Qarjylyq monıtorıng agenttigi alaıaqtyq jasady degen kúdikke ilingen Qazaqstan azamatyna izdeý jarııalady, dep habarlaıdy Egemen.kz.
Vedomstvo Aqtóbe oblysy Alǵa qalasynyń týmasy, 1986 jyly týǵan Omarov Rýslan Ýlanulyna izdeý jarııalanǵanyn habarlady.
«Atalǵan azamat jumystardy naqty oryndamaı, qyzmet kórsetpeı jáne taýar jóneltpeı, jalǵan shot-faktýralar jazyp bergeni úshin kúdikke ilingen. 2011 jyldan 2013 jylǵa deıin Omarov R.Ý. «Sunkar Logistics» JShS dırektory retinde áreket etip, kontragentterge 4 mlrd teńgeden astam somaǵa jalǵan býhgalterlik qujattar jazyp bergen», delingen habarlamada.
Aıta keteıik, memlekettik kirister organdarynyń qorytyndysy boıynsha, tólenbegen salyq túrindegi memleketke keltirilgen zalaldyń jalpy somasy 1,5 mlrd teńgeden asqan.
Vedomstvo izdeýde júrgen azamattyń ornalasqan jeri týraly qandaı da bir málimet biletin adamdarǵa myna telefondarǵa habarlasýdy suraıdy: +7-701-770-08-65 - izdeýshiler úshin, +7-7292-40-36-59 - kezekshi bólim.
Syıaqy men anonımdilikke kepil beriledi.