Eldegi qarjy uıymdarynyń tabysy eselenip, merzimi ótken bereshek kólemi artyp jatyr. Tamyz aıyndaǵy esepke súıensek, ekinshi deńgeıli bank aktıviniń jalpy jıyntyǵy – 56,8 trln teńge, al nesıe portfeli 32,5 trln teńge deńgeıinde tur. Jyl basynan beri nesıe portfelindegi tólenbegenine 90 kúnnen asqan bereshek úlesi artyp, 1 trln teńgege deıin ósken.
Qarjy naryǵyn retteý jáne damytý agenttiginiń málimeti boıynsha, osy jyldyń tamyz aıyndaǵy EDB qarjylyq esebinde bankterdiń taza tabys kólemi 1,4 trln teńge boldy. Bul byltyrǵy kórsetkishten 16,7%-ǵa kóp. 21 banktiń ishinde eń tabysy joǵary – «Halyk Bank» (444,2 mlrd teńge). Ekinshi orynda – «Kaspi» (281,9 mlrd), úshinshi orynda – «SentrKredıtBanki» (101,8 mlrd teńge). Odan keıingi oryndar «Forte Bank» (89,1 mlrd) pen «Jusan Bank»-ke (83,7 mlrd teńge) tıesili. Qalǵan 16 banktiń jıyntyq tabysy – 388,1 mlrd teńge. Sonda kirisi mol 5 banktiń jalpy EDB tabysyndaǵy úlesi 72%-dy qurap otyr.
Bul derekter bank aktıvteri jyl basynan beri 10,4%-ǵa óskenin kórsetedi. Ulttyq bank jarııalaǵan tamyz aıynyń esebine qarasaq, ekinshi deńgeıli bankterdiń tamyz aıyndaǵy jaǵdaı boıynsha jıyntyq aktıv kólemi 56,8 trln teńgege jetken. Jyl basynan beri aktıvter kólemi 5,3 trln teńgege, ıaǵnı 10,4%-ǵa kóbeıgen.
21 banktiń ishinde tek 4 banktiń aktıvi azaıǵan. «Qytaı saýda-ónerkásip banki» (-0,01%), «Qazaqstan-Zırat halyqaralyq banki» (-6,2%), «VTB bank» (-6,8%) jáne «Al Hilal» banki (-16,3%) teris dınamıka kórsetip otyr.
Qarjy ınstıtýttaryndaǵy merzimi ótken bereshek kólemi ulǵaıyp keledi. EDB nesıe portfelindegi 90 kúnnen astam merzimi ótken bereshek úlesi 3,14%-ǵa jetip otyr. Sandyq mánde eseptesek, jyl basynan beri mundaı «úmitsiz bereshek» kólemi 155,8 mlrd teńgeni quraıdy.
Bankterdiń ekonomıkaǵa bergen kredıti 2024 jylǵy shildede 1,4%-ǵa, 30,5 trln teńgege deıin (2024 jyldyń basynan beri 9,3%-ǵa ósken) ulǵaıdy. Ulttyq valıýtada berilgen kredıt 1,5%-ǵa, 28,0 trln teńgege deıin, shetel valıýtasyndaǵy nesıe 1,1%-ǵa, 2,6 trln teńgege deıin kóbeıdi.
Halyqqa berilgen kredıtter 2024 jylǵy shildede 2,2%-ǵa ulǵaıyp, 18,7 trln teńgeni qurady (2024 jyldyń basynan bastap 12,3%-ǵa ósken). Halyqqa berilgen kredıt qurylymynda tutynýshylyq qaryz 12,0 trln teńgege artty.