Almaty oblysynyń dárigerleri bosanǵannan keıin qabyný úderisi saldarynan búıregi isten shyǵyp, tórt táýlik komaǵa túsken ananyń ómirin aman alyp qaldy.
Almaty kópsalaly klınıkalyq aýrýhanasyna Raıymbek aýdanynan jańa bosanǵan áıeldiń jaǵdaıy nasharlaǵany týraly shuǵyl habarlama kelip túsken boıda AKKA dárigerleri men mamandary ýaqyt sozbaı sanıtarlyq avıasııamen Narynqol aýylyna ushyp jetken.
Jergilikti dárigerlerdiń aıtýynsha, áıel júktiliktiń 36 aptasynda bel aımaǵyndaǵy jáne ishtiń tómengi bóligindegi qatty aýyrsyný týraly shaǵymmen aýrýhanaǵa túsken. Dárigerler shuǵyl kesar tiligi operasııasyn jasap, áıel salmaǵy 3390 gramm qyzdy dúnıege ákelgen. Operasııadan keıin segizinshi kúni naýqas balasymen qanaǵattanarlyq jaǵdaıda aýrýhanadan shyǵarylǵan. Alaıda bir aptadan keıin jas ana aýdandyq aýrýhanaǵa qaıta tústi. Áıeldiń kúıeýiniń aıtýynsha, kenetten esinen tanyp, úıde qulap qalǵan.
Narynqol aýdandyq aýrýhanasyna jedel jetken bosandyrý ortalyǵynyń dırektory G.Jumadýllaeva, reanımasııa jáne qarqyndy terapııa bólimshesiniń meńgerýshisi M.Baltaev, tamyr hırýrgi Ǵ.Baqtybaev, gemodıalız bólimshesiniń meńgerýshisi M.Qaǵazbaeva, kardıolog dáriger A.Tursaǵatova es-tússiz jatqan naýqasqa medısınalyq kómek kórsetedi.
«Qysqa ýaqyt ishinde naýqastyń júregi tórt ret toqtady. Júrgizilgen reanımasııalyq is-sharanyń nátıjesinde, jergilikti reanımatolog pen Almaty kópsalaly klınıkalyq aýrýhanasynyń mamandary pasıenttiń júrek-qantamyr qyzmetin sátti qalpyna keltirdi», deıdi AKKA kardıolog dárigeri Aıgúl Tursaǵatova.
Naýqastyń júrek qyzmeti qalpyna keltirilgennen keıin respýblıka kóleminde beıindi shtattan tys mamandarynyń qatysýymen telemedısınalyq konsılıým uıymdastyryldy.
«Naýqasta qabyný úderisi tez damyp, aǵzadaǵy kóptegen múshelerdiń asqynýy baıqalyp, sonyń saldarynan búırek jetkiliksizdigi paıda boldy. Naýqas birden «prismaflex» gomeostazdy ekstrakorporaldy túzetý apparatyna qosyldy. Bul – septıkalyq shoktyń aýyr jaǵdaıynda búırektiń zaqymdanýy bar naýqastarmen jumys isteýge arnalǵan arnaıy qurylǵy. Apparat bizge 72 saǵat boıy terapevtik plazmalyq almasýdy jáne búırekti almastyrý terapııasyn uzartýǵa múmkindik berdi, onyń ishinde: metabolızm ónimderin joıý, suıyqtyqty shyǵarý, qyshqyl-negiz balansyn baqylaý, elektrolıt balansyn qalpyna keltirý jumystary júrgizildi», deıdi nefrolog dáriger Maıra Qaǵazbaeva.
Mamandar aýdandyq aýrýhanada tórt táýlik boıy medısınalyq kómek kórsetip, vazopressorlardyń dozalaryn azaıtyp, jeldetkishte sanıtarlyq avıasııa jelisi boıynsha besinshi táýlikte gemodınamıkany turaqtandyrý úrdisi anyqtalǵannan keıin naýqas AKKA reanımasııasyna aýystyryldy.
«Almaty oblysy Densaýlyq saqtaý basqarmasy basshysynyń orynbasary L.Serikbaevadan aýyr haldegi áıel týraly aqparat alǵan sátten bastap qajetti dıagnostıkalyq ádistermen, dárilik zattarmen jáne mamandarmen qamtamasyz etýge qatysty sharalardy birlesip uıymdastyrdyq. Mamandardyń úılesimdi jumysy men kásibıliginiń arqasynda qazirgi ýaqytta naýqas ózin jaqsy sezinip, jalpy palataǵa aýystyrylyp, hattamaǵa sáıkes emdeýdi jalǵastyryp jatyr. Mundaı jaǵdaılarda, ádette, ólim-jitim qaýpi óte joǵary bolady. Áriptesterimizben birlese biliktilik tanytyp, kúsh-jigermen naýqasty qutqara alǵanymyzǵa qýanyshtymyz, ol kóp uzamaı aýyr zardaptarsyz balalaryna oralatyn bolady», dedi AKKA dırektory Elmıra Berikova.
Jalpy medısınalyq qyzmet kórsetýdiń sapasy men qoljetimdiligin qamtamasyz etýdiń mańyzy zor. Sol oraıda óńir dárigerleriniń ólim aýzynda jatqan anaǵa tez arada kómekke kelip, jan-jaqty biliktilik tanytýy búgingi medısınanyń jetistigi ekendigi sózsiz.
Almaty oblysy