Úkimet úıi ǵımaratynda XVII jazǵy Paralımpıada oıyndarynyń jeńimpazdaryna jáne jattyqtyrýshylarǵa Premer-mınıstr Oljas Bektenov Prezıdenttiń atynan joǵary sporttyq jetistikteri úshin memlekettik nagradalardy tabystady, dep habarlaıdy Egemen.kz Úkimettiń baspasóz qyzmetine silteme jasap.
Úkimet basshysy sportshylardy joǵary jetistikterimen quttyqtady. Eske salaıyq, elimizdiń Paralımpıada quramasy 9 medal jeńip alyp, tarıhı rekord ornatty, atap aıtqanda, 2 altyn, 3 kúmis jáne 4 qola medal aldy.
«Memleket basshysy atap ótkendeı, paralımpıada sportshylarynyń jeńisteri – qashanda maqsatqa umtylýdyń, tabandylyq pen óz kúshine senimniń úlgisi. Oıyndar qarsańyndaǵy kezdesýimizden keıin búkil el baıraqty básekede kórsetken árbir oıyndaryńyzdy tamashalady, sizderdiń jetistikterińiz biz úshin erekshe maqtanysh boldy. Jyl ótken saıyn erekshe jandardyń sportqa qatysýy artyp kele jatqany bizdi qýantady. Búginde elimizde erekshe qajettilikteri bar 56 myńnan astam otandasymyz dene shynyqtyrýmen jáne sportpen júıeli túrde aınalysady. Árqaısylaryńyzdyń kórsetken úlgilerińiz kóptegen adamdy bizdiń paralımpıadashylar qataryna qosylýǵa yntaly etetinine senimdimin. Úkimet sportshylarǵa qolaıly jaǵdaı jasap, qoldaý kórsetý jumystaryn kúsheıtip jatyr», dep atap ótti Premer-mınıstr.
Sportshylardy Paralımpıadaǵa daıyndaýda mańyzdy ról atqarǵan jattyqtyrýshylar men tálimgerlerge de erekshe alǵys sózder aıtyldy.
О́z kezeginde paralımpıada sportshylary jarys kezinde qoldaý kórsetkeni úshin Qazaqstan halqyna alǵystaryn bildirdi.
«Men Memleket basshysyna jáne búkil Qazaqstan halqyna qoldaý kórsetkeni úshin alǵysymdy bildirgim keledi. Parıjde ótken Paralımpıada oıyndarynda elimizdiń namysyn qorǵaý men úshin úlken maqtanysh sezimin týdyrdy. Biz Paralımpıada oıyndarynda júlde jeńip alý úshin kóp eńbek ettik, bizdiń bapkerlerimiz jeńiske jetý úshin bar sheberligin saldy. Men elimizdiń alǵashqy eki dúrkin Paralımpıada chempıony bolǵanyma, Qazaqstannyń halyqaralyq arenadaǵy bedelin nyǵaıtýǵa úles qosa alǵanyma qýanyshtymyn. Aldymyzda jańa jeńisterge jetý jolynda úlken jumys kútip tur. Biz munymen toqtap qalmaı, elimizdiń ıgiligi úshin eńbek ete beremiz», dedi para paýerlıftıngten eki dúrkin Paralımpıada chempıony Davıd Degtıarev.
Prezıdent Jarlyǵymen I dárejeli «Barys» ordenimen para paýerlıftıngten elimizdegi alǵashqy eki dúrkin chempıon Devıd Degtıarev, III dárejeli «Barys» ordenimen Parıjdegi Paralımpıada oıyndarynyń chempıony jáne para dzıýdodan alǵashqy altyn ıegeri Aqmaral Naýatbek marapattaldy. Kúmis medal jeńip alǵan mergen Erkin Ǵabbasov, júzýshi Nurdáýlet Jumaǵalı jáne dzıýdoshy Shameı Erǵalı «Parasat» ordeniniń ıegerleri atandy. «Qurmet» ordenimen qola júldegerler – Dastan Muqashbekov, Zarına Raıfova, Daıana Fedosova, Jurqamyrza Shúkirbekovter marapattaldy.
«Búgin Memleket basshysynyń jarlyǵymen III dárejeli Barys ordenimen marapattaldym, óte qýanyshtymyn. Biz Paralımpıada oıyndarynda álemniń eń myqty sportshylarymen kúsh synasyp, Otanymyzǵa para dzıýdodan tarıhı altynmen oralǵanyma qýanshyshtymyn. Memleket tarapynan para sportshylarǵa erekshe kóńil bólinip jatyr. Búgingi bizdiń jetistigimiz múmkindigi shekteýli jandardy jigerlendirdi, dep oılaımyn. Bolashaqta Qazaqstan respýblıkasynyń atyn shyǵarýǵa bolashaq chempıondar bizdiń jolymyzdy jalǵastyratynyna senemin», dedi para dzıýdodan altyn medal ıegeri Aqmaral Naýatbek.
Ulttyq quramanyń bas jattyqtyrýshylary men sportshylardyń jeke bapkerleri de joǵary marapattarǵa ıe boldy. 5 tálimger «Parasat» ordenimen, 7 – «Qurmet» ordenimen, 2 jattyqtyrýshy Prezıdenttiń Qurmet gramotasymen marapattaldy: Iýrıı Kolesnıkov, D.Degtıarevtiń jeke jattyqtyrýshysy; Aıdyn Ánápın, A.Naýatbektiń jeke jattyqtyrýshysy; Dáýren Orazov, E.Shameıdiń jeke jattyqtyrýshysy; Sattar Beısembaev, N.Jumaǵalıdyń jeke jattyqtyrýshysy; Múslim Sársembekov E.Ǵabbasovtyń jeke jattyqtyrýshysy; Sergeı Bezgachev D.Muqashbekovtiń jeke jattyqtyrýshysy; Qanat Saǵyndyq D.Fedosovanyń jeke jattyqtyrýshysy; Abylaı Shýnaev, para oq atýdan Ulttyq quramanyń bas bapkeri; Mıhaıl Býrchalın, para oq atýdan aǵa jattyqtyrýshy; Artýr Tomıskıı, parapaýerlıftıngten Ulttyq qurama komandanyń bas bapkeri; Jaıdar Saılaýbaev, para dzıýdodan jattyqtyrýshy; Jandos Qııanov, para dzıýdodan Ulttyq qurama komandanyń bas bapkeri; Aıdar Kartpaev, para júzýden Ulttyq qurama komandanyń bas bapkeri; Tahır Mamashaev, para jeńil atletıkadan Ulttyq qurama komandanyń bas bapkeri.
Búginde Qazaqstanda 19 paralımpıadalyq sport túri damyp jatyr, onyń ishinde bochcha, golbol, otyryp oınaıtyn voleıbol, 5h5 fýtbol, ústel tennısi, paradzıýdo jáne t.b. Paralımpıada túrleri boıynsha elimizdiń ulttyq quramasynyń quramynda barlyǵy 925 adam bar.