Jer konkýrsy onlaın júredi

Memleket basshysy halyqqa arnaǵan Joldaýynda jer aýyl sharýashylyǵy salasyna ınvestısııa tartýdyń bas­ty kepili ekenin, ony tıimdi paıdalanýdyń mańyzyn erekshe atap ótken edi. Osy oraıda Jetisý oblysynda «Zań boıynsha jer» qanatqaqty jobasy iske asyryla bastaıdy. Aýyl sharýashylyǵy jerlerin bólýdiń barlyq úderisi sıfrlandyrylǵan bul jobany ádildik pen ashyqtyqty qam­ta­masyz etý maqsatynda oblystyq prokýratýra jer qatynastary basqarmasy birlesip qolǵa alǵan.

Joba respýblıkada birinshi bolyp aldaǵy qarasha aıynda Sar­qan aýdanynda júzege asy­ryl­maq­shy. Ol óz tıimdiligin kór­setse, kelesi jyldan bas­tap barlyq el aýmaǵynda iske qo­sylady dep josparlanǵan. Osy rette Jetisý oblystyq Jer qaty­nastary basqarmasynyń basshysy Ermek Ápekov qanat­qaqty rejim­degi konkýrsty ótkizýdiń erek­she­lik­teri ­týraly keńinen túsindirip berdi.

«Jergilikti jerde kemi 5 jyl turǵan azamattar men kásibin bastaǵanyna úsh jyldan aspa­ǵan kásipkerlerge artyqshylyq beriledi. Oǵan qosa egistik jerler úshin tehnıkalarynyń qýat­tylyǵy, jaıylym jerler úshin mal basynyń sany, sonyń ishin­de tehnıka men maldyń kemin­de 12 aı buryn tirkelgendigi esepke alynady. Tipti sharýa­shy­lyqtaǵy qyzmetkerler sany, olardyń zeınetaqy men salyq aýdarymdarynyń bolýy da eske­riledi. Osynyń bárine belgili deńgeıde upaı beriledi. Bul túp­tep kelgende aýyl sharýashyly­ǵyn tıimdi damytýǵa baǵyttalyp otyr», deıdi E.Ápekov.

Basqarma basshysynyń aıtýynsha, elektrondy kon­kýrs­tyń ótkizilý úderisine jer­gilikti atqarýshy organnyń qyz­met­kerleri qatyspaıdy. Sondaı-aq onda burynǵydaı ınvestısııa kólemi eskerilmeıdi. Oǵan qosa iri jer kóleminiń bir qolda shoǵyrlanýyna da jol bermeý qarastyrylǵan. Sondaı-aq kon­kýrsqa qatysýshylar túrli anyqtama men qujat jınap áýrelenbeıdi, sebebi sıfrlyq júıe Aýyl sharýashylyǵy, Ádilet, Qarjy, Eńbek jáne ha­lyq­ty áleýmettik qorǵaý mınıstr­likteriniń derekter baza­symen ıntegrasııalanǵan.

Qazirgi qoldanystaǵy konkýrs tikeleı komıssııa músheleri­niń qatysýymen, ıaǵnı adam qolymen atqarylatyndyqtan, onda jem­qorlyq táýekelderi joq deı almaımyz deıdi oblystyq proký­ratýra ókil­deri. Olar taldaý barysynda aýyl sharýashylyǵy jerlerin bólý máselesi qoǵamda jıi kóte­riletinin anyqtaǵan.

«Bul oraıda biz Jer qaty­nas­tary basqarmasymen birigip, konkýrs ótkizýdiń sıfrlyq júıesi jobasyna kiristik. Bul jerdi bólýdiń eskirgen tásilinen bas tartyp, ony tolyq avtomattandy­rýǵa qol jetkizýge baǵyttalǵan. Konkýrsqa reıtıngtik-baldyq júıe engizilip, onyń qorytyn­dysy adamnyń qatysýynsyz birden jarııalanady. Bul engizilgen jańashyldyq jemqorlyqtyń aldyn alýǵa, bıznesin jańa bas­ta­ǵan jáne áleýmettik baǵyt­taǵy kásipkerlerdi qoldaýǵa, bıznes ókilderiniń óz isin ashyq júrgizýin yntalandyrýǵa, sharýa qojalyqtarynda isteıtin ju­mys­shylardyń quqyǵyn qor­ǵaýǵa oń yqpalyn tıgizedi degen senimimiz bar», dedi oblystyq pro­­kýratýranyń Qoǵamdyq múd­­delerdi qorǵaý basqarmasy bas­ty­ǵynyń orynbasary B.Eruzaqov.

Atap ótsek, Jer kodeksine sáıkes oblysta nysanaly maq­sa­­ty men paıdalanylý rejimi bo­­ıynsha jer aýmaǵy 7 sa­natqa to­lyq­qandy bólingen al­ǵash­qy aımaq Sarqan aýdany bol­ǵan­dyqtan, qanatqaqty jobaǵa qa­ty­sý­shy retinde tańdalynyp otyr. Jerdi aýmaqtarǵa bólý qazir taǵy 4 aýdanda – Aqsý, Kóksý, Eskeldi, Kerbulaq aýdandarynda júrgizilip jatyr.

Jetisý oblysynda jyl basynan beri jer bólýge qatysty 28 konkýrs ótkizilgen. Oǵan 659 adam qatysyp, olarǵa 84 myń gektardan astam jer bólinip berilgen.

Jetisý oblysy