń jemisi bolatyn», deıdi Jarqynbek ustaz.
Mamandyǵyna adaldyq tanytqan ustaz zeınetkerlik demalysqa shyqqan soń da qarap otyrmady. Tájirıbeli ustazdy 2005 jyly ózi eńbek etken S.Seıfýllın atyndaǵy №4 orta mekteptiń basshylyǵyna qaıta shaqyrdy. Úsh jyldan soń talaı bilimdi, tárbıeli shákirtti túletip, bilim salasynda ózindik qoltańbasyn qaldyrǵan Jarqynbek ustazdy mektep ujymy úlken abyroımen qurmetti demalysqa shyǵaryp saldy.
Aqsaqal búgin de qoǵam ómirinde belsendi, «Amanat» partııasy Túrkistan qalalyq fılıaly saıası bıýrosynyń múshesi, qalalyq ardagerler keńesiniń tóraǵasy, qoǵamdyq keńestiń múshesi, qalalyq bilim salasy boıynsha birlestiktiń tóraǵasy. Sanaly ǵumyryn bilim berý salasyna arnaǵan keıipkerimizdiń shákirtteri búginde elimizdiń túkpir-túkpirinde, shetelderde túrli salada qyzmet atqaryp júr. Eńbegi joǵary baǵalanǵan ustaz «Eren eńbegi úshin» medaliniń, «KSRO-nyń oqý-aǵartý isiniń ozyq qyzmetkeri», «Qazaqstannyń oqý-aǵartý isiniń ozyq qyzmetkeri», «Y.Altynsarın» tósbelgileriniń, el Táýelsizdiginiń mereıtoılyq medaldarynyń ıegeri. Al 2004 jyly «Jyl adamy», «Túrkistan qalasynyń Qurmetti azamaty» atandy.
– «Ustazdyq etken jalyqpas, úıretýden balaǵa» demekshi, áli de oqýshylarymdy, ujymymdy qımaımyn. Kezinde basqa jumysqa aýysyp ketýge múmkindik boldy. Túrli usynystar aıtyldy. Biraq men óz mamandyǵymnan alystaǵym kelmedi. Barlyǵynan bas tarttym, ol úshin ókingen emespin. Eńbek jolymda qarapaıym mektep muǵaliminen bastap, dırektordyń orynbasary, dırektor, basqa da laýazymdy qyzmetterdi atqardym. Búkil ómirimdi osy ustazdyqqa arnadym. Qudaıǵa shúkir, eńbegim elendi. Prezıdent Qasym-Jomart Toqaevtyń qolynan «Qurmet» ordenin de aldym. Bir sózben aıtqanda, marapattan kende bolǵan joqpyn. Osynyń barlyǵy taza eńbektiń arqasynda kelgen dúnıe, abyroı. Árıne eńbektiń ádil baǵalanǵany, marapat ta kerek bolar. Alaıda halyqtyń alǵysy, shákirtterimniń jetistiginen artyq úlken mártebe, marapat joq, – deıdi Jarqynbek Qulbaıymbetov.
Bilim sapasyn arttyrýǵa, bilim júıesindegi ózgeristerge únemi mán berip, óz oı-pikirin aıtyp otyratyn, baqytyn ustazdyqtan tapqan, 4 ul, 3 qyzdy tárbıelep ósirgen Jarqynbek Qulbaıymbetov – búginde 31 nemere, 27 shóbereniń atasy.
Túrkistan oblysy