Jaqynda Almatydaǵy Qazaq onkologııa jáne radıologııa ǵylymı-zertteý ınstıtýtynyń (QazORǴZI) onkolog-hırýrgteri otandyq medısına tarıhynda buryn-sońdy bolmaǵan tájirıbe jasap, aıryqsha operasııa barysynda 65 jastaǵy áıel adamnyń qarnynan salmaǵy 30 kılo tartatyn isikti aldy.
Naýqas ishindegi isigi otyz kılodan asqansha qalaı júre bergen deseńiz, keıingi ýaqytta qarny birden óse bastaǵan, ishi shanshyp aýyryp, tamaq ishkennen keıin tez toıyp qalǵandaı bolyp, arqasy ylǵı aýyryp, álsizdik pen tez sharshap qalatynyn baıqaǵan da, QazORǴZI mamandaryna júgingen.
Naýqastyń aıtýynsha, derti 2023 jyldyń jeltoqsan aıynda bastalyp, bıyl shilde aıynan beri ishi shar úrlegendeı úlkeıe bastaǵan. Dárigerler teksergen kezde naýqastyń qursaq qýysy men jambas jaǵynda kıstozdy túzilis (KT) belgileri tabylady. Ish qýysynyń kompıýterlik tomografııasy jambas qýysynan shyqqan úlken kıstozdy-qatty qursaq massasynyń sýretin kórsetip, oǵan qosa CA 125 onkomarkeri de joǵarylaǵany anyqtaldy.
Medısınadaǵy sırek kezdesetin osy jaǵdaıǵa qatysty Qazaq onkologııa jáne radıologııa ǵylymı-zertteý ınstıtýtynyń Onkogınekologııa ortalyǵynyń meńgerýshisi Erlan Kókebasov: «2024 jylǵy 13 tamyzda Onkogınekologııalyq ortalyqtyń mýltıdıssıplınarlyq tobynyń (MDT) otyrysynda osy jaǵdaı talqylanyp, naýqasqa ekijaqty krossektomııa, laparotomııa, qosalqylary bar jalpy gısterektomııa men omenektomııaǵa qosa, ońtaıly sıtoredýksııa kóleminde hırýrgııalyq emdeý joly usynyldy. Naýqas kúrdeli operasııa jasaýǵa, qan quıýǵa kelisimin berip, «Qazaq onkologııa jáne radıologııa ǵylymı-zertteý ınstıtýty» AQ gınekologııalyq-onkologııalyq ınstıtýtyna jatqyzyldy», dedi.
Al isikti gıstologııalyq zertteýden ótkizgen kezde, nátıjesi naýqasta analyq bezdiń qaterli isigin anyqtap bergen.
«Operasııa úsh saty boıynsha sátti ótti. Birinshi kezeńde ekijaqty krossektomııa jasaldy, óıtkeni naýqasta aıaǵyndaǵy kishi jáne úlken kóktamyrlarynda kinárat boldy. Ekinshi kezeńde laparotomııa, ıaǵnı oń jaq analyq bezdiń asa kólemdi isigi alynyp, qosalqylary bar jalpy gısterektomııa, sondaı-aq úlken shajyrqaıdyń bólikteri alynyp, osylaısha ońtaıly operasııa júzege asty. Analyq bez isiginiń úlkendigine baılanysty ishtiń aldyńǵy jaǵy qatty sozylyp ketkendikten, úshinshi kezeńde abdomınoplastıka jasaý qajet boldy», deıdi dárigerler.
Aıtqandaı, QazORǴZI onko-hırýrgteri dál osyndaı alyp isikpen birinshi ret betpe-bet kelip otyr.
«Instıtýtymyzda udaıy osyǵan uqsas klınıkalyq jaǵdaılarǵa kýá bolyp jatamyz. Degenmen bul naýqasta anyqtalǵan analyq bez isiginiń mólsheri tájirıbemizde ǵana emes, AQSh, Ulybrıtanııa, TMD elderi men Okeanııadaǵy jetekshi onkologııalyq mekemelerdegi áriptesterimizdiń tájirıbe turǵysynan qaraǵanda da, shyndyǵynda erekshe oqıǵa boldy. Buryn dál osyndaı kólemdegi iri isik tirkelmegen eken. Alynyp tastalǵan isiktiń salmaǵy shamamen 30-35 kılo bolyp, tyǵyzdyǵymen erekshelendi», deıdi Qazaq onkologııa jáne radıologııa ǵylymı-zertteý ınstıtýtynyń basqarma tóraǵasy Dılıara Qaıdarova.
Qazirgi tańda naýqastyń ahýaly jaqsy, ózdiginen qozǵalyp, júrip-tura alady. Medısınalyq ujymǵa degen rızashylyǵynda shek joq, bilikti dárigerlerdiń kezikkenine qýanady.
ALMATY