Úkimet basshysy Oljas Bektenov Shymkentke jumys sapary aıasynda megapolıstiń qazirgi damý barysymen jáne Memleket basshysynyń Joldaýyn iske asyrý sharalarymen tanysty, dep jazady Egemen.kz.
«Ońtústik» ındýstrııaldy aımaǵynda Oljas Bektenov sýsyndarǵa arnalǵan alıýmınıı qalbyrlar men qaqpaqtar shyǵaratyn QazAlPack kásipornyna bardy. Kásiporyn jylyna 1,2 mlrd dana banka shyǵarady. Zaýytta 360 adam jumys isteıdi.
QazAllPack JShS dırektory Rýstam Sýhov avtomattandyrylǵan óndiris prosesin tanystyryp, qaptamanyń bul túri óziniń tutynýshylyq qasıetteri boıynsha eń progressıvti ári ekologııalyq taza ekenin aıtty. Zamanaýı sapa standarttary boıynsha óndiriletin ónimder ishki naryqta satylyp, О́zbekstan, Qyrǵyzstan, Reseı, Tájikstan elderine eksporttalady. Memlekettik qoldaý sharalary men ındýstrııalyq aımaqta qurylǵan qolaıly jaǵdaılardyń arqasynda kompanııa 2025 jylǵa qaraı ekinshi óndiristik jelini iske qosyp, ónim kólemin 2,3 mlrd bankaǵa deıin arttyrýdy josparlap otyr.
«Shymkent qalasynyń jalpy ónerkásip negizin aýdany 1 276 gektardy quraıtyn 7 ónerkásip aımaǵy, onyń ishinde, búginde 293 joba iske asyrylǵan, 8,2 myńnan astam jańa jumys orny ashylǵan. «Ońtústik» ınvestısııalyq portfeline jalpy quny 151,3 mlrd teńgeni quraıtyn 70 joba kiredi», dedi Shymkent qalasy ákiminiń orynbasary Aıdyn Kárimov.
Úkimet basshysy sondaı-aq «PetroQazaqstan Oıl Prodakts» munaı óńdeý zaýytynda túrli otyn túrlerin óndirýdiń tehnologııalyq tizbegimen tanysty. Kásiporyn jylyna 6 mln tonna munaı óńdeıdi. Shyǵarylatyn ónim túrleriniń qataryna avtomobıl benzınderi, dızel otyny, avıasııalyq kerosın, suıytylǵan kómirsýtek gazy, mazýt jáne basqa da munaı ónimderi kiredi.
Munaı óńdeý zaýytynyń óndiristik qýatyn jylyna 12 mln tonna qaıta óńdelgen munaıǵa deıin ulǵaıtý jobasy qolǵa alynǵan. Oljas Bektenov janar-jaǵarmaı naryǵyndaǵy turaqtylyqty qamtamasyz etýdiń mańyzdy ekenin atap ótti.