Memleket basshysy Qazaqstan halqyna Joldaýynda: «Bıyl densaýlyq saqtaý salasyna bıýdjetten 3,3 trıllıon teńge qarjy bólindi. Biraq onyń nátıjesi áli kórinip jatqan joq», dedi. Sonymen birge ol «naýqastarǵa memleket kepildik bergen qyzmetterdi aqyly negizde alýdy nemese birneshe aı boıy kezek kútýdi usyný jaıttary az emes. Buǵan jol berýge bolmaıdy», dep qadap aıtty.
Qazir ınfeksııalyq juqpaly naýqastar beleń alatyn óliara shaq. Osyǵan oraı Prezıdent tapsyrmasy qalaı oryndalyp jatyr degen saýalmen oblystyq densaýlyq saqtaý basqarmasy bastyǵy Qanysh Bıjanovqa qaırylǵan edik. «Qazirgi mindet juqpaly aýrýlardyń aldyn alý bolsa, buǵan qarsy birshama shara jasalyp jatyr. Prezıdent aıtqandaı, memlekettik bıýdjet tarapynan qomaqty qarajat bólinedi. Sony tek tıimdi ıgerip, halyqtyń densaýlyǵyn saqtaý sharalaryn arttyrýymyz kerek. Bıyl oblys boıynsha ınfeksııalyq naýqastardy jatqyzýǵa arnalǵan 181 jańa emdeý tósektik orny ashyldy. Onyń ishinde 113 oryn balalarǵa, 68 oryn eresekterge arnalǵan. Búgingi tańda COVID-19 naýqasyna ushyraǵan 4 pasıent stasıonarlyq em alyp jatyr, olardyń ishinde 2 júkti áıel, sondaı-aq JRVI-men (jiti respıratorlyq vırýstyq ınfeksııa) 18 adam emdelýde jatyr, olardyń 7-i eresek adam, 11-i bala», dedi ol.
Sońǵy kúnderi oblys boıynsha JRVI naýqasymen 689 adam tirkelgen. Onyń ishinde 18 jasqa deıingi balalar – 427, eresekter – 234, júkti áıelder – 28. Buǵan qaraǵanda, oblystaǵy ınfeksııalyq naýqastyń taralýy jıilep bara jatqan sııaqty. Sondyqtan halyqty vaksınasııalaý jumysyna jedeldik kerek. Táýekel tobyna jatatyn adamdardy tegin ımmýndaý úshin tumaýǵa qarsy vaksınasııa egý jumystary jappaı qolǵa alynǵan. Búginge deıin Reseıde shyǵarylǵan «Grıppol plıýs» vaksınasynyń 60000 dozasy satyp alynypty. Vaksınasııa naýqastyń tirkelgen jeri boıynsha emhanalarda júrgiziledi. Sonymen birge 11 jastaǵy qyz balalarǵa APV-ǵa (adam papılomasynyń vırýsy) qarsy vaksınasııa josparlanǵan. Soltústik Qazaqstan oblysynda vaksınasııadan ótýge tıisti 3638 qyz bar. Bul vaksınanyń 7276 dozasyn biryńǵaı dıstrıbıýtor «SK–Farmasııa» satyp alady. Onyń málimeti boıynsha, vaksınany Amerıkadan jetkizý josparlanǵan.
Soltústik Qazaqstan oblysynyń sanıtarlyq-epıdemıologııalyq baqylaý departamentiniń basshysy Áset Jumataev óńirdegi juqpaly naýqas jaıyn tolyqtyrdy. «Qazir monıtorıng kórsetkenindeı, elde respıratorlyq vırýstar, sonyń ishinde KVI aınalymy baıqalady. Aǵymdaǵy jyldyń basynan beri koronavırýstyq ınfeksııanyń 54 jaǵdaıy tirkeldi. Qaıtys bolǵandar joq. Bul rette JRVI, vırýstyq pnevmonııa jáne KVI-men emdeýge jatqyzýdyń sany byltyrǵymen salystyrǵanda ósken joq. Bul KVI aǵymy kóp jaǵdaıda jeńil túrde ótip jatqandyǵyn kórsetip otyr. Alaıda sekvenırleýdiń sońǵy derekteri boıynsha, elimizde búkil álemdegideı, Omıkron shtamynyń ártúrli nusqasy taralyp jatqandyǵy rastalǵan», dedi ol.
Bıyl Bas memlekettik sanıtarlyq dárigerdiń mindetin atqarýshy «2024-2025 jyldardyń epıdemııalyq maýsymyna arnalǵan tumaý, jiti respıratorlyq vırýstyq ınfeksııalar (JRVI) jáne koronavırýs ınfeksııasy (COVID-19) boıynsha sanıtarlyq-profılaktıkalyq, sanıtarlyq-epıdemııaǵa qarsy is-sharalar ótkizý týraly» 2024 jyly 16 tamyzda qaýlyǵa qol qoıdy. Bul qaýly JRVI, tumaý jáne COVID-19 boıynsha epıdemııalyq maýsym kezeńinde profılaktıkalyq jáne epıdemııaǵa qarsy is-sharalardy ótkizýdi kózdeıdi, onyń ishinde:
– medısınalyq uıymdarda: kire berisinde «súzgilerdiń» jumysyn qamtamasyz etý, betperdelerdi paıdalaný, antıseptıkterdiń bolýy;
– JRVI, tumaý belgilerimen júkti áıelder men bir jasqa deıingi balalardy úıge shaqyrý kelip túsken jaǵdaıda birinshi kezekte qyzmet kórsetý;
– 2024 jylǵy 15 qyrkúıekten bastap tumaýǵa qarsy vaksınasııa júrgizý.
Tegin negizde vaksınasııa táýekel tobyna jatatyn adamdarǵa: medısına qyzmetkerleri, medısınalyq uıymda dıspanserlik esepte turǵan balalar, sábıler úıleriniń bóbekteri, qarttar úıleriniń kontıngenti, epıdemıologııalyq kórsetkishter boıynsha (2-3 trımestrdegi júkti áıelder, sozylmaly aýrýlary bar adamdar, 65 jastan asqan adamdar jáne t.b.) tirkelgen jeri boıynsha emhanada júrgiziletin bolady.
Jalpy tegin negizde 60 myń adamdy egý josparlanǵan. Qazir oblystyń densaýlyq saqtaý basqarmasy men sanıtarlyq-epıdemıologııalyq qyzmetteri ınfeksııalyq aýrýlarǵa qarsy egý jumystaryn jasaýǵa daıyn.
Soltústik Qazaqstan oblysy