Ertis-Baıan óńirindegi turaqtandyrý qory óńir turǵyndarynyń aldaǵy qysqa qajetsinetin azyq-túlik ónimderin qamdaýǵa kiristi. Qazirgi ýaqytta qor qoımalarynda 13,8 myń tonna azyq ónimderi saqtalyp tur.
Pavlodar oblysynda «Pavlodar» áleýmettik-kásipkerlik korporasııasy» AQ negizinde qurylǵan jalǵyz turaqtandyrý qory jumys isteıdi. Onda jalpy kólemi 13,8 myń tonna azyq-túlik ónimi jınaqtalǵan. Oblys boıynsha 201 áleýmettik dúken men áleýmettik saýda núktelerinde azyq-túliktiń 12 ataýly túri satylady.
«Pavlodar» áleýmettik-kásipkerlik korporasııasy» AQ turaqtandyrý qorynyń dırektory Azamat Dándibaevtyń aıtýynsha, kúzgi kezeńde kóptegen azyq túrine tutynýshylar tarapynan suranystyń joqtyǵyna nemese kúrt azaıyp ketkenine baılanysty qorda arnaıy tizimge enetin ónimderdiń keıbiri joq. Mysaly, kúnbaǵys maıy men kartopqa qazir múlde suranys baıqalmaıdy.
О́ńirdiń turaqtandyrý qorynan ónimder kelesideı baǵada bosatylyp jatyr: Qaraqumyq (kılosy) – 130 teńge, birinshi sortty un (kılosy)– 145 teńge, tuz (kılosy) – 55 teńge, kúnbaǵys maıy (lıtri) – 630 teńge (qazir bul ónim qorda joq, óndirýshiler syǵymdap alyp jatyr, jaqyn arada túsedi), kúrish (kılosy) – 350 teńge, makaron (rojkı, kılosy) – 250 teńge, qyryqqabat (kılosy) – 95 teńge, qant (kılosy) – 410 teńge, kartop (kılosy) – 110 teńge, sábiz – (kılosy) 110 teńge, pııaz (kılosy) – 102 teńge, taýyq jumyrtqasy (ondyǵy) – 426 teńge.
«Bizde keıbir azyq-túlik ónimderi, sonyń ishinde kókónis pen kartop qoımaǵa arnaıy salynbaıdy. Olar sharýa qojalyqtarynyń kókónis qoımalarynda saqtalyp turady, qajet kezinde aldyrtamyz. Oblysta kúrish baǵasyn yryqtandyrý ári kólemin kóbeıtý maqsatynda jýyqta korporasııa qorǵa 204 tonna kúrish satyp aldy. Aldaǵy ýaqytta taýyq jumyrtqasyn da qajet kólemde satyp alý josparda tur. Qysqy ýaqytqa qajet kókónis túrleri boıynsha da qosymsha satyp alýlar júrgizilýi múmkin. Biraq bizdiń óńirde kókónis ónimderi mol jınalatynyn eskersek, kartop jáne keıbir kókónister boıynsha qorǵa naqty satyp alýlar júrgizilmeıdi. Sebebi ónimdi jergilikti naryqta arzan baǵada ótkizýge qyzyǵýshylyq tanytatyn sharýashylyqtar jetkilikti», deıdi A.Dándibaev.
Joǵaryda atalǵan 204 áleýmettik saýda núktelerinen bólek, Pavlodar qalasynda «Jailau» fermerlik bazary jumys isteıdi. Onda satylatyn azyq-túlik taýarlary tikeleı jergilikti óndirýshilerden jetkiziletindikten, naryqtaǵy baǵadan 15-20%-ǵa arzan. Bıyl Ekibastuz ben Aqsý qalalarynda da osyndaı bazarlar qurylysy qolǵa alynyp jatyr.
Qazirgi ýaqytta Pavlodar oblysy azyq-túlik baǵasynyń arzandyǵy jóninen 7 pozısııa boıynsha respýblıkadaǵy óńirler arasynda TOP-5-ke kiredi. Atap aıtqanda, birinshi sortty un, qaraqumyq jarmasy, sary maı, sút (2,5%), aıran (2,5%), kartop, sábiz. Oblys boıynsha jalpy syıymdylyǵy 500 myń tonnadan asatyn 150 kókónis saqtaý qoımasy bar. Bıyl syıymdylyǵy 8 myń tonna kókónis qoımasyn salý kózdelgen.
Pavlodar oblysy