Astanada Qazaqstan halqy assambleıasynyń muryndyq bolýymen «Birlik pen kelisim – Ádiletti Qazaqstannyń basty qundylyǵy» atty ǵylymı-tájirıbelik konferensııa ótti. Is-sharany Mádenıet jáne aqparat mınıstrligi men Qoldanbaly etnosaıası zertteýler ınstıtýty uıymdastyrdy.
Jıynǵa Parlament depýtattary, Qazaqstan halqy Assambleıasynyń, ortalyq memlekettik organdardyń ókilderi, sondaı-aq otandyq jáne halyqaralyq ǵylymı-sarapshylyq qoǵamdastyqtyń músheleri qatysty. Konferensııa Prezıdenttiń bıylǵy Joldaýynda kórsetilgen basym baǵyttar aıasynda etnosaralyq kelisim men ulttyq birlikti nyǵaıtýdyń zamanaýı úrdisteri men tásilderin talqylaýdyń alańyna aınaldy.
Keleli otyrysta sóz tizginin QHA Ǵylymı-sarapshylyq keńesiniń tóraıymy, Qoldanbaly etnosaıası zertteýler ınstıtýty dırektorynyń orynbasary Aıgúl Sádýaqasova ustady. Qazaqstan halqy assambleıasy tóraǵasynyń orynbasary Marat Ázilhanov pen Mádenıet jáne aqparat vıse-mınıstri Aızada Qurmanova sóz bastap, assambleıanyń ulttyq birlikti qalyptastyrý saıasatyn júzege asyrýdaǵy róliniń mańyzyn atap ótti. Sondaı-aq olar eldegi etnosaralyq kelisimdi saqtaýǵa baǵyttalǵan strategııalyq mindetterdi odan ári júzege asyrý úshin memlekettik organdardyń, etnomádenı birlestikterdiń jáne azamattyq qoǵamnyń ózara is-qımylyn kúsheıtý qajettigin alǵa tartty.
Konferensııada spıker retinde Parlament Senatynyń depýtaty Nurııa Nııazova, Májilis depýtaty Erkin Ábil, «Qoǵamdyq kelisim» respýblıkalyq memlekettik mekemesiniń dırektory Elına Masagýtova, Prezıdent ortalyǵy dırektorynyń orynbasary Botagóz Kaıpova, Shet tilderi ýnıversıteti janyndaǵy Hankýk Halyqaralyq aımaqtyq zertteýler ortalyǵynyń (Koreıa) ǵylymı professory Iаngmın Chıý oı-pikirin ortaǵa saldy.
Jıyn qorytyndysy boıynsha qarar qabyldanyp, onda qatysýshylar aldaǵy jumystyń birqatar negizgi baǵytyn belgiledi. Qaýlyda etnosaralyq qatynastar salasyndaǵy memlekettik saıasatty ilgeriletý jáne aǵartýshylyq qyzmetti jandandyrý boıynsha aqparattyq jumysty kúsheıtý qajettigi atalyp ótken. Sondaı-aq memlekettik etnosaıasatty ǵylymı jáne qoǵamdyq qoldaýdy nyǵaıtý úshin etnomádenı birlestikterdiń memlekettik organdarmen jáne sarapshylar qaýymdastyǵymen ózara is-qımylyn keńeıtý barysy belgilendi. Qujatta Qazaqstan halqy assambleıasynyń 30 jyldyǵy qarsańynda etnosaralyq qatynastar quraly retindegi memlekettik tildiń rólin arttyrý, etnomedıasııa tájirıbesin keńinen engizý jáne basqa eldermen tájirıbe almasý úshin etnosaıasat salasynda halyqaralyq yntymaqtastyqty jalǵastyrý sııaqty mańyzdy baǵyttar atap kórsetilgen.