Premer-mınıstri Oljas Bektenov Halyqaralyq valıýta qory basqarýshy dırektorynyń orynbasary Bo Lımen kezdesti. Kezdesý barysynda qarjy-ekonomıkalyq saladaǵy yntymaqtastyq máseleleri talqylandy.
Elimiz – 1992 jyldan beri HVQ múshesi. HVQ-men uzaqmerzimdi seriktestik elimizdiń ekonomıkalyq turaqtylyǵyn jáne ulttyq ekonomıkanyń sapaly turaqty ósýin qamtamasyz etý úshin mańyzdy.
Kezdesýge qatysýshylar elimiz ben HVQ arasyndaǵy ózara is-qımyldyń strategııalyq sıpatyn atap ótti. Yntymaqtastyqtyń joǵary mańyzyn qurylymdyq reformalar júrgizý, elimizdiń salyq-bıýdjet saıasaty men qarjy naryǵyn damytý jónindegi birlesken jumystyń oń nátıjeleri aıǵaqtaıdy.
Halyqaralyq qarjylyq turaqtylyqty qoldaý jónindegi ekijaqty jáne óńirlik dıalogke ótken jyly Almaty qalasynda Kavkaz, Ortalyq Azııa jáne Mońǵolııa elderi úshin áleýetti damytý jónindegi HVQ О́ńirlik ortalyǵynyń ashylýy jańa serpin berdi. Memleket basshysynyń ekonomıkany jan-jaqty jańǵyrtý boıynsha júrgizip jatqan júıeli saıasatynyń nátıjesinde bıylǵy 9 qyrkúıekte «Moody’s» reıtıngtik agenttigi Qazaqstannyń egemendik reıtıngin turaqty boljammen Baa1-ge deıin kótergeni atap ótildi. Berilgen reıtıng el táýelsizdigi jyldary ishindegi eń joǵarǵysy bolyp sanalady jáne ınstıtýsıonaldy ortanyń úzdiksiz jaqsarǵanyn jáne ekonomıkany ártaraptandyrý qarqynynyń ornyqtylyǵyn rastaıdy.
Oljas Bektenov el Úkimeti Ulttyq bankpen jáne Qarjy naryǵyn damytý jáne retteý agenttigimen birlesip sapaly ekonomıkalyq ósimge qol jetkizýge baǵyttalǵan dáıekti saıasat júrgizýge nıetti ekenin atap ótti. Aǵymdaǵy reformalar bıýdjet saıasatynyń, qarjy eseptiliginiń jáne salyqtyq ákimshilendirýdiń tıimdiligin odan ári arttyrýǵa baǵyttalǵan.
О́z kezeginde HVQ basqarýshy dırektorynyń orynbasary Bo Lı el ekonomıkasyn damytý jáne halyqtyń ál-aýqatyn jaqsartý maqsatynda elimizben tyǵyz jáne syndarly yntymaqtastyqty jalǵastyrýǵa múddeliligin atap ótti. Memlekettik organdarǵa kórsetiletin turaqty konsýltasııalar men tehnıkalyq kómek ınstıtýsıonaldy negizdi nyǵaıtýǵa, makroekonomıkalyq jáne makroprýdensııalyq saıasatty jetildirýge yqpal etedi.
Kezdesý qorytyndysy boıynsha taraptar ózara is-qımyldyń barlyq spektri boıynsha áriptestikti nyǵaıtý nıetin rastady.