Qazir erinbegen adam úshin kásibin ashyp, násibin tabýǵa múmkindik mol. Ásirese altyn besik aýyldan irgesin alystatpaǵan aǵaıynǵa jasalyp jatqan qamqorlyq az emes. Kindik qany tamǵan jerde turyp-aq tórt túlik ósirip, kól-kósir tabys tabýǵa umtylyp jatqan otbasylar jetkilikti. Olar jeńildetilgen paıyzben nesıe alyp, «Aýyl amanaty» baǵdarlamasynyń sharapatyn kórip otyr.
Alataý aýylynyń turǵyny Ásemgúl Toqtasynova «Aýyl amanaty» baǵdarlamasy týraly estigen sátten-aq iske kirisedi. Qushaq-qushaq qaǵazdy qushaqtap, túrli mekemege baryp, qujatyn rásimdep, tabanynan taýsylyp júrip, aldymen «Ásemgúl» jeke kásipkerligin ashsa, artynsha aýyldyqtardy jarylqaıtyn joba aıasynda 8,5 mıllıon teńge nesıe alypty. Osylaısha, otaýynyń oshaǵyn jaǵyp, aǵaıynnyń qabaǵyn baǵyp otyrǵan kelinshek muǵalimdik jumysymen qatar, otbasynyń tabysyn arttyrýdy taǵy bir isti bastaýǵa beldi bekem býady.
«Otaǵasy ekeýmizdiń jumysymyz bar bolsa da, jańa bir is bastaǵanymyz jón dep sheshtik. Qur jatqanǵa qut qonbaıdy. Osyny anyq uqtyq ta, kúnder boıy keńesip, apta boıy aqyldasyp, joba aıasynda qujat tapsyrdyq. Qudaı da adamnyń nıetine qaraı beredi ǵoı. Memleket tarapynan qarastyrylǵan nesıemizdi aldyq. Oılana kele, ýaq mal satyp alý týraly sheshim qabyldadyq. Jumys pen sharýashylyqty qatar ıgerý álbette ońaı is emes eken. Oǵan anyq kózimiz jetti. Bárine birdeı úlgerý kerek. Otaǵasy Serik «QazSýShar» mekemesiniń aýdandyq fılıalynda sý retteýshi bolyp eńbek etedi. Sondyqtan biz ala tańnan turyp, bar sharýany retimen atqaramyz. Bizde bos ýaqyt degen bolmaıdy. Jumysqa barmas buryn tań alageýimnen maldyń qamyn jasaımyz», deıdi Ásemgúl Toqtasynova.
Jýalynyń jupar aýasyn jutyp ósken otbasyna mehnatqa toly aýyl tirshiligi tańsyq emes. Maldy jaıylymǵa shyǵarý, jemshóbin berý, qysqy mal azyǵyn daıyndaý sekildi jumystardy bes saýsaqtaı meńgerip alǵan. Ári olar ózderi bastaǵan jańa isti ármen qaraı óristete túsýge de nıetti eken.
Ásemgúl Toqtasynovanyń aıtýynsha, ótken jyly nesıe rásimdegen soń qolǵa tıgen qarjyǵa Jambyl aýdanynan 110 qoı satyp alypty. Der kezinde jemshóbin ázirlegen. Alǵashqy mal tóldetý naýqanynda sol 110 bas qoıdan 90 tól alǵan eken. Qazirgi kezde bir azamatty jumyspen qamtyp otyrǵan jaıy bar.
«Otbasymyzda bir-birimizdi qaı kezde de qoldap júremiz. Sonyń arqasynda tabysqa jetip otyrǵan jaıymyz bar. Bir sózben aıtqanda, adal nıetimiz arqyly qolǵa alǵan isimiz alǵa basyp, nátıjesin kórip jatyrmyz. Qoılarymyz ótken jyldyń jeltoqsan aıynan bastap tóldedi.
«Aýyl amanaty» baǵdarlamasy aýyldaǵylarǵa úlken múmkindik berip otyrǵanyn aıta ketken jón. Qazyǵyn altyn besikke qaqqan talaı otbasy dál osy jobanyń sharapatyn kórip otyrǵany anyq. Adal eńbekten qashpaǵan otbasylardyń iskerligi bizge de úlgi boldy. Tómendetilgen paıyzben berilgen nesıeni óz maqsatymyzǵa jumsadyq. Qazirgi kezde qolǵa alǵan sol ata kásiptiń arqasynda násibimizdi aıyryp otyrmyz. Aýyldaǵy aǵaıynnyń jańa isti bastaýy úshin múmkindik berip otyrǵan bılikke aıtar alǵysymyz sheksiz.
Rasynda, aýyl – ystyq uıa, qımas meken. Uqsata bilgen adam aýylda júrip-aq mol tabysqa keneledi. Mundaǵy saf aýa, aryqtan aqqan taý sýy, jaıqalyp ósken tal-terek janyńdy rahatqa bóleıdi. Bıliktiń ózi aýyl azamattarynyń jańa is bastaýyna múmkindik týdyryp jatqany kóńil qýantady. Endi turǵyndar sol múmkindikti utymdy paıdalanyp, kásip bastaýǵa táýekel etse, nur ústine nur. Qysqasy, qol qýsyryp qarap otyrmaǵan adamǵa kásip te, jumys ta aýyldan tabylady», deıdi Ásemgúl Toqtasynova.
Ata kásip arqyly tabys tabýǵa bel býǵan otbasynyń eńbekqorlyǵy kóńil toǵaıtady. Aýyldastarynyń aıtýynsha, Serik Qadyrovtyń otbasyndaǵy birlik pen tatýlyq, eńbekqorlyq sekildi qasıetter kópke úlgi. Olar aldaǵy ýaqytta kásibiniń órisin keńeıte túsýge nıetti. Bári de sátimen bolsyn deımiz.
Jambyl oblysy,
Jýaly aýdany,
Alataý aýyly