Nemis ǵalymdarymen birlesken ortalyq

Ortalyqtyń ashylýy bıyl qyr­kúıek aıynda Qazaqstan men Germa­nııa arasyndaǵy ǵylymı baılanystardy nyǵaıtýdaǵy mańyzdy kezeń  – Federaldyq kansler Olaf Sholstiń elimizge memlekettik sapary aıasynda josparlanǵan edi.

Ortalyqtyń negizgi maqsaty – eki­jaqty ǵylymı yntymaqtastyqqa jár­demdesý. Ortalyqty ozyq bilim men zamanaýı tájirıbe alańyna aınaldyrýdy josparlaǵan taraptar, ásirese ekologııa, agrobıologııa, bilim berý jáne azamattyq qoǵam sııaqty negizgi salalardaǵy zertteýlerdi damytýǵa múmkindik beretin ǵylymı áriptestikti óristetpek.

«Ideıadan – áreketke» ustany­myn­daǵy qazaq-nemis ǵylymı-zertteý ynty­maqtastyq ortalyǵynyń tusaý­keseri aıasynda dóńgelek ústel ótti. Alqaly jıyndy Ulttyq ǵylym akade­mııasynyń prezıdenti Aqylbek Kúrishbaev ashyp, ortalyqty qurýdyń eki el arasyndaǵy ǵylymı yntymaqtastyqty nyǵaıtýdaǵy mańy­zyna toqtaldy.

– Nemis ǵalymdary jáne bilim me­kemelerimen birlesken jumysymyz eli­mizdiń álemdik arenadaǵy ǵylymı us­­ta­­nymyn nyǵaıtyp qana qoımaı, jańa teh­­nologııa men ınnovasııalardy da­mytýǵa alǵyshart bolaryna senimdimin. Al­daǵy  keleshekte ortalyq – klımattyq ózge­ris­terdi, sý resýrstaryn jáne turaq­ty damý maqsattaryn zert­teýge baǵyttal­ǵan  jobalardy úılestirýge mańyzdy alań ­bolatyny sózsiz. Munda jas zert­teý­­shi­ler­di qoldaýǵa erekshe kóńil bólip, ǵy­lymı-zertteý salasyndaǵy ozyq táji­rı­be­lerdi ıgeremiz, – dedi UǴA prezıdenti.

Qazaq-nemis ýnıversıtetiniń pre­zıdenti, professor, doktor Volrad Rommel jańa ortalyqtyń negizgi maqsaty men mindetin tanystyryp, maman daıarlaý jáne birlesken ǵylymı jobalardy qoldaý salasyndaǵy rólin atap ótti. О́z kezeginde UǴA vıse-prezıdenti, professor Lıazzat Eralıeva ortalyqtyń tek ǵylymı ıntegrasııaǵa ǵana emes, sonymen qatar qos el arasyndaǵy mádenı almasýǵa da yqpal etetinin jetkizdi.

Is-sharada Germanııa akademııa­lyq almasý qyzmetiniń (DAAD) bas hatshysy, doktor Kaı Zıks pen Germanııa Federatıvtik Respýb­lıka­sy­nyń elimiz­degi elshisi Mo­nıka Iversen jańa ortalyq aıasynda yn­tymaqtastyqty qoldaýǵa jáne da­my­týǵa daıyn ekenin bildirdi. Sony­men qatar Germanııa Fe­deratıvtik Res­pýb­lıka­synyń Almaty­daǵy Bas konsýly Matıas Kısler jáne Konrad Adenaýer qorynyń eli­mizdegi ókildiginiń basshysy Iohannes D.Reı sóz sóılep, ǵylymı jobalardy odan ári damytýdaǵy usynysyn aıtyp, ǵy­lymda úlken tabysqa ıe bolýdaǵy álem elderi qol jetkizgen halyqaralyq yn­tymaqtastyq nátıjelerin tilge tıek etti.

Dóńgelek ústel májilisi barysynda fızıka-matematıka ǵylymdarynyń doktory, professor Asqar Jumadildaev, Sh. Esenov atyndaǵy Kaspıı tehnologııalar jáne ınjınırıng ýnıversıtetiniń prezıdenti Berik Ahmetov, D. Serikbaev atyndaǵy Shyǵys Qazaqstan tehnıka­lyq ýnıversıtetiniń rektory Sáýle Rahmetýllına, DKU halyqaralyq jáne aımaqtyq yntymaqtastyq ǵylymı-zertteý ınstıtýtynyń dırektory Bolat Sultanov, Qazaqstan ulttyq agrarlyq zertteý ýnıversıteti rektorynyń birinshi orynbasary Pirimqul Ibragımov eki jaqty ǵylymı yntymaqtastyqqa qoldaý bildirip, elimizdegi ǵylymı-zertteý jobalary týraly oı-pikirlerin aıtty.

ALMATY