Atom elektr stansasy qurylysy máselesin túsindirýdi maqsat tutqan Halyq shtaby Esik qalalyq gýmanıtarlyq-ekonomıkalyq kolledjiniń stýdentterimen kezdesý ótkizdi. Kezdesýdiń maqsaty – jastarǵa atom elektr stansasyn salý týraly aqparat berý, energetıka salasyndaǵy qazirgi jaǵdaıdy talqylaý. О́ńirlik Halyq shtaby múshesi Baǵdat Rahımov AES salýdyń energetıkalyq salasyna yqpaly týraly baıandady.
«Qazir elimizdegi elektr energııasynyń shamamen 70 paıyzy kómirden alynady. Energetıka mınıstrliginiń málimetinshe, 2035 jylǵa qaraı elektr energııasyn tutyný 152,4 mlrd kVt/saǵatqa jetýi múmkin, al qoldanystaǵy stansalar bul qajettilikti tolyq qamtamasyz ete almaýy yqtımal. Bul jaǵdaı elimizge qosymsha energetıkalyq sheshimderdi qarastyrý qajettiligin týǵyzady», dedi ol.
Kezdesýde AES qurylysynyń tehnologııalyq erekshelikteri men qaýipsizdik sharalary talqylandy. Halyqaralyq standarttarǵa saı III jáne III+ býyn reaktorlarynyń qoldanylýy, olardyń qaýipsizdik júıesi jáne apattardyń aldyn alýǵa arnalǵan tehnologııalar týraly túsindirildi. Stýdentter tarapynan qoıylǵan suraqtarǵa jaýap berilip, reaktorlardyń jumys qaǵıdattary jáne qaýipsizdik talaptary jan-jaqty qaraldy.
Halyqtyq shtabtyń taǵy bir múshesi Gúlnar Qurametova AES salý jobasynyń ekonomıkalyq jáne áleýmettik áserleri týraly óz oıymen bólisti.
«AES salý jobasy elimizdiń energetıka salasyna jańa tehnologııalardy engizýdi talap etedi jáne bul jobanyń eldiń energetıkalyq balansyna áseri mańyzdy bolmaq. 6 qazanda ótetin respýblıkalyq referendýmda bul másele qoǵamnyń nazaryna usynylady», dep atap ótti G.Qurametova.
Kezdesý sońynda stýdentter men oqytýshylar AES qurylysyna qatysty suraqtaryn qoıyp, pikirlerimen bólisti. Jastar energetıka salasyndaǵy ózekti máselelerdi talqylap, AES salýdyń áleýetti áseri týrasynda mol maǵlumatqa qanyqty.
Almaty oblysy