Astana qalasyndaǵy Beıbitshilik jáne kelisim saraıynda Álemdik dástúrli dinder kóshbasshylary sezi Hatshylyǵynyń XXII otyrysyna oraılastyrylǵan «Beıbitshilik jolyndaǵy dinder dıalogi qazaqstandyq sýretshilerdiń kózimen» atty kórme ashyldy. Ony Konfessııaaralyq jáne órkenıetaralyq dıalogti damytý jóninde N.Nazarbaev ortalyǵy men Kórkemsýret akademııasy birlesip uıymdastyrdy.
Kórmege Kórkemsýret akademııasy sýretshileriniń 40-tan asa jumysy qoıylǵan. Kartına, músin, gobelen, grafıka, keste túrindegi qolóner týyndylarynyń barlyǵy elimizdiń baı mádenı murasyn, qoǵamdaǵy dinaralyq jáne ultaralyq kelisim men dostyqty kórsetedi.
Is-sharaǵa Konfessııaaralyq jáne órkenıetaralyq dıalogti damytý N.Nazarbaev ortalyǵynyń basqarma tóraǵasynyń mindetin atqarýshy Dıana Esenova, Mádenıet jáne aqparat mınıstrligi Din isteri komıteti tóraǵasy orynbasary Ánýar Hatıev, Kórkem sýret akademııasynyń vıse-prezıdenti Júnishan Ermahan, «FICAC» Dúnıejúzilik qurmetti konsýldar federasııasynyń prezıdenti Nıkolaos Margaropýlos, dinı birlestikter, halyqaralyq uıymdardyń, ǵylymı-sarapshylyq qoǵamdastyqtyń ókilderi qatysty.
Din isteri komıteti tóraǵasynyń orynbasary Á.Hatıev bul kórme túrli mádenıetter men dinder arasynda óner ózara túsinistik pen seriktestiktiń kópiri bola alatynynyń jarqyn úlgisi ekenin atap ótti.
«Biz ónerdiń dinı dástúrlerdiń tereńdigin aıqyndap, túrli konfessııalar arasyndaǵy túsinistikti nyǵaıtyp, qazirgi zamandaǵy dinaralyq dıalogtiń mańyzyn arttyratynyn kórip otyrmyz. Qazaqstan sekildi konkonfessııaly ári kópultty elde dostyq pen yntymaqty arttyrýǵa baǵyttalǵan árbir is qundy», dedi Á.Hatıev.
«FICAC» Dúnıejúzilik – qurmetti konsýldar federasııasynyń prezıdenti Nıkolaos Margaropýlostyń aıtýynsha, bul is-shara Qazaq elindegi órkenıetaralyq dıalog pen beıbit ómirdiń naqty kórinisi.
«Biz Álemdik jáne dástúrli dinder kóshbasshylary seziniń XXII Hatshylyǵy otyrysynyń qarsańynda kezdesip otyrmyz. Bul kórmede kórinis taýyp otyrǵan taqyryptar da sezd mıssııasymen úndesip jatyr. Bizdiń senimderimiz ben salt-dástúrimiz ártúrli bolǵanymen, ózara syılastyq pen yntymaqtastyqqa baǵyttalǵan nıetimiz bir», dedi ol.
«О́ner – adamnyń ártúrli mekende, ártúrli jaǵdaıda óz oıy men áserin bere alatyn tutas ǵylym. Bul kórmede túrli stılde, túrli janrda salynǵan, Qazaqstannyń baı tabıǵatyn beıneleıtin kóptegen eńbek qoıylǵan. Bizdiń búgingi qonaqtarymyz, onyń ishinde qurmetti konsýldar kartınalar arqyly Uly dalanyń áralýandyǵyn kórip, óz memleketterinde Qazaqstan týraly baıandap beredi dep senemiz», dep pikirin bildirdi Belgııa Koroldiginiń Qurmetti konsýly, qurmetti konsýldar basqarmasynyń basshysy Denıs Van den Veıh. Kórmeniń ashylýynda Italııa konsýldyǵynyń qyzmetkerleri Almaty oblysynyń ásem taýlary beınelengen kartınany satyp aldy. Is-shara sońynda qatysýshylar álem halyqtarynyń dinderi men mádenıetine degen qurmetti qalyptastyrý, konfessııaaralyq dıalogti jalǵastyrý jáne halyqaralyq beıbitshilik pen qaýipsizdikti nyǵaıtý jolynda tize qosyp eńbek etýdiń mańyzyn atap ótti.