Eldiń órkendeýi úshin barlyq mamandyqtyń mańyzy zor. Ásirese ult saýlyǵyn saqtaý jolynda aıanbaı eńbek etip júrgen dárigerlerdiń jóni bólek, qadiri artyp tur.
Atyraýda bir kásipti dınastııaǵa aınaldyrǵan otbasylar kóp. Sonyń qatarynda munaıly óńir jurtshylyǵyna keńinen tanys Basarolla Haresovtiń januıasy bar. Qazir úsh býynǵa ulasqan dárigerler dınastııasynda bul kásipti eki ýrolog, ftızıator, okýlıst, nevropatolog, stomatolog, jalpy tájirıbe dárigeri jalǵastyryp keledi. Olardyń jalpy eńbek ótili – 155 jyl.
Basarolla Haresovtiń mamandyǵy – ýrolog. Aqtóbe medısına ınstıtýtyn 1969 jyly bitirgen soń eńbek jolyn oblystyq aýrýhanada bastaǵan. Jas maman osy aýrýhanada dárigerlik tájirıbesin shyńdap, aldyńǵy býynnyń aqyl-keńesin, tálimin alýdan jalyqpady. Sóıtip, 1972-1973 jyldary bas dərigerdiń emdeý isi jónindegi orynbasary boldy. Tórt jylda óz isiniń bilgiri atanyp, ujymda maqtaýly dárigerge aınalǵan oǵan oblystyq qan quıý stansasyn basqarý mindeti júkteldi.
О́z isin jetik biletin dáriger 1986 jyly oblystyq aýrýhanaǵa qaıta oraldy. Uıymdastyrý qabileti de, iskerligi de jetilgen Basarolla Haresov taǵy da bas dərigerdiń emdeý isi jónindegi orynbasary laýazymyn atqardy. Al 1993-2006 jyldary ýrologııa bóliminiń meńgerýshisi boldy. Keıin ýrolog-ordınator retinde naýqastardy emdep, jas býyndy osy mamandyqtyń qyr-syryna úıretti. Uzaq jylǵy jemisti eńbegi úshin KSRO Densaýlyq saqtaý isiniń úzdigi atandy.
Onyń ómirlik jary Bazargúl Myrzaǵalıevanyń mamandyǵy – ftızıatr. О́kpesine daq túsken jandardy emdeýge barynsha atsalysyp, mamandyǵyna adaldyǵynan aınymaǵan jan.
«Biz de balalarymyzdyń dárigerlik kásibimizdi jalǵastyrǵanyn qaladyq. О́ıtkeni aq halat kıgen dárigerdiń jany appaq, júregi taza bolady. Adamzat úshin eń qadirli mamandyq – dáriger. Sondyqtan balalarymyzǵa bul mamandyqtyń mańyzyn uǵyndyra aldyq dep oılaımyn. Sonyń nátıjesindeı, tórt balamyzdyń ekeýi dáriger mamandyǵyn tańdady. Bizdiń dárigerlik kásibimiz úshinshi býynǵa jalǵasty. Qazir áýletimizde jeti dáriger bar», deıdi B.Haresov.
Áke-sheshesiniń dárigerlik jolyn jalǵastyrǵan Álibek Basarollauly 8-synyptan soń Atyraý medısınalyq ýchılıshesinde oqyǵan. Jazǵy demalysta jedel járdem stansasynda sanıtar bolyp jumys istegen eken. Al qyzy Venera okýlıst bolýdy maqsat etipti. Adamnyń kóz janaryn saqtaýǵa úles qosý úshin joǵary bilim alǵan. Qazir joǵary sanatty dáriger oblystyq oftalmologııa aýrýhanasyndaǵy bilikti mamannyń birine aınalǵan.
«Joǵary bilim alýǵa M.Ospanov atyndaǵy Batys Qazaqstan medısınalyq akademııasyna oqýǵa tústim. Mamandyǵym – ýrolog. Qazir ákemniń jolyn jalǵastyryp, oblystyq aýrýhanada jumys isteımin», deıdi Álibek Basarollauly.
Osy áýlettiń kelini Gúlsim Qazmaǵambetova da dáriger mamandyǵyn tańdaǵan. Ol da Aqtóbedegi medısınalyq akademııany bitirgen. Qazir oblystyq balalar aýrýhanasynda nevropatolog bolyp jumys istep júr. Kúıeýi Álibek Basarollauly ekeýi alty bala tárbıelep otyr.
Dárigerler dınastııasynyń úshinshi býynyn Baljan Əlibekqyzy men Nurjan Nurlanuly jalǵastyryp keledi. Baljan stomatologııa salasyn meńgergen. Al Nurjan – jalpy təjirıbe dərigeri.
Atyraý oblysy